མུ་མཐའ་བྲལ་བའི་རྩྭ་ཐང་ཡངས་མོ་ནས།།
ངས་ནི་ལུག་ཁྱུ་འཚོས་ཤིང་ནོར་ཁྱུ་དེད།།
ལོང་བས་ལོང་བ་ཁྲིད་པས་མགོ་བོ་འཁོར།།
བྱིས་པས་བྱིས་པ་གཉོར་བས་སྐྱེད་ཀྱང་ཆུང་།།
ང་ནི་བགྲང་འཕྲེང་འཛིན་པའི་རིགས་ལམ་པ།།
ཐལ་སྐད་ཐལ་འགྱུར་འགོད་པའི་རྟོག་གེ་བ།།
ཀླད་དོན་གཞུང་དོན་དེད་པས་ཀླད་པ་ན།།
མཆོད་བརྗོད་བཤད་དམ་བཤད་པས་གླལ་ཡང་བྲོ།།
ང་ནི་པད་གདན་ཙོག་པའི་དམ་བཅའ་བ།།
རྒོལ་བར་སུན་འབྱིན་རྗོད་པའི་མཚན་ཉིད་པ།།
མཚན་མཚོན་གཞི་གསུམ་བསྐྱོར་བས་ཁ་མཆུ་གཟེར།།
དགག་སྒྲུབ་སྙིང་པོར་བསྒུགས་པས་དཔྱི་ཡང་ན།།
ཀྱེ་མ་ངས་ནི་འཆད་ར་གྲུ་བཞིའི་དཀྱིལ།།
དགོས་པ་ཡོད་ཡོད་འདྲ་བའི་ཚིག་འཁྲི་དང་།།
སྙིང་པོ་མེད་མེད་འདྲ་བའི་རྟགས་གསལ་ལ།།
སྐོར་བ་ཡང་ཡང་རྒྱག་བཞིན་ལོ་ཟླ་འདས།།
མཆོད་ཁྲིར་བཞེངས་པའི་གཙོ་ལྷ་གསུམ་ལ་ཅེར།།
སྐབས་རེར་འཛུམ་ཞིང་ལན་རེར་དགོད་ཉམས་སྟོན།།
ཞི་རྒྱས་དབང་དྲག་གསུང་ནི་མི་འབྱིན་པར།།
སོ་མེད་རག་གིས་བརྡུངས་བའི་ཕྱག་མཚན་གདེངས།།
ཨ་རུའི་ལྗོན་རྩར་ཉོན་མོངས་ནད་ཀྱིས་ཟིན།།
བཟའ་བཏུང་འཇིངས་སུ་བཀྲེས་སྐོམ་སྡུག་བསྔལ་མྱོང་།།
ཡེ་ཤེས་བྱབས་ཁྲུས་མཛོད་དང་ཡུམ་ཆེན་མ།།
ཤེས་བྱའི་སྦྲང་རྩི་གནོངས་དང་བྱམས་ཆེན་མ།།
གཞུང་བརྒྱའི་དཀའ་གནད་འཆད་པའི་འཐབ་ར་ན།།
བདག་གི་སྨྲ་ལྕེ་ལྐུགས་ཤིང་ལག་ཟུང་ལྡུམ།།
མ་རྟོགས་སྒྲོ་འདོགས་ཆོད་དང་སྨྲ་བའི་སེང་།།
མི་ཤེས་མུན་པ་སོལ་དང་རིག་པའི་ལྷ།།
སྲོད་ཞོགས་གནད་ཚིག་ཟློས་ཀྱང་ཞེར་མ་འཇགས།།
སྔས་འགྲམ་དཔེ་མང་སྤུངས་ཀྱང་ཡིག་ཚོགས་ཙམ།།
མི་བརྗེད་གཟུངས་ཤིག་སྩོལ་དང་མཉམ་མེད་པ།།
པོ་ཏིའི་ཞལ་ཁ་ཕྱེས་དང་སྨན་རི་བ།།
༼ གཞི་ཚང་ཟླ་བ་གྲགས་པ། ༽