གནག་སྣུམ་སྐྲ་ལོ་བསིལ་འཇམ་རླུང་གིས་སྐྱོད།།
མཛེས་འཛུམ་ཞལ་རས་སོ་ཕྲེང་དུང་ལས་དཀར།།
གོམས་སྟབས་མྱུར་ཁ་ཚ་བའི་འབྲོག་མོ་དེ།།
འཚོ་བའི་གསང་བ་གཏོར་བའི་འགྲུལ་པ་ཡིན།།
ཞོགས་ཀའི་དུས་སུ་ལེ་ལོ་གཉིད་ལས་དཀྲོགས།།
གུང་སེང་ངལ་དུབ་སྣང་བའི་དབྱིངས་སུ་གཏོར།།
ཤ་ཚ་བག་ཡོད་ཅན་གྱི་འབྲོག་ཕྲུག་མ།།
རི་ཆུའི་དྭངས་ཤ་འཚོབ་པའི་བདག་མོ་ཡིན།།
ཚོར་བའི་ཟུར་མིག་རྒྱང་རིང་མགྲོན་ལ་འཕེན།།
ཁོག་རྒྱ་མཛངས་གཤིས་རང་སྡེའི་ཡུལ་ལ་ཆེ།།
སྐྱིད་སྡུག་གདོང་ལེན་སྤོབས་པའི་འབྲོག་མོ་དེ།།
གདོད་མའི་བོད་ཁྱིམ་སྲུང་བའི་ལྷ་མོ་ཡིན།།
རྣམ་རྟོག་འཇའ་རིས་འཁྲིགས་པའི་མི་ཡུལ་ན།།
རང་ཚུགས་ཤོར་བའི་བརྩེ་དུང་སྒྱུ་མ་འཕྲུལ།།
བོད་ཀྱི་བྲོ་བ་བདོག་པའི་འབྲོག་མོ་ཉིད།།
སེམས་ཀྱི་སྒོ་གླེགས་བརྡུང་གི་མགྲོན་པོ་ཡིན།།
༼ གདོན་ཁེར་ལངས། ༽