སྙིང་ལགས།
དུས་ཚོད་ཀྱི་འཆར་ཡན་ངོས་སུ།
མྱོང་མི་ཚར་བའི་ས་སྲོད་བྲིས་ཡོད།
མཚམས་སྤྲིན་གྱི་མེ་ལོང་གསལ་བས།
ཞེ་འདང་གི་འཛུམ་ཆུང་དཀྲོལ་འོང་།
སྙིང་ལགས།
གཙང་པོ་སྙན་པས།
རྨི་ལམ་གཅུན་དགོས་མི་འདུག།
སྨག་གི་གྲིབ་གཟུགས་འཁྱག་སྣང་མི་དགོས།
སྙིང་ལགས།
རྒྱང་རིང་ཁ་གཏད་དུ་འགྲེངས་པའི་དྲན་པ།
མཛེས་སྡུག་གི་ནམ་མཁའ་ཡངས་པོས།
སེམས་དྲོད་ཀྱི་ཉི་འོད་རྔུབ་ཆོག།
སྙིང་ལགས།
རྡུལ་ལ་ཡན་པའི་ཁམས།
འཚོ་བའི་དགའ་སྐྱོ་ནང་གི་ཞེ་
འདང་གི་མཛུབ་དཀྲིས་དམར་པོ།
སྙིང་ལགས།
བེམ་གཟུགས་སུ་འགྲེངས་པའི་རྣམ་ཤེས།
གངས་རིའི་ཕང་བ་རུ་བརྗིད་ཅིང་
རྔམ་པའི་གྲིབ་མ།
སྐྱེ་བ་ཚེ་རབས་སུ་བསགས་པའི་
དྲན་པའི་རྡུལ།
སྙིང་ལགས།
རླུང་དམར་གྱིས་སྤྲིན་པ་གཤགས་རུང་།
འཛུམ་མདངས་ཀྱི་ས་སྲོད་ཁོ་ན་སྙིང་དུ་སྡུག།
སྙིང་ལགས།
ཚོར་བའི་ཁམས་ཀློང་དུ།
འུ་གཉིས་གཞིས་བྱེས་ལྷན་འཛོམས་ཡིན།
༼ གུ་དཔལ་ཤིས། ༽