འབྲོག་པ་ནི།
གནམ་སྔོན་པོ་གུར་ལ་ཕུབ་མཁན་དང་།
སྤང་མེ་ཏོག་གདན་ལ་གཏིང་མཁན།
འབྲོག་པ་ནི།
ས་དོག་མོའི་ཁ་ཞེང་འདོམ་གྱིས་འཇལ་མཁན་དང་།
རི་མཐོན་པོའི་རྩེ་ནས་རླུང་དང་འགྲོགས་མཁན།
འབྲོག་པ་ནི།
སྟོང་ལུག་ལྷས་ལ་བསྐྱིལ་མཁན་དང་།
བརྒྱ་ནོར་ཁ་ལོ་བསྒྱུར་མཁན།
འབྲོག་པ་ནི།
མི་ཚེ་ཕྱུགས་ཟོག་ཁྲོད་འདས་མཁན་དང་།
ལང་ཚོ་སྐྱས་ལམ་བར་ནས་ཟད་མཁན།
དབྱར་དུས་སུ།
ཉིན་མཚན་དབྱེར་མེད་ངང་།
ཆར་པ་ལ་རྒྱུན་ཆད་མེད་ནའང་།
སེམས་པ་བརླན་མ་ཐུབ་པ་དེ་འབྲོག་པ་ཡིན།
ད་དུང་།
རྫ་ལུང་རི་ལུང་ནས།
སྨུག་པ་སྟུག་པོ་ཞིག་འཐིབ་ཀྱང་།
གཏམ་རྒྱུད་དང་ཕྱུགས་ཟོག་མི་བསྐྱུར་མཁན་དེའང་
འབྲོག་པ་ཡིན།
དགུན་དུས་སུ།
ཙག་བསེར་དང་ལྷགས་རླུང་གིས།
ཡོད་ཚད་གྲང་འཁྱག་གིས་བསྡམས་ནའང་།
གྲང་འདར་མེད་པའི་སློག་པ་གྱོན་མཁན་དེ་འབྲོག་
པ་ཡིན།
ད་དུང་།
གངས་ཁ་བ་ཐུ་ལུ་ལུ་བབས་ནས།
རྫ་ལུང་དང་ཐང་གཞོང་དཀར་བོང་བོང་དུ་གྱུར་ཀྱང་།
ནང་སེམས་ནི་དཀར་དྭངས་དྭངས་ཡིན་པ་དེའང་འབྲོག་
པ་ཡིན།
སྟོན་དུས་སུ།
རྩྭ་འགོར་སེར་ཐིགས་ལྷུངས་ནས།
མེ་ཏོག་ཡུན་གྱིས་སྐམ་ནའང་།
ཞུམ་པ་མེད་པའི་སྙིང་སྟོབས་ཤིག་ཡོད་མཁན་དེ་
འབྲོག་པ་ཡིན།
ད་དུང་།
རུ་སྟོད་ལ་སོང་ནས་སྨད་ལ་སོང་མཐར།
ཕྱུགས་ཟོག་ལ་ཤེད་ཤུགས་འཛོམས་པ་ན།
འཛུམ་མདངས་ལས་དྭངས་པའི་འཛུམ་མདངས་མངོན་
མཁན་དེའང་འབྲོག་པ་ཡིན།
དཔྱིད་དུས་སུ།
གངས་དང་ཆབ་རོམ་ཞུས་ནས།
རྩྭ་ཐང་དང་སྤང་ཐང་གི་ས་རྡུལ་དག་དུས།
མཁའ་དབུགས་གཙང་མ་ཞིག་འབྱིན་མཁན་དེ་
འབྲོག་པ་ཡིན།
ད་དུང་།
རྩྭ་སྔོན་དང་མྱུ་གུ་འབུས་ནས།
ཁུ་བྱུག་ལྷང་ལྷང་གྲག་དུས།
འཆར་གཞི་གསར་པ་ཞིག་ལ་དབུ་ཁྱུད་འབྲི་མཁན་
དེའང་འབྲོག་པ་ཡིན།
༼ ཁ་བ་ན་རོ། ༽