ཨ་མ་མ་ལོ་རིན་ཆེན་མི་ལུས་གནང་མཁན་ཡིན།།
ཨ་མ་མ་ལོ་བརྩེ་ཆེན་སྙིང་རྗེའི་རང་གཟུགས་ཡིན།།
ཨ་མ་མ་ལོ་བདེ་ཆེན་བསྐྲུན་པའི་གཞི་མ་ཡིན།།
ཨ་མ་མ་ལོ་དོན་ཆེན་སྒྲུབ་པའི་འཇོན་མ་ཡིན།།
ཨ་མ་མ་ལོའི་བརྩེ་བའི་ཕྱག་གིས་ང་རང་སྐྱོང་།།
ཨ་མ་མ་ལོའི་བྱམས་པའི་བློ་ཡིས་ང་རང་གཅེས།།
ཨ་མ་མ་ལོའི་དུང་བའི་སྤྱན་གྱིས་ང་རང་གཟིགས།།
ཨ་མ་མ་ལོའི་དྲིན་དེ་འཇལ་བར་དཀའ་ཚོད་གདའ།།
ཨ་མ་མ་ལོ་དོན་མེད་འགྲམ་ཆུ་ལྡང་མི་སྲིད།།
ཨ་མ་མ་ལོ་ཆོ་མེད་འཆལ་གཏམ་སྨྲ་མི་དགའ།།
ཨ་མ་མ་ལོ་དགོས་མེད་རྣམ་རྟོག་འཚུབ་མི་དཔེ།།
ཨ་མ་མ་ལོ་འདྲ་མེད་བུ་མོའི་རིགས་གཏོགས་མིན།།
ཨ་མ་མ་ལོ་གཡོ་མེད་སྐུ་ཡི་མངའ་བདག་ཡིན།།
ཨ་མ་མ་ལོ་འགག་མེད་གསུང་གི་དབང་ཕྱུག་ཡིན།།
ཨ་མ་མ་ལོ་སྒྲིབ་མེད་ཐུགས་ཀྱི་གཏེར་མཛོད་ཡིན།།
ཨ་མ་མ་ལོ་སྐྱོན་མེད་ལྷ་མོའི་རྣམ་འཕྲུལ་ཡིན།།
ཨ་མ་མ་ལོའི་བློ་ཁོག་ནམ་མཁའི་ཁྱོན་ལྟར་ཡངས།།
ཨ་མ་མ་ལོའི་ཕྱི་ཐག་གཙང་པོའི་རྒྱུན་བཞིན་རིང་།།
ཨ་མ་མ་ལོའི་གཞུང་རྒྱུད་ཉག་ཕྲན་མདའ་ལས་དྲང་།།
ཨ་མ་མ་ལོ་གངས་ཅན་བོད་ཀྱི་མཛངས་མ་ཡིན།།
ཨ་མ་མ་ལོར་གནོད་འཚེ་གདུག་རྩུབ་ཅི་ཡང་མེད།།
ཨ་མ་མ་ལོར་སྦྱོར་ངན་བྱ་སྤྱོད་ཡོངས་དང་བྲལ།།
ཨ་མ་མ་ལོ་མི་མཐུན་བསམ་ངན་ཀུན་གྱིས་དབེན།།
ཨ་མ་མ་མ་ལོ་ཡུམ་གཅིག་རྗེ་བཙུན་སྒྲོལ་མ་ཡིན།།
ཨ་མ་མ་ལོར་འདྲ་མཉམ་ལྟ་བའི་བསམ་བློ་ཡོད།།
ཨ་མ་མ་ལོར་འགྱུར་བ་མེད་པའི་དད་འདུན་ཡོད།།
ཨ་མ་མ་ལོར་རྒྱང་རིང་མཐོང་བའི་མིག་ཟུང་ཡོད།།
ཨ་མ་མ་ལོ་དེང་རབས་བུ་མོའི་མིག་དཔེ་འོས།།
ཨ་མ་མ་ལོ་དཀྱུས་མའི་ཁྱིམ་ནས་འཚར་བ་ཡི།།
ཨ་མ་མ་ལོ་དཀྱུས་མའི་མི་དང་མི་མཚུངས་པར།།
ཨ་མ་མ་ལོ་བཟང་དང་ཡོན་ཏན་ཀུན་བདོག་ཅིང་།།
ཨ་མ་མ་ལོ་བྱམས་དང་བརྩེ་བས་ཕྱུག་ན་ཡང་།།
ཨ་མ་མ་ལོ་རང་ལོ་ང་བརྒྱད་སླེབས་སྐབས་སུ།།
ཨ་མ་མ་ལོ་ལས་འཁྱུར་ངལ་གསོ་རན་སྐབས་སུ།།
ཨ་མ་མ་ལོ་སྐུ་ལུས་སོས་དལ་བཞུགས་མཚམས་སུ།།
ཨ་མ་མ་ལོ་འཇིག་རྟེན་འཁོར་བར་མ་གསོན་ཐལ།།
ཨ་མ་མ་ལོས་སྐྱེ་འཆིའི་གོ་རིམ་བརྒྱུད་སོང་ཐལ།།
ཨ་མ་མ་ལོས་ཕྱི་མའི་འཕྲང་རིམ་བརྒལ་སོང་ཐལ།།
ཨ་མ་མ་ལོས་ཚེ་འདིའི་ཞེན་ཆགས་བཅད་སོང་ཐལ།།
ཨ་མ་མ་ལོས་ངེད་ཅག་ཤུལ་དུ་བསྐྱུར་སོང་ཐལ།།
༼ འཇོ་མདའ་པདྨ། ༽