ཚའེ་ཆི་དང་ཏིང་ཞུའེ་ཞང་།དེ་བཞིན་འཛམ་གླིང་གི་ས་གནས་ཁག་ནས་ཕེབས་པའི་མགོ་ཁྲིད་པ་དང་སྐུ་མགྲོན་མཛད་སྒོར་ཞུགས་པ།

ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། སློབ་ཆེན་སློབ་མའི་ལུས་རྩལ་འགྲན་ཚོགས་ཀྱི་རྒྱས་འཛོམས་མཉམ་རོལ་དང་ལང་ཚོའི་ལེའུ་གསར་པ་མཉམ་རྩོམ་བྱེད། འཛམ་གླིང་སློབ་ཆེན་སློབ་མའི་དབྱར་དུས་ལུས་རྩལ་འགྲན་ཚོགས་སྐབས31པ་ཚེས28ཉིན་གྱི་དགོང་མོར་སི་ཁྲོན་ཞིང་ཆེན་ཁྲེང་ཏུའུ་གྲོང་ཁྱེར་དུ་གཟབ་རྒྱས་ངང་འགོ་ཚུགས་ཤིང་། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་འགོ་ཚུགས་མཛད་སྒོར་ཕེབས་པར་མ་ཟད་སྐབས་འདིའི་སློབ་ཆེན་སློབ་མའི་ལུས་རྩལ་འགྲན་ཚོགས་འགོ་ཚུགས་པ་ཁྱབ་བསྒྲགས་གནང་། ཚའེ་ཆི་དང་ཏིང་ཞུའེ་ཞང་། དེ་མིན་འཛམ་གླིང་ས་གནས་ཁག་ནས་ཕེབས་པའི་མགོ་ཁྲིད་མི་སྣ་དང་སྐུ་མགྲོན་འགོ་ཚུགས་མཛད་སྒོར་ཞུགས་ཡོད།

ས་སྲོས་སུ་ཏུང་ཨན་མཚེའུ་ལུས་རྩལ་སྤྱི་གླིང་གི་ལུས་རྩལ་ཐང་གཙོ་བོར་གློག་འོད་ཁྲ་ཆིལ་ཆིལ་འཕྲོས་ནས་ངོ་མཚར་རབ་ཏུ་ཆེ། འགོ་ཚུགས་མཛད་སྒོ་མ་འཚོག་གོང་། ཁྲེང་ཏུའུ་ཡི་མཐོ་རིམ་སློབ་ཆེན་སློབ་མས་གསོན་ཤུགས་ཀྱིས་ཁེངས་པའི་རིག་རྩལ་འཁྲབ་སྟོན་བྱས་པས། ཚོགས་ར་ཡོངས་ཀྱི་རྣམ་པ་དེ་བས་འཁྲུག་ཆ་དོད་དུ་ཕྱིན་ཡོད།

ཆུ་ཚོད19དང་སྐར་མ58ཐོག《ཞི་བདེ། ལས་དབང་གཅིག་མཐུན་འདུས་གྲུབ》ཅེས་པའི་རོལ་དབྱངས་ཁྲོད། ཞི་ཅིན་ཕིང་དང་སྐུ་ཟླ་ཕེང་ལི་ཡོན་གྱིས་རྒྱལ་སྤྱིའི་སློབ་ཆེན་སློབ་མའི་ལུས་རྩལ་མཉམ་འབྲེལ་ལྷན་ཚོགས་ཀྱི་ལས་ཚབ་ཀྲུའུ་ཞི་ཨའེ་ཏེ་སོགས་དང་ལྷན་དུ་ཀྲུའུ་ཞི་སྟེགས་བུའི་ཐོག་ཕེབས་ནས། ལྟད་མོ་བར་ཕྱག་གཡུག་གནང་ནས་གུས་འདུད་ཞུས། སྐབས་དེར་ཚོགས་ར་ཡོངས་སུ་སྤྲོ་སེམས་འཁོལ་བའི་ཐལ་མོའི་རྡེབ་སྒྲ་ཡུན་རིང་གྲགས།

འགྲན་རའི་དབུས་སུ་ཀྲུང་གོའི་རིག་གནས་ཤུལ་བཞག་གི་མཚོན་རྟགས“ཉི་མའི་ལྷ་བྱ”འཁོར་སྐྱོད་བྱས་པ་དང་བསྟུན་གསེར་འོད་བཅུ་གཉིས་ཆེམ་ཆེམ་དུ་འཕྲོས་ཡོང་། ཚོན་ཁྲ་ཅན་གྱི་ཤོག་སྦག་གིས་བར་སྣང་དུ་ལྡོག་རྩིས་གྲངས་ཀ་མངོན་པ་དང་ཚོགས་ར་ཡོངས་ཀྱི་ལྟད་མོ་བས་གྲངས་ཀའི་འགྱུར་ལྡོག་དང་བསྟུན་ནས་སྐད་གསེང་མཐོན་པོས་འབོད་ཅིང་། དགའ་འབོད་ཀྱི་སྒྲའི་ཁྲོད་མཚར་སྡུག་བཀྲ་བའི་མེ་ཏོག་མཚན་མོའི་སྐར་ཚོགས་སུ་བཞད་པ་དང་། ཁྲེང་ཏུའུ་སློབ་ཆེན་སློབ་མའི་ལུས་རྩལ་འགྲན་ཚོགས་ཀྱི་འགོ་ཚུགས་མཛད་སྒོ་དངོས་སུ་འགོ་ཚུགས་པ་རེད།

（ པར་ངོས་གཉིས་པར་གཟིགས།）