ནང་སེམས་མཚོན་ཐབས་བྱེད་པའི་ཐ་སྙད་ཀྱི།།
གཙང་པོ་ཡང་ཡང་ང་ཡིས་འཐུང་བའི་མཐར།།
ཡངས་པའི་ནམ་མཁའ་འདི་ཡི་འོག་རོལ་ནས།།
མགྲོན་ཁྱོད་ཉིན་སྲིབས་གང་དུ་ཡོད་མེད་ཤེས།།
དུས་འདི་གནམ་ཟླ་འབྲས་ལྡན་ཚིགས་ལ་སླེབ།།
ལྗང་མདོག་ཡལ་ཞིང་འཛིན་མ་རྒུད་པའི་དུས།།
མགྲིན་སྙན་ཡང་ནི་རྒྱང་རིང་མོན་ཕྱོགས་ཆས།།
གནམ་མཐའི་སྐར་མ་དག་ཀྱང་འདར་ལ་རན།།
རྒྱང་ནས་ཁྱོད་ཀྱི་འཇིག་རྟེན་འཁྱག་ཚུལ་གྱི།།
ཡི་གེའི་རྡུལ་ཚོགས་ཡོངས་སུ་རུག་མཐོང་ན།།
བདག་ནི་ཆུ་འཛིན་དཀར་པོ་ཞིག་རྫུས་ནས།།
སྣ་ཚོགས་ཀུ་རེས་ཞེ་མཁའ་གསོ་བར་མོས།།
མྱུར་མགྱོགས་འཕྲུལ་གྱི་སོར་མོ་ལས་བྱུང་བའི།།
དབྱངས་ཀྱི་གཙང་པོའི་གཞུང་ལ་བཏབ་པའི་ཚིག།
རེ་རེས་ཀྱང་ནི་སེམས་ཀྱི་ནམ་མཁའ་ཡི།།
སྤྲིན་པའི་ཁ་དོག་ཡོངས་སུ་མཐོང་བར་འདུག།
ས་སྲོད་མཚོན་པའི་ཐ་སྙད་སྣ་ཚོགས་ལ།།
ཡོངས་སུ་འདྲིས་པའི་སྲིད་པའི་སྨུག་པ་ཁྱོད།།
དགའ་སྐྱོ་ཚོར་བའི་སྐུད་པ་འཁེལ་བ་ལ།།
བྱང་བའི་སྙན་ངག་མཁན་ཁྱོད་སུ་ཡི་མགྲོན།།
༼ ཁངས་མ། ༽