མེས་རྒྱལ་ས་ཆེན་ཡངས་པའི་ཡུལ་ཁམས་སུ།།
སུ་ཡིས་འགྲན་བྲལ་མི་རིགས་ང་དྲུག་ཀུན།།
ཀུན་ཀྱང་ཕན་ཚུན་མཛའ་བའི་བློ་རྩེ་མཐུན།།
མཐུན་སྒྲིལ་ལྕགས་ཀྱི་ལྷུན་པོ་འགྲན་ནུས་གང་།།
དིར་དིར་རྫ་རྔ་འཁྲོལ་བའི་མགྲིན་པ་དེ།།
ལྷུང་ལྷུང་གཙང་ཁྱབ་ཟིལ་མས་རབ་བཀྲུས་ནས།།
མཚར་མཚར་ཀྲུང་གོ་གསར་པའི་འཕེལ་རྒྱས་ལ།།
སྙན་སྙན་ངག་གི་དབྱངས་རྟའི་བསྟོད་གླུ་ལེན།།
རླབས་ཆེན་ཀྲུའུ་ཞི་ཞི་ཅིང་ཕིང་མཆོག་གིས།།
སེམས་ཤུགས་གཅིག་སྒྲིལ་བསྐྱར་དར་ལས་འབུངས་ནས།།
རླབས་ཆེན་ཀྲུང་གོའི་ཁྱད་ཆོས་ལྡན་པ་ཡི།།
སེམས་མཐུན་སྤྱི་ཚོགས་རིང་ལུགས་བསྟོད་རྒྱུར་སྐུལ།།
བཟང་བཟང་སྤྱི་ཚོགས་གསར་པའི་ས་ཆེན་ངོས།།
བདེ་བདེ་འཚོ་བའི་སྣ་བརྒྱའི་པད་མོ་བཞད།།
བདེ་བདེ་མི་རིགས་འཆམ་མཐུན་ཟེའུ་འབྲུ་རྒོད།།
བཟང་བཟང་སུམ་རྩེན་གནས་ཀྱི་དཔལ་ལ་འགྲན།།
རབ་ཡངས་དག་གསལ་ལམ་བཟང་རབ་མཛད་ནས།།
དགོས་འདོད་ལོངས་སྤྱོད་སྟོབས་འབྱོར་ཁྱོན་ཡོངས་རྫོགས།།
གཟི་བརྗིད་ཉི་ཐིག་བསྒྲིབས་ཤིང་དྲིན་གྱིས་འཛིན།།
ཕུལ་བྱུང་དུས་མཐུན་རྒྱུ་ཀུན་ཐུགས་སུ་ཆུད།།
ཐོད་བསགས་བསོད་ནམས་བཟང་པོའི་ལས་འབྲས་ལས།།
ལས་མཐུན་མི་རིགས་བར་གྱི་མཛའ་བརྩེ་ཡང་།།
ཡང་ཡང་དམ་དུ་འཛོམས་པའི་ལེགས་ཚོགས་འདི།།
འདི་ཀོ་ཡུན་ནས་ཡུན་དུ་གནས་གྱུར་ཅིག །
རབ་དཀར་གངས་ལྟར་གཙང་བའི་ས་ཆེན་ངོས།།
རབ་མཛེས་ཕུན་ཚོགས་ལྗོན་པའི་འབྲས་བུ་སྤུངས།།
རབ་མཆོག་གུང་ཁྲན་ཏང་གི་སྲིད་ཇུས་འོག།
རབ་སྐྱིད་ཁྱིམ་གཞིས་བདེ་བའི་དགའ་ཚལ་རྨད།།
རླབས་ཆེན་མེས་རྒྱལ་བསྐལ་བརྒྱར་རྟག་བརྟན་ཤོག།
རླབས་ཆེན་མི་རིགས་མཐུན་སྒྲིལ་ཇེ་ཟབ་ཤོག །
རླབས་ཆེན་ཀྲུང་གོའི་ཕུགས་དོན་ལེགས་གྲུབ་ནས།།
རླབས་ཆེན་བསྐྱར་དར་ལམ་ཆེན་རབ་ཡངས་སྨོན།།
༼ སྣག་ཚ་ནག་པོ། ༽