（བཞི།）སྒྲ་སྙན་ནམ་པི་ཝང་བཟོ་མཁན་གྱི་བརྒྱུད་འཛིན་པ།

འབའ་ཐང་གི་ཞིང་འབྲོག་ས་ཁུལ་གྱི་སྐྱེས་པ་རྒན་དར་གཞོན་གསུམ་ཕལ་ཆེར་གྱིས་སྒྲ་སྙན་བཀྲོལ་ནས་འབའ་གཞས་འཁྲབ་ཤེས་ཀྱི་ཡོད་ལ། སྒྲ་སྙན་བཟོ་ཤེས་མཁན་ཡང་མང་པོ་ཡོད་པ་རེད། ལུང་པ་སོ་སོའི་ཡུལ་སྲོལ་གཤིས་ལུགས་ལྟར་སྒྲ་སྙན་ཡང་ཆེ་ཆུང་སྣ་ཚོགས་དར་ཡོད། སྒྲ་སྙན་གྱི་རྒྱུ་ཆ་དང་བཟོ་རྩལ་གྱི་ཁྱད་པར་ལས་སྒྲ་སྙན་གྱི་སྒྲ་གདངས་ཀྱང་མི་འདྲ་བ་དུ་མ་ཞིག་ཡོད་པ་ནི་བཤད་མི་དགོས་པ་རེད། རྒྱལ་ཁབ་རིམ་པའི་གཟུགས་མེད་རིག་གནས་ཤུལ་བཞག་གི་ཐོག་མའི་གྲས་སུ་ཚུད་པའི་འབའ་གཞས་ཀྱི་ཞིང་ཆེན་རིམ་པའི་གཟུགས་མེད་རིག་གནས་ཤུལ་བཞག་གི་བརྒྱུད་འཛིན་པ་བཀྲ་ཤིས་ནི་འབའ་གཞས་འཁྲབ་ལེན་འཁྲོལ་གསུམ་ལ་མཁས་ཤིང་སྒྲ་སྙན་ཡང་བཟོ་མཁས་པའི་འབའ་ཐང་གི་དམངས་ཁྲོད་སྒྱུ་རྩལ་པ་ཞིག་ཡིན་ལ། ཁོང་ལོ་ན་ཆུང་དུས་ནས་སྒྲ་སྙན་བཟོ་བའི་ལག་རྩལ་སྦྱངས་ཏེ་ད་བར་ལོ་སུམ་ཅུ་ལྷག་སོང་ཡོད་པ་དང་། རིམ་རྩིས་བྱས་ན་སྒྲ་སྙན4000ལྷག་བཟོས་ཡོད་པ་རེད། འབའ་གཞས་འཛིན་སྐྱོང་སྤེལ་གསུམ་ཡག་པོ་བྱ་ཆེད་ཁོང་གིས་རང་ཉིད་ཀྱི་ཁྱིམ་དུ་སྒྲ་སྙན་བཟོ་ཁང་ཞིག་བཙུགས་ཡོད་པ་དང་། དུས་ཚོད་ཀྱི་ཁོམ་པ་དང་བསྟུན་ནས་འབའ་གཞས་དང་སྒྲ་སྙན་བཟོ་པའི་གསོ་སྦྱོང་འཛིན་གྲྭ་ཞིག་ཀྱང་བཙུགས་ནས་ད་སྔའི་བར་འབའ་གཞས་འཁྲབ་ལེན་འཁྲོལ་གསུམ་བྱེད་ཤེས་པ་དང་། སྒྲ་སྙན་ཡང་བཟོ་ཤེས་པའི་ལག་རྩལ་མི་སྣ50ལྷག་གསོ་སྐྱོང་བྱས་ཡོད་པ་རེད། བཀྲ་ཤིས་ཀྱིས་བཅོས་བསྒྱུར་སྒོ་འབྱེད་བྱས་པ་ནས་བཟུང་། མི་རྣམས་ཀྱི་འཚོ་བར་གནམ་ས་བླ་འོག་བསྒྱུར་བ་ལྟ་བུའི་འཕོ་འགྱུར་ཆེན་པོ་བྱུང་ཡོད། བསམ་པའི་རིག་གནས་ཀྱི་དགོས་མཁོ་ཡང་ཉིན་རེ་བཞིན་འགྱུར་བ་བྱུང་དང་འབྱུང་བཞིན་ཡོད། ད་ལྟའི་ལོ་གཞོན་ཚོའི་ནང་དུ་ཕར་བལྟས་ཚོད་ལ་བརྒྱ་ཆ20ཡས་མས་མ་གཏོགས་སྲོལ་རྒྱུན་རིག་གནས་ལ་དགའ་པོ་བྱེད་མཁན་མི་འདུག། འབའ་གཞས་འཛིན་སྐྱོང་སྤེལ་གསུམ་གྱི་ད་ཡོད་གནས་ཚུལ་ལ་བལྟས་ན་དེ་ཙམ་ཡག་པོ་མི་འདུག། མི་ཉུང་ཤས་ཤིག་གི་སྟོབས་ཤུགས་ལ་བརྟེན་དགོས་ན་ཕན་ས་མ་རེད། ངེས་པར་དུ་སྲིད་གཞུང་གིས་བྱ་སྤྱོད་སྤེལ་ཏེ་གཙོ་ཁྲིད་ཀྱི་ནུས་པ་འདོན་དགོས་ཀྱི་འདུག། ཕྲུ་གུའི་དུས་ནས་དམ་འཛིན་ཡག་པོ་བྱ་དགོས་པ་དང་། སློབ་གྲྭ་ཁག་ནས་ཀྱང་དམ་འཛིན་ཡག་པོ་བྱ་དགོས་ས་རེད།