འདི་ནས་འདས་དོན་ལོ་རྒྱུས་ཚིག་ཅིག་འབྲི།།
ཚིག་གི་གསེང་ལ་བདེན་དོན་ཞབས་རྗེས་འབྲི།།
ཞབས་རྗེས་རེ་རེར་དྲང་མོའི་ཚིག་གིས་འབྲི།།
དེ་ཡི་མིང་ལ་ལོ་ཟླའི་བཞུད་ལམ་ཟེར།།
འདི་ནས་འཁོར་བའི་འགྲོས་ཀྱི་ནད་ཅིག་འབྲི།།
ནད་ཀྱིས་སློང་བའི་སེམས་པ་མཉེལ་བ་འབྲི།།
མཉེལ་དུབ་གསེང་ནས་རང་གཤིས་གསལ་བ་འབྲི།།
དེ་ཡི་མིང་ལ་འཛིན་པའི་འཆིང་རྒྱ་ཟེར།།
འདི་ནས་ཞེན་པ་ཐོགས་པའི་སེམས་ཤིག་འབྲི།།
སེམས་ཀྱིས་སྐྲུན་པའི་ཉོན་མོངས་ལིངས་པ་འབྲི།།
ལིངས་སུ་ཚུད་པའི་ལས་ཀྱི་རྣམ་སྨིན་འབྲི།།
དེ་ཡི་མིང་ལ་སྡུག་གི་འོབས་མཚོ་ཟེར།།
འདི་ནས་ཚོར་བས་སྦྲུམ་པའི་ཚིག་ཅིག་འབྲི།།
ཚིག་གི་གདངས་ལ་དགའ་སྐྱོའི་རི་མོ་འབྲི།།
རི་མོ་རེ་རེས་ཀུན་རྟོག་མཚོན་པར་འབྲི།།
དེ་ཡི་མིང་ལ་ཕལ་བའི་སེམས་བྱུང་ཟེར།།
འདི་ནས་སྨུག་ཆར་ཐོགས་པའི་སྟོན་ཞིག་འབྲི།།
སྟོན་ཁའི་རླུང་བུའི་གྲང་ངད་རྩུབ་པ་འབྲི།།
རྩུབ་པའི་གསེང་ལ་ངར་ཞིག་ཡོད་པར་འབྲི།།
དེ་ཡི་མིང་ལ་དུས་ཀྱི་ཆམ་ནད་ཟེར།།
འདི་ནས་ཡ་མ་བརླ་ཡི་དུས་ཤིག་འབྲི།།
དུས་ཀྱི་རུམ་ན་ཉིན་སྲིབ་མོད་པ་འབྲི།།
ཉིན་སྲིབ་དབར་ནས་བྱང་རླུང་རྒོད་པ་འབྲི།།
དེ་ཡི་མིང་ལ་འཁྱུད་པའི་དུས་རབས་ཟེར།།
འདི་ནས་དགའ་སྡུག་སྐྱེན་པའི་མི་ཞིག་འབྲི།།
མི་སེམས་སྙི་མོ་ཡིན་པའི་དུས་ཤིག་འབྲི།།
དུས་དེར་དུས་ཀྱི་སྐྱོ་སྣང་གཏམས་པ་འབྲི།།
དེ་ཡི་མིང་ལ་སྟོང་གསོབ་དུས་རབས་ཟེར།།
༼ གྱིན་འདའ་བ། ༽