བར་སྣང་ཁམས་སུ་རྟ་བདུན་དབང་པོ་ཤར།།
བར་བའི་མཚམས་ནས་བྱེ་འུ་ཆུང་ཆུང་ལྡིང་།།
བར་དོ་བ་ཡི་སྙིང་ལ་གློག་དམར་འཚུབ།།
བར་བའི་བསམ་པ་ཤེལ་དཀར་ལྷུན་པོ་ཅན།།
ང་ཡིས་ཆེ་བ་བརྗོད་ན་དེ་ཙམ་ཡིན།།
ང་ཡིས་རོགས་སུ་འབོད་ཀྱང་ཡིད་འཁྲུད་བྱེད།།
ང་དང་ཁྱོད་ཀྱི་ལས་དབང་བཙན་པོ་འདིས།།
ང་རང་གཉིས་ལ་རྨ་ཁའི་ན་ཟུག་བསྐྱེད།།
ང་ཡི་སེམས་སུ་ཁུར་པོ་ལྕི་མོ་བཞག།
ང་དང་ཁྱོད་གཉིས་བར་གྱི་བརྩེ་ཟམ་གཏོར།།
ང་རང་འཁོར་བའི་མི་ཁ་དབྱིངས་སུ་བསྐྱལ།།
ང་ཡིས་གསོན་པོའི་དམྱལ་བ་ལན་གཅིག་མྱོང་།།
དཀོན་མཆོག་གསུམ་པོ་ལས་འདི་བཙན་པ་ལ།།
གསོན་པོའི་ཡུལ་ནས་ཤི་བོས་ལུས་ཤིག་བླངས།།
ཁམས་གསུམ་དུག་མཚོ་འཁྱིལ་བས་གདན་སྟེང་དུ།།
བར་དོ་བ་ངས་ཚ་དམྱལ་ལན་གཅིག་དྲངས།།
༼ དབྱངས་ཞི་བ། ༽