སྣང་ཁྱབ་སྒྱུ་མའི་ཞིང་གི་ཁང་བརྩེགས་ཀྱི་གྲོང་ན། །
མ་དག་ཉེར་ལེན་ཕུང་པོ་རང་སར་དུ་འཁྱམ་ཞིང་། །
འདིར་སྣང་གཏད་སོ་མེད་པའི་འཇིག་རྟེན་གྱི་ཆོས་ལ། །
བརྟན་མེད་འཁྲུལ་སྣང་རང་ངོས་ནམ་ཞིག་ལ་ཟིན་ནམ། །
ལྷགས་རླུང་ངར་ཁ་བཙན་པོས་ཤུགས་གླུ་དེ་ལེན་ཞིང་། །
ལྕང་མའི་ཡལ་འདབ་རེ་རེ་འགོ་ཐོག་ལ་བབས་ཀྱང་། །
ད་དུང་རྟག་བརྟན་ཞེན་པའི་འཛིན་པ་ཞིག་ཆགས་པ། །
ཞེན་བྲལ་རང་ངོས་ཟིན་པའི་བློ་སེམས་དེར་ནམ་ཞིག །
དེ་རིང་ཁྲོམ་པའི་དཀྱིལ་ནས་དགོད་སྒྲ་དེ་འཐེན་བཞིན། །
སང་ཉིན་གཏད་མེད་ཕུང་པོ་འཇའ་ཚོན་བཞིན་ཡལ་བ། །
ད་དུང་ཞེན་ཆགས་འཛིན་པའི་རང་ལུས་ཀྱི་ཚོགས་འདི། །
བཅོས་མེད་ལྟ་བའི་གནད་ལུགས་ག་དུས་ཤིག་སྐྱེས་སམ། །
རྒོད་པོ་མི་སྡོད་མཁའ་དབྱིངས་ནམ་འཕང་ལ་བསྐྱོད་འགྲོ །
ཁབ་སྐུད་ཞེན་ཆགས་ཙམ་ཡང་འཛིན་པ་དེ་གྲོལ་ནས། །
དེ་རྗེས་རྐང་ལམ་སྙེགས་པའི་གསར་སྐྱེས་ཀྱི་བུ་ལ། །
བདེ་མོའི་ཐང་ཞིག་འབྱོར་བའི་རེ་འདུན་དེ་ནམ་ཞིག །
ཟབ་ཆོས་མན་ངག་ཆོས་ཚུལ་རང་རྒྱུད་ལ་འཐོབ་ཀྱང་། །
རྣ་བ་གོ་ཐོས་གྲངས་མེད་ཉིན་རེ་བཞིན་ཐོས་ཡོད། །
ད་དུང་སྣང་ཚུལ་སྟོང་པའི་རང་བཞིན་དེར་མ་གོམས། །
ཡང་ཡང་འཁོར་བའི་སྒྲིབ་པ་ནམ་ཞིག་ལ་དག་གམ། །
རང་ལུས་གློ་བུར་མི་རྟག་བཙན་ཁ་རུ་ཟིན་ན། །
མང་ཐོས་ཤེས་རབ་སྟོབས་ཀྱི་རེ་ལྟོས་དེ་འཆང་ཞིང་། །
ལས་སྨོན་བསོད་ནམས་ཤིག་གིས་འཚོ་ཐབས་ཤིག་བྱུང་ན། །
འགྱོད་མེད་བག་ཆགས་ཟབ་མོ་འབད་པ་དེར་བསྐྱང་ངེས། །
བསླུ་མེད་སྐྱབས་གནས་རྣམ་གསུམ་རེ་ལྟོས་དེ་བཅངས་ཤིང་། །
ཡང་སྒོས་དྲིན་ཆེན་བླ་མ་གསོལ་བ་རེ་འདེབས་བཞིན། །
དམ་ཚིག་རྡོ་རྗེའི་མདུད་པ་ལྷོད་མེད་དེར་བརྒྱབ་ནས། །
རེ་སྨོན་འབྲས་བཟང་སྐྱེ་བ་ཐེ་ཚོམ་ནི་ཅི་ཞིག །
༼ འབྲི་ཁེར་འགྲོ། ༽