མཚན་དགུང་ན།
ཆེ་ཆུང་གི་སྐར་མས་གཡོ་ཁྲམ་གྱི་མིག་
བཙུམ་དགོད།
ཆུ་རྐ་ན།
སྔ་རྟིང་གི་ཆུ་མོས་མགྱོགས་དལ་གྱི་
བང་རྩལ་འགྲན།
འོག་གཤམ་ན།
གཡས་གཡོན་གྱི་རྒྱུག་ཆུས་འཁྲུག་
རྩོད་ཀྱི་ཆག་སྒྲ་སྒྲོག།
རྩམ་ཁང་ན།
སྟེང་འོག་གི་རྡོ་ལེབ་འཛིང་རེས་ཀྱིས་
ཐག་སྒྲས་ཁེངས།
གྲོ་སྒྱེའི་ནང་།
དཀར་ནག་གི་འབྲུ་རིགས་ཨུ་ཚུགས་ཀྱི་
ཡང་དོག་རྩོད།
གཟིམ་མལ་ན།
རྒན་གཞོན་གྱི་གཉེར་པས་རྔུར་སྒྲ་ལ་
རྩོད་པ་བསྡུར།
མདོར་ན། རང་འཐག།
གཞན་ཕན་གྱི་ལས་དོན་གཉེར་མཁན་
དེའི་མཐའ་འཁོར་ན་ཞེ་སྡང་དང་
འགྲན་རྩོད་ཀྱིས་ཁེངས་འདུག།
ད་དུང་། རང་འཐག།
ལྷག་བསམ་གྱི་གཞན་དོན་སྒྲུབ་མཁན་
དེར་ཕྲག་དོག་དང་ང་རྒྱལ་
བྱེད་མཁན་གྱིས་ཁྱབ་འདུག།
མ་ཟད། རང་འཐག།
ཁེ་ཕན་དེ་གཞན་ལ་ཕུལ་མཁན་
དེར་རང་དོན་ཐག་གཅོད་ཀྱི་
རང་དག་གི་མིང་ངན་ཡང་
བཏགས་འདུག།
དེ་བས། རང་འཐག།
ཁྱེད་ཀྱི་དྲིན་ལ་བསམ་ཤེས་མེད་
ཅིང་གློག་འཐག་ཁྱེད་ལས་
ཡག་ལུགས་ཀྱང་བརྗོད་
བཞིན་མཆིས།
མདོར་ན། རང་འཐག།
ཉིད་ཀྱི་བཀའ་དྲིན་གཞན་གྱི་མི་ཚོར།
དེས་ན། རང་འཐག།
ཁྱེད་ད་དུང་ཁ་མི་གྲག་དོན་ཅི།
འོ་ན། རང་འཐག།
ཁྱེད་དཀར་ནག་གོ་འཛོལ་གྱི་ཞྭ་
མོ་ནག་པོ་ལ་དགའ་འམ།
ཡང་མིན་ན། རང་འཐག།
ཁྱེད་དྲང་བདེན་མེད་པའི་འཁོར་
བར་ཞེ་ལྡོག་གམ།
ཀྱེ་མ། རང་འཐག་ཡ་རང་འཐག།
ཁྱེད་ཀྱི་ལས་དབང་ལ་ཐེ་ཚོམ་རེ་སྐྱེ་ཡང་སྐྱེ།
ཨེ་མ། རང་འཐག་ཡ་རང་འཐག།
ཁྱེད་ཀྱི་ལྷག་བསམ་ལ་ཡིད་སྨོན་
རེ་འཆོར་ཡང་འཆོར།
ཀྱེ་ཧུད། རང་འཐག་ཡ་རང་འཐག།
འགྱུར་མེད་ཀྱི་ཆོས་ཉིད་སྐྱོ་པོ་ལ་
མནོ་བསམ་རེ་འཁོར་ཡང་འཁོར།
ཨ་ཧོ། རང་འཐག་ཡ་རང་འཐག།
མི་རྟག་རྒྱུད་ལ་འཁྲུངས་པའི་གནང་
སྟངས་ལ་ཧང་རེ་སངས་ཀྱང་སངས།
ཨ་ལས། རང་འཐག།
ཁྱེད་ཀྱི་ཐུགས་སེམས་དང་ལྷག་བསམ་ལ་ང་
ཡིས་གོ་བ་ཏོག་ཙམ་ཞིག་ལོན་སོང་བ་འདྲ།
འོན་ཀྱང་། རང་འཐག།
ཁྱེད་ཀྱི་ཐུགས་སེམས་དང་ལྷག་བསམ་
ལ་ང་ཡིས་སྙིང་པོ་ཏིལ་ཙམ་ཡང་
རྟོགས་མེད་པ་འདྲ།
གང་ལྟར། རང་འཐག།
ཁྱེད་ནི་རྒྱུ་འབྲས་དང་རྣམ་སྨིན་ལ་
ཡིད་ཆེས་ཀྱང་གནང་བཞིན་
པའི་བདེན་པའི་རྒྱབ་ལངས་ཀྱང་རེད།
ཡིན་ཡང་། ཀྱེ་ཀྱེ། རང་འཐག།
ཁྱེད་སྔར་བཞིན་རང་འཐག་
བྱེད་འདོད་དམ།
ཁྱེད་སྔར་བཞིན་རང་འཐག་དེ་ཡིན་ནམ།
མ་ཟད། ཀྱེ་ཀྱེ། རང་འཐག།
ཁྱེད་མུ་མཐུད་དེ་རང་འཐག་
བྱ་སྲིད་དམ།
ཁྱེད་མུ་མཐུད་དེ་རང་འཐག་
དེ་ཡིན་ནམ།
ཧེ་ཧེ། མ་གསང་དྲང་པོ་
ཞུས་ན། རང་འཐག།
དྲང་བདེན་དང་བདེན་དོན་ལ་
དམིགས་བཞིན་པའི་ང་།
ཁྱེད་ལ་ཅི་འདྲའི་སྨོན་ཨང་།
ཅི་སྟེ། རང་འཐག།
ལོ་རྒྱུས་ཀྱི་སྲུབ་ཁ་ན་ཞིབ་འཇུག་
པས་སྣང་འཇོག་མེད་པས།
ཁྱེད་ཀྱི་དམིགས་འདུན་ལ་བཀག་
རྒྱ་དང་རྙོག་དྲ་བཟོ་མཁན་མེད།
ཡིན་ཡང་། རང་འཐག།
ཁྱེད་ལ་ལོ་རྒྱུས་ལྡན་ཞིང་ཉམས་
མྱོང་གིས་ཕྱུག།
ངོ་མ། རང་འཐག། ངས་ཁྱེད་ལ་ཡི་
རངས་ཞུ།
ཅི་སྟེ། མི་སེར་ལ་དགོས་ངེས་དང་
མཁོ་ངེས་ཀྱི་ཉམས་ཆུང་གི་ཞབས་
ཞུ་མཁན།
མ་ཟད། རང་འཐག།
གནའ་བོའི་བཞིན་རས་དང་
ཆགས་འཇིག་ངོ་མ་གཟིགས་
མྱོང་བའི་དུས་རབས་ཀྱི་ཤན་འབྱེད་པ།
ཨེ་མ། ཨ་ཧོ། རང་འཐག།
སོ་ནམ་པའི་མགོན་སྐྱབས་ཅི་འདྲའི་
བསོད་ནམས་ཆེ་བ་ཞིག་ཨང་།
ཨ་མ་མ་མ། རང་འཐག།
རང་ཐག། རང་དག།
རང་བརྟགས།
ཧ་ཧ། མ་དྲང་རྫུན་ཞིག་
ཞུས་ན། རང་འཐག།
འཁྱོག་བརྗོད་དང་ཆེ་བསྟོད་ལ་
དགའ་བའི་ངས་ཁྱེད་ཅི་འདྲའི་
ཡ་ང་བར་སྣང་ཨང་།
ཅི་སྟེ། རང་འཐག།
ལོ་རབས་ཀྱི་རྨ་ཁ་ན་དཔྱད་ཞིབ་
པས་དོ་སྣང་མེད་རྐྱེན་རོ་སྙིགས་
སུ་འགྱུར་བཞིན་མཆིས་ཨང་།
ཡིན་ཡང་། རང་འཐག།
ཁྱེད་ལ་དུས་ཚིགས་དང་བྱུང་
རབས་མང་ཡང་བགྲེས་སོང་
ནད་པ་ཞིག།
ངོ་མ། རང་འཐག། ངས་ཁྱེད་ལ་
ཐུ་ལུད་འདེབས།
ཅི་སྟེ། མི་དམངས་ལ་དགོས་
མེད་དང་མཁོ་མེད་ཀྱི་སྡར་
མ་ཡི་དཔའ་མེད་མཁན།
མ་ཟད། རང་འཐག།
སྔ་མོའི་བཞིན་རས་དང་ཆགས་
འཇིག་དྲང་པོར་གཟིགས་
ཀྱང་བརྗོད་མི་ནུས་པའི་ལོ་
རབས་ཀྱི་ངོ་ལོག་པ།
ཀྱེ་མ། ཀྱེ་ཧུད། རང་འཐག།
སོ་ནམ་པའི་ཞབས་འདྲེན་ཅི་
འདྲའི་ལས་བསོད་ཆུང་བ་ཞིག་ཨང་།
ཨ་མ་མ་མ། རང་འཐག།
རང་ཐག། རང་དག།
རང་བརྟགས།
ཧ་རོ། རང་འཐག།
ཁྱེད་ཡང་སྙིང་སྤྲུལ་པའི་བླ་
ཆེན་ཡིན་ནམ།
རང་འཐག་ཡ་རང་འཐག།
གཞན་དག་ཡ་གཞན་དག།
རང་ཐག་ཡ་རང་ཐག།
གཞན་བརྟག་ཡ་གཞན་བརྟག།
ཡང་ན། རང་འཐག།
ཁྱེད་ཡང་སྙིང་སྡར་མའི་རྒྱུད་
འཛིན་པ་ཡིན།
གཞན་འཐག་ཡ་གཞན་འཐག།
རང་དག་ཡ་རང་དག།
གཞན་ཐག་ཡ་གཞན་ཐག།
རང་བརྟག་ཡ་རང་བརྟག།
རང་འཐག།
ཐེ་ཚོམ་ཨང་སོམ་ཉི།
རང་འཐག།
དྲི་བ་ཨང་ལྡོག་དྲི།
རང་འཐག །
རང་འཐག་ཨང་རང་འཐག།
༼ བཙན་རྒོད།༽