ཡིད་འོང་སློབ་རའི་སྐྱེད་ཚལ་ཡངས་པོ་རུ།།
ལྔ་ཟུང་རིག་པའི་སྦྲང་རྩི་མངར་མོ་ལ།།
རིག་རྒོད་སློབ་གྲོགས་གཡུ་སྦྲང་བུང་བ་དག །
དུས་བཞི་ངལ་མེད་སྦྱང་བརྩོན་བྱས་ན་ཡང་།།
མདོ་མེད་ང་རང་བྱ་གཞག་ཉག་ཉོག་འགར།།
སེམས་ཉིད་གཡེང་སྟེ་ཡུན་ཐུང་མི་ཚེ་འདི།།
དོན་མེད་ཁུག་སོ་དབུས་ན་ཕྱེད་ཙམ་ཡོལ།།
སྲིད་པའི་ཆོས་ཀུན་བདེན་མེད་བདེན་སྟོང་ཞེས།།
དམ་པའི་རྣམ་ཐར་སྐྱོང་བའི་གཤེས་བཉེན་དག །
ཡང་དང་བསྐྱར་དུ་སློབ་སྟོན་གནང་ན་ཡང་།།
དུག་གསུམ་སྨག་རུམ་སྒྲིབ་པའི་མིག་ལོང་བདག །
བཅོས་མིན་འཁོར་བའི་རང་གཤིས་མཐོང་མ་ནུས།།
བརྟན་མེད་འཁོར་བའི་བདེ་བ་ཕྲ་མོ་ལ།།
ཞེན་བློ་དྲགས་པས་ཐར་བའི་ལམ་སྣེ་བོར།།
ངོ་མཚར་ཤེས་བྱར་བརྩོན་པའི་སྐལ་དམན་ཞིང་།།
དབེན་པའི་རི་སུལ་བརྟེན་པའི་སྙིང་སྟོབས་བྲལ།།
ཕུན་ཚོགས་བསླབ་བྱ་ལེན་པའི་མོས་པ་ཆུང་།།
ངེས་མེད་ཕྱོགས་བཞིར་ཉུལ་བའི་བན་རྒན་བདག །
དབྱར་དགུན་རེས་མོའི་དུས་ཀྱི་བར་གསེང་ནས།།
གོ་མེད་ཚོར་མེད་ཕོ་ལོ་ཉེར་ལྔ་བརྒལ།།
སེམས་ཉིད་ཕངས་ཏེ་སྐབས་རེ་ངུ་ཁ་བྲོ།།
༼ བཙན་བྱོལ་བ། ༽