དགུན་ལྭ་མྱུར་མོར་ཕུད་མི་རུང་།
དཔྱིད་མགོའི་གནམ་གཤིས་ལ་འགྱུར་ལྡོག་ཧ་ཅང་ཆེ་བས།ལུས་སྟོབས་ཞན་པའི་མི་རྣམས་ལ་མཚོན་ན་ཉམས་སད་ཐེངས་ཤིག་ཡིན་ལ།གློ་བུར་ལྡང་བའི་གྲང་ངར་གྱིས་དབུགས་ལམ་དང་ཀླད་སྙིང་ཁྲག་རྩ་སོགས་ཀྱི་ནད་རིགས་སློང་སྲིད་ལ། ཇེ་སྡུག་ཏུའང་འགྲོ་སྲིད་པས།དུས་ཚིགས་རང་བཞིན་གྱི་ནད་རིགས་སྔོན་འགོག་ཅི་ཐུབ་བྱ་དགོས།
དཔྱིད་མགོ་ཚེས་རྗེས་གནམ་གཤིས་ཇེ་དྲོར་འགྲོ་བ་ལའང་གོ་རིམ་ཞིག་ཡོད་པས། དགུན་ལྭ་ཕུད་པར་བྲེལ་བ་ལངས་མི་རུང་། ལྷག་པར་དུ་བྱིས་པ་དང་རྒན་པ། བུད་མེད་བཅས་དང་གཞན་ད་རུང་དལ་གཤིས་ནད་རིགས་ཡོད་པའི་ནད་པ་རྣམས་ཀྱིས་དྲོད་ཚད་ཏུའུ15ཡན་དུ་བརྟན་འཇགས་མ་ཡོང་བའི་སྔོན་ལ་གྱོན་པ་ཇེ་སྲབ་ཏུ་བཏང་ན་དྲོས་འཁྱག་ཏུ་འགྲོ་སླ་བ་དང་། བུད་མེད་ན་གཞོན་ཁ་ཤས་ཤིག་གནམ་གཤིས་ཇེ་དྲོར་ཡོང་མ་ཐག་སྨད་གཡོག་གོན་རྒྱུར་ཧ་ཅང་དགའ་བས། དེ་ལྟར་བྱས་ན་ཚིགས་མོ་ན་བ་དང་ཟླ་མཚན་འབབ་སྐབས་ན་ཟུག་འབྱུང་བ་སོགས་ཀྱི་ནད་རྟགས་མངོན་སྲིད།
དཔྱིད་ཀར་སྔར་བཞིན་ལྭ་བ་དྲོན་པོ་གྱོན་པ་དང་། དེ་ནས་རིམ་གྱིས་རེ་རེ་བཞིན་ཇེ་སྲབ་ཏུ་གཏང་དགོས། མིའི་ཁོག་སྨད་ཀྱི་ཁྲག་གི་འཁོར་རྒྱུག་དེ་ཁོག་སྟོད་ལས་ཞན་པས།གྲང་ངར་གྱི་གནོད་འཚེ་ཐེབས་སླ་བ་རེད།དེ་བས་ལྭ་བ་ཇེ་སྲབ་ཏུ་གཏོང་སྐབས་སྔོན་ལ་ཁོག་སྟོད་ཇེ་སྲབ་ཏུ་བཏང་རྗེས་རིམ་པ་བཞིན་ཁོག་སྨད་ཇེ་སྲབ་ཏུ་གཏོང་བ་དང་།རྐང་མགོར་ཡང་ལྷམ་དྲོན་པོ་གོན་ཏེ།རྐང་ལག་སོགས་ཕྱི་རུ་ཕུད་མི་རུང་།
ནད་པ་ཁ་ཤས་ཤིག་གིས་གྲང་ངར་ལ་ལྷག་ཏུ་འཛེམ་དགོས་ལ།དྲོན་པོ་བྱ་དགོས་པའི་གནས་ལའང་མི་འདྲ་བ་སྣ་ཚོགས་ཡོད།དཔེར་ན་སྒལ་ཚིགས་གཉན་ཚད་ཅན་གྱིས་མཇིང་བ་དང་རྐེད་པ། སྒལ་ཚིགས་སོགས་དྲོན་པོ་བྱེད་དགོས་པ་དང་།གྲུམ་བུའི་ནད་པར་སྤྱིར་བཏང་གིས་རྐང་ལག་གི་ཚིགས་མོར་ན་ཟུག་འབྱུང་བའི་དབང་གིས་གཙོ་བོ་རྐང་ལག་དྲོན་པོ་བྱ་དགོས།
ཕྱི་རོལ་ཏུ་ལུས་སྦྱོང་བྱེད་སྐབས་ཀྱི“མི་རུང་བ་ལྔ”།
དཔྱིད་མགོ་ཚེས་རྗེས་གནམ་གཤིས་རིམ་གྱིས་ཇེ་དྲོར་སོང་བས།རྒན་པ་ཁ་ཤས་ཤིག་ཕྱི་རོལ་ཏུ་སོང་ནས་ལུས་སྦྱོང་བྱ་རྒྱུར་དགའ་མོད། འོན་ཀྱང་གནམ་གཤིས་དྲོ་གྲང་མི་སྙོམས་པས། རྒན་པ་རྣམས་ཀྱིས་གཤམ་གྱི་གནས་ཚུལ་འདི་དག་ལ་མཉམ་འཇོག་དགོས།
སྔ་མི་རུང་། རྒན་པ་མང་པོ་ཞིག་ལ་ཞོགས་པར་ལུས་སྦྱོང་བྱེད་པའི་གོམས་གཤིས་ཆགས་ཡོད།ཡིན་ནའང་དཔྱིད་ཀའི་ཞོགས་པར་གྲང་ངར་ཆེ་བའི་དབང་གིས་སྙིང་གི་ཁྲག་རྩའི་ནད་རིགས་སློང་སྲིད་པ་དང་། ཁྲག་ཤེད་མཐོ་བ་དང་སྙིང་ནད།གློ་ཡུའི་ཡན་ལག་གི་གཉན་ཚད། གཅིན་སྙི་ཟ་ཁུ་སོགས་ཀྱི་ནད་རིགས་ཡོད་པའི་རྒན་པ་རྣམས་ཀྱིས་ཞོགས་སྦྱོང་བྱས་ན་ཉེན་ཁ་ཆེ།
ལུས་སྦྱོང་བྱེད་ཐེངས་རེར་སྐར་མ40ལས་བརྒལ་མི་རུང་། རྒན་པ་རྣམས་མགྱོགས་བགྲོད་དང་ཆུར་རྐྱལ་བ་སོགས་ཀྱི་འགུལ་སྐྱོད་བྱེད་ཚད་ཧ་ཅང་མཐོ་བའི་ལུས་སྦྱོང་དུ་མི་ཞུགས་པར། འཆམ་འཆམ་དང་དལ་རྒྱུག ཐའེ་ཅི་ཆོན་དང་སྐོར་བྲོ་སོགས་ཀྱི་འགུལ་སྐྱོད་ཚད་ཉུང་བའི་བྱ་འགུལ་དུ་ཞུགས་དགོས།
གནམ་གཤིས་མི་ལེགས་པའི་སྐབས་སུ་ལུས་སྦྱོང་བྱེད་མི་རུང་། ཆར་བ་འབབ་པ་དང་སྨུག་པ་འཐིབས་པའི་སྐབས་སུ་ལུས་སྦྱོང་མི་བྱེད་པ་དང་།སྨུག་པ་འཐིབས་པའི་སྐབས་སུ་མཐོང་ལམ་མི་གསལ་བས་དོན་རྐྱེན་འབྱུང་སླ་ལ།སྨུག་པའི་ཁྲོད་དུ་ད་རུང་སྦགས་བཙོག་དངོས་པོ་དང་ནད་སྲིན་ཡང་མང་པོ་ཡོད། རླུང་གཡུག་པའི་སྐབས་སུ་དྲོད་ཚད་དམའ་བ་དང་ལུས་ཚོར་དྲོད་ཚད་ཡང་དམའ་བས།དལ་གཤིས་ནད་རིགས་ཡོད་པའི་ནད་པས་ལུས་སྦྱོང་བྱེད་སྐབས་མཉམ་འཇོག་དགོས།
ཕྱི་རོལ་ཏུ་ལུས་སྦྱོང་བྱེད་སྐབས་ལྭ་བ་ཇེ་སྲབ་ཏུ་གཏོང་མི་རུང་། ཕྱི་རོལ་ཏུ་ལུས་སྦྱོང་བྱེད་སྐབས་རླུང་མེད་པའི་ཉི་མ་དྲོ་ས་དང་།མཐོང་ལམ་ཡངས་པའི་དབེན་གནས་བཙལ་བ་ལས། རླུང་ཁ་རུ་ལུས་སྦྱོང་མི་བྱེད་པ་དང་། ལུས་སྦྱོང་བྱས་ཏེ་རྔུལ་ཆུ་ཐོན་ནའང་མྱུར་མོར་ལྭ་བ་ཕུད་མི་རུང་།
ལུས་སྦྱོང་བྱས་རྗེས་མྱུར་མོར་ཟ་མ་ཟ་བ་དང་ཁྲུས་བྱེད་མི་རུང་། ལུས་སྦྱོང་བྱས་རྗེས་མྱུར་དུ་ཟ་མ་ཟོས་ན་ཕོ་རྒྱུ་ལ་གནོད་པ་དང་།ཕོ་རྒྱུའི་རྩ་འཁུམ་དང་ཟས་མི་འཇུ་བ་སོགས་ཀྱི་ནད་རྟགས་མངོན་སླ་བས། ཆེས་ཉུང་ནའང་སྐར་མ20ཡི་རྗེས་སུ་ད་གཟོད་ཟས་ལ་རོལ་དགོས། ( མུ་འགོད།)