མངོན་དུ་མ་གྱུར་པའི་རྨི་ལམ་དེ་དག།
ཡིད་སྨོན་དང་རེ་བའི་ཀློང་ནས།
རེ་ཞིག་བོར་བརླག་ཏུ་གྱུར་སོང་།
དབྱངས་ཀྱི་རྒྱུད་སྐུད་ཞིག་གིས་ལམ་སྣ་དྲངས་བའི་ཁོ་བོར།
སྔ་ལས་ལྷག་པའི་འཛུམ་མདངས་ཤིག་རྒྱས་ཏེ།
སྐྱེ་འཆིའི་བར་གྱི་སྐད་གཅིག་མ་ཁོ་ན་ལ།
བདེ་སྐྱིད་ཀྱི་གནས་ཚང་གཡར།
ངོ་མི་ཤེས་པའི་མགྲོན་པོ་གསར་པ་རེ་རེར།
ལག་འཇུ་དང་བསུ་མ་བྱེད་བཞིན།
འདས་དོན་ལ་ཕྱིར་དྲན་དང་།
མ་འོངས་པ་ལ་འབོད་བརྡ་མི་བྱེད་པ།
དེ་རིང་གཅིག་པུ་གླེང་མོ་བྱས།
ལག་པས་བསྙབས་ས་ཞིག་ཡོད་ནི།
དེ་རིང་གི་ངོ་གདོང་ལས་མི་འདུག།
འཇིག་རྟེན་གྱི་མཛེས་པ་ཡོད་ཚད།
དེ་རིང་ལ་སྨིན་འདུག་པས།
དེ་རིང་གི་ངོ་གདོང་ནི་སྙིང་དུ་སྡུག་པ་ཞིག་གོ།
༼ ལྷ་ཚང་ཚུལ་བསྟན།༽