ཡུལ་སྐོར་ལྗོངས་རྒྱུ་བསམས་ནས།།
རི་ལ་དར་ལྕོག་བཙུགས་ཡོད།།
ལྷ་ལ་ལྷ་བསང་ཕུལ་ཡོད།།
སྲིད་པའི་རྟེན་འབྲེལ་འཁོར་ལོས།།
ལམ་ལ་ཤར་ནུབ་འབྱེད་དུས།།
མུ་སྟེགས་རྒྱང་འཕེན་པ་ཡི།།
སྙིང་སྟོབས་སྙིང་ལ་དམར་བ།།
གཙང་འགྲམ་གྲམ་རྡོ་སྔོ་ནག།
བརྩིག་ན་གཞིས་ཁང་བརླག་འགྲོ།།
མ་བརྩིགས་སྙིང་ལ་གཟན་པ།།
ཀྱེ་མ་ཟུང་གི་ལས་སྐལ།།
འདི་ལས་བཟང་ན་སྤྲོ་ཨང་།།
སྣང་བའི་འོད་རླབས་དཀྱིལ་ནས།།
མི་ཚེའི་ལ་མོ་བརྒལ་ཆོག།
སྨུག་པ་ལ་འཐིབ་ལུང་འཐིབ།།
གངས་རིའི་ཞལ་ངོ་བོར་སོང་།།
དབྱར་ཟླ་ལྔ་པའི་ཆར་རླུང་།།
སྟོན་ཁའི་བུ་ཡུག་འཕྲུལ་ནས།།
ཉི་མ་བདེ་དྲོད་རང་འབར།།
གྱེར་ཆུང་སྐྱེས་རི་བརྒལ་ནས།།
རྒྱང་རིང་མུན་པར་རྒོལ་ལོ།།
ཕར་རྒྱབ་ཉི་མའི་གྲོང་ནས།།
ཉི་འོད་ལམ་ལམ་གསེང་ནས།།
དཔྱིད་ཆར་ཟིམ་ཟིམ་འབབ་ཤོག།
ཁྱོད་ཀྱི་ཞམ་འཛུམ་པད་མོར།
གཡུ་ཡི་གཡུང་དྲུང་འཁྲུངས་ན།།
བདག་ཉིད་གངས་ཁྲོད་ལུས་ཀྱང་།།
ཞེ་ནས་བདེ་དྲོད་འབར་ཡོང་།།
འཁོར་བའི་མཚན་སྨག་རྒོད་ཀྱང་།།
རྨི་ལམ་སྟུག་པོའི་ཞིང་དུ།།
དཔྱིད་ཀྱི་དཔལ་མོ་རྒྱས་སྐབས།།
ཁྱོད་རང་ཉི་འོད་ཚུལ་གྱིས།།
བདག་གི་རྩྭ་ཐང་འཚེར་ན།།
ནམ་ལངས་བྱེའུ་སྐད་འགྱུར་བ།།
ང་ཡི་གཤེད་མ་ཡིན་ཆོག།
༼ གཞི་ཚང་ཟླ་བ་གྲགས་པ། ༽