མཚན་མོ་ཚེས་སོང་།

ཟླ་བ་སྒོར་སྒོར་ཞིག་མཁར་མཐར་འཕགས།

གྲོང་ཁྱེར་གྱི་ཁང་བརྩེགས་གསེབ་ནས།

འོད་ཀྱི་ལམ་ཁར་ཡང་ཡང་ཅེར་བའི།

རྒྱང་སྒྲིབ་མིག་ཟུང་གིས།

ཕར་རྒྱབ་ཀྱི་ལོ་ཟླ་དང་།

ལོ་ཟླའི་ཁྲོད་ཀྱི་གངས་རི་དང་རྩྭ་ཐང་བཤད་བྱུང་།

ཁྱེད་ཀྱིས་བཤད་མྱོང་བའི།

ངས་ཀྱང་དྲན་སྲིད་པའི།

ལོ་ཟླ་དེ་དག།

ལོ་ཟླ་དེ་དག་ནི་འུ་གཉིས་ལ་དབང་བའི་ལོ་ཟླ་ཞིག།

ལོ་ཟླ་ཤིན་ཏུ་མགྱོགས་པས།

རེ་སྒུག་གི་ལོ་ཟླ་ཞིག་ཀྱང་དོན་མེད་དུ་གྱུར།

དེའི་རྗེས་ཀྱི་ལོ་ཟླའི་ནང་ལ།

ངས་ཀྱང་ཁྱེད་རང་ལོ་ཟླར་དབང་བ་གསལ་པོར་རྟོགས།

ལས་དབང་གིས་ལོ་ཟླ་དེ་དག

ཁྱེད་རང་བཤད་པར་དགའ་བའི་ལོ་ཟླ་བཞིན།

ང་ལ་སྟ་གོན་དང་གྲ་སྒྲིག་ཙམ་ཡང་བྱེད་

དབང་མ་བྱིན་པར།

ཤིན་ཏུ་ཆ་ཡོད་ཀྱང་རྒྱུས་མེད་པའི།

ལོ་ཟླ་གསར་ཚེས་ཤིག་གི་རི་མོ་བྲིས།

ལས་ཀྱི་རི་མོ།

ལས་ཀྱི་རི་མོར་ཁྱག་ཁྱོག་ཆེ་བས།

གལ་སྲིད་སྐྱེ་བ་ཕྱི་མ་ཟེར་བ་ཞིག་ཡོད་ན།

ངས་རི་མོ་པ་ཞིག་གི་སྐྱེ་བ་བླངས་ཏེ།

ཡ་ཡོ་ཁྱག་ཁྱོག་མེད་པའི།

དོ་དགོང་གི་ཟླ་བ་བཞིན།

སྨག་རུམ་ཁྲོད་ནས།

མི་སེམས་ལ་འོད་སྣང་བསྩལ་བའི།

རི་མོ་ཞིག་འབྲི་ངེས།

རི་མོའི་ནང་ན།

འུ་གཉི་གའི་ལས་དབང་ཡང་འབྲི་རྒྱུ་བྱུང་ན་ཅི་

འདྲའི་སྐྱིད་ཨང་།

ལོ་ཟླ།

༼ མགོན་ཤུལ་ཕུན་ཚོགས། ༽