ཉེ་ཆར། ཞིང་ཆེན་སྲིད་གཞུང་གི་ཞིང་དཔོན་གཞོན་པ་ཧུའུ་ཡུན་གྱིས་རང་ཁུལ་འདབ་པ་དང་ལི་ཐང་སོགས་ཀྱི་རྫོང་ཁག་ལ་བརྟག་ཞིབ་གནང་སྐབས། རང་སྤུས་ཐོན་ཁུངས་ལ་དམིགས་ནས་འཕེལ་རྒྱས་སྤུས་ཚད་མཐོན་པོ་ཡོང་བར་ཤུགས་བརྒྱག་དགོས་ཞེས་གསུངས།

ཧུའུ་ཡུན་གྱིས་འཛམ་གླིང་གི་ཡུལ་སྐོར་བྱ་ཡུལ་གལ་ཆེན་བསྐྲུན་རྒྱུར་དམིགས་ཏེ། རྒྱལ་ཁབ་ཀྱི་ཚན་ཞིབ་རྨང་གཞི་སྒྲིག་བཀོད་གལ་ཆེན་དང་། ལོ་རྒྱུས་རིག་གནས་ཀྱི་རྗེས་ཤུལ། རང་བྱུང་མཛེས་ལྗོངས་སོགས་ཀྱི་ཐོན་ཁུངས་ལེགས་ཆ་གང་ལེགས་བཏོན་ནས་ཞིབ་འཇུག་སློབ་སྦྱོང་དང་ཡུལ་སྐོར་རིག་གནས་ཐོན་ལས་འཕེལ་རྒྱས་ལ་གཅིག་གྱུར་འཆར་འགོད་དང་སྐུལ་འདེད་གཏང་དགོས་པ་དང་། འཕེལ་རྒྱས་ཀྱི་འདུ་ཤེས་གསར་པ་ལག་ལེན་བསྟར་ནས་ཉི་སྟེན་གྲོང་སྡེ་སོགས་ཀྱི་སྲོལ་རྒྱུན་གྲོང་སྡེ་སྲུང་སྐྱོང་ཉམས་གསོ་དང་གསར་སྤེལ་བེད་སྤྱོད་བྱ་རྒྱུར་སྤྱི་འདོམས་ཡག་པོ་བྱས་ཏེ། ནུས་ཤུགས་ཡོད་རྒུས་འཛམ་གླིང་གི་ཡུལ་སྐོར་ཡུལ་ཤོག་ཡག་ཤོས་བསྐྲུན་རྒྱུར་ཤུགས་བརྒྱག་དགོས། ཁྲོམ་རའི་དགོས་མཁོ་དང་བསྟུན་ནས་ལེགས་བསྡུས་ཞིབ་གཉེར་དང་གཞི་ཁྱོན་ཅན། ཐོན་ལས་ཅན་གྱི་བླང་བྱ་གཞིར་བཟུང་ནས་དེང་རབས་ཅན་གྱི་ཁྱད་ལྡན་ཞིང་འབྲོག་ལས་གླིང་ཁུལ་བསྐྲུན་ནས་བོད་ཕག་དང་འབྲི་གཡག། མཐོ་སྒང་གི་ཤིང་ཏོག་དང་སྔོ་ཚལ་སོགས་ཀྱི་ཁྱད་ཆོས་རིན་ཐང་ཡག་པོ་མངོན་དགོས། ལྷོད་གཡེང་སྤུ་ཙམ་མེད་པའི་སྒོ་ནས་དབུལ་པོ་བསྐྱར་དུ་ལོག་པ་འགོག་པའི་འགྱུར་ཚུལ་ལ་ལྟ་ཞིབ་ཚད་ལེན་དང་རོགས་སྐྱོར་ལ་དམ་འཛིན་ཡག་པོ་བྱེད་པ་དང་། འབྲེལ་མཐུད་མ་དངུལ་དོ་དམ་ཡག་པོ་དང་བེད་སྤྱོད་ཡག་པོ་བྱེད་ཅིང་། གྲོང་སྡེའི་ཐོན་ལས་འཕེལ་རྒྱས་ལ་ཇུས་འགོད་ཞིབ་ཚགས། ཁྱད་ལྡན་འདེབས་འཛུགས་གསོ་ཚགས་དང་ཞིང་ལས་ཐོན་རྫས་བཟོ་སྣོན་ཞིབ་ཚགས་བྱས་ཏེ། གྲོང་སྡེའི་ཐུན་མོང་དཔལ་འབྱོར་སྟོབས་ཆེ་རུ་བཏང་ནས་ཞིང་དུད་ཀྱི་འབབ་འཕར་བརྟན་པོ་ཡོང་རྒྱུར་སྐུལ་འདེད་གཏང་དགོས་ཞེས་ནན་གསུང་གནང་བ་རེད།། （བདེ་སྐྱིད་ཀྱིས་བསྒྱུར།）