གྱང་རྡུང་བ་ལ་ས་མིག་ཡག་པོ་ཞིག་བདམས་ཚར་ནས། རྒྱུ་ཆ་དང་ལས་མི། ཡོ་བྱད། གྱང་རྡུང་བའི་ལག་རྩལ་བཅས་ཚང་དགོས་ཏེ།
༡ གྱང་བཟོའི་རྒྱུ་ཆ་དང་ཡོ་བྱད།
གྱང་བཟོའི་རྒྱུ་ཆ་ནི། ས་མིག་དང་། རྨང་རྡོ། གྱང་ས། ཆུ། ཀ་གདན།༼ ཕྱག་ཕྲེང་སྐད་དུ་བཀྱགས་གདན་ཟེར།༽ རྡོ་གཡམ། ལྕགས་རྡོ། འདྲེད་རྡོ། ༼ དཀར་པོ་དང་། ནག་པོ། ཁྲ་བོ། དམར་པོ་སོགས་ཡོད།༽ རྡོ་དཀར། རྡོ་ནག། ཨར་ག་ས། ས་དཀར། ས་དམར། ས་ནག་སོགས།
གྱང་བཟོའི་ཡོ་བྱད་ནི་གྱང་པང་དང་། ༼ ཕྱག་ཕྲེང་སྐད་དུ་གྱང་གཞོང་ཟེར།༽ གྱང་ཀ།༼ ཁ་ཤས་ཀྱིས་གྱང་མདུང་ཟེར།༽ གྱང་ཐོ། གྱང་ཐག། གནམ་ཐིག། ཕུར་པ། གཅུ་ཕུར། གཤོལ་རྣག།༼ ལྟག་མ་ལ་འདབས་བཅུམ་ཟེར་བ་དང་ཞབས་མ་ལ་ཁ་བཅུམ་ཟེར།༽ མཆར་རུ། འཇོར། ལྕགས་གཞབ། ཡུར་འཇོར། རྡོ་སྟར། གཟོང་ཐོ། རྐོ་མ། ཁེམ། སླེལ་པོ།༼ ཕྱག་ཕྲེང་སྐད་དུ་སེལ་བོ་ཟེར།༽ འཁྲབ་མ། ཐོ་བ། སྟེའུ། ལྕགས་གཟེར་སོགས།
༢ གྱང་བཟོའི་ལས་མི།
གྱང་མ་བརྡུང་གོང་རྡོའི་རྨང་གཞག་དགོས་པས། རྡོ་རྩིག་གི་ལས་མི་ལ། རྡོ་རྩིག་དགེ་རྒན་གཅིག་དང་རྩིག་གཡོག་བཅུ་ཡས་མས་དགོས། གྱང་བཟོའི་ལས་མི་ནི། གྱང་དཔོན༼ ཕྱག་ཕྲེང་སྐད་དུ་ཨ་མྱེས་གྱང་རྒན་ནམ་གྱང་མཁན་ཟེར།༽ ཞེས་གྱང་རྡུང་བའི་ཇུས་འགོད་འགོ་འཛིན་གཅིག་དང་། དེའི་དགེ་ཕྲུག་གྱང་ཕྲུག་གཅིག་གཉིས་ཙམ། དགེ་སློབ་གཉིས་ལ་གནས་སྐབས་ཀྱི་ཕྱག་རོགས་ཞུ་མི་གྱང་གཡོག་འགའ་ཤས། གྱང་རྡུང་མཁན་གྱང་པ་མང་དུས་ལ་ལྔ་བཅུ་ཡས་མས། འབྲིང་ཙམ་ལ་ཉི་ཤུ་སུམ་ཅུ་ཙམ། ཉུང་དུས་བཅུ་ཡས་མས། ས་ཁུར་མཁན་ས་པའམ་ས་ཁུར་མང་དུས་ལྔ་བཅུ་ཡས་མས། འབྲིང་ཙམ་ལ་ཉི་ཤུ་སུམ་ཅུ་ཙམ། ཉུང་དུས་བཅུ་ཡས་མས། ས་རྐོ་མཁན་གཉིས་གསུམ་ནས་བཅུ་ཡས་མས། ས་འགྱོགས་མཁན་གཉིས་གསུམ་མམ་བཞི་ལྔ་ཙམ། ས་འཆུ་མཁན་ནི་ས་རྐོ་མཁན་ནམ་ས་ཁུར་མཁན་རང་གིས་བཅུས་པའང་ཡོད། （ ཁམས་པའི་འཛུམ་རིས་ནས་དྲངས།）