དཔྱིད་ཀ་ཚེས་ན་བསམ་བྱུང་།
ཀ།
ལྷད་མེད་པའི་ན་བུན་ཐར་ཐོར།
རླུང་འཇམ་བུ་ཞིག་གིས་ཁུར་ཏེ།
ཕ་ཡུལ་གྱི་རི་ལ་ཆས་བཞིན་འདུག།
ཕ་ཡུལ་གྱི་སྤང་ལྗོངས་ལ་ཆས་བཞིན་འདུག།
དེ་ཡི་མིང་ལ་དཔྱིད་ཀ་ཟེར།
ཁ།
ནགས་ཚལ་དང་རི་རབ་ཀྱི་གསེབ་ན།
ལྗང་སྨྱུག་གསར་པ་དག་ག་ལེར་འབུས།
དེ་ཡི་མིང་ལ་སོས་ཀའི་འོད་ཟེར་དུ་འབོད།
ག
དགུན་ནམ་རིང་མོ་ཞིག་བསྐྱལ་རྗེས།
དྲོད་ལམ་ལམ་གྱི་དཔྱིད་ཀ་ཚེས་པ་ཡིན།
ང་།
ལོ་ངོ་གང་མང་ལ་དཔྱིད་ཀ་ཡོད་སྲིད།
ང་ལ་དབང་བའི་དཔྱིད་ཀ་ཚེས་ན་བསམ།
ཅ།
བཞུད་སྔ་བའི་ནང་མི་ཞིག་དྲན།
དཔྱིད་ཀ་མཐོང་མ་ཐུབ་པའི་ནང་མི།
ཡང་ན། དཔྱིད་ཀ་འབྲི་མ་མྱོང་བའི་ནང་མི།
དྲན་གྱིན། དྲན་གྱིན། སྙིང་ཤ་ཡམ་ཡོམ་
དུ་འདར་བྱུང་།
ཆ།
རླུང་བསིལ་བསིལ།
ཆར་ཤག་ཤག
རྒྱང་རིང་ནས་ཉེ་བར་བཅར།
དཔྱིད་ཀྱི་དཔལ་མོ་ཕེབས་བྱུང་།
སྒྲ་དབྱངས་ཤིག་ཀྱང་དཀྲོལ་དགོས།
ཇ།
སྨིན་དྲུག་ཁྲ་མོ་ཤར་ནས་ནུབ་ཏུ་རྒྱུ།
སྐར་མ་ཨ་བརྟན་བྱང་ནས་བྱང་ན་རྒྱུ།
དཔྱིད་ཀའི་ཆར་ཟིམ་ཡང་ནས་ཡང་དུ་འབབ།
སྔོ་སྨན་གྱི་དྲི་ཞིམ་འབྲོག་ཐང་ཀུན་ལ་ཁྱབ།
དེ་ནི་དཔྱིད་ཀ་ཚེས་སྟངས་ཤིག་རེད་ཅེས་བཤད།
ཉ།
“སྡུག་བསྔལ་མ་ལུས་བདག་བདེ་འདོད་
ལས་བྱུང་།།”
ཚིག་རྐང་འདི་ལ་འགྲེལ་བཤད་ཅིག་དགོས་
པ་འདྲ།
དཔྱིད་ཀ་ནི་སྡུག་བསྔལ་ཞིག་ཡིན་ལ།
དཔྱིད་ཀ་ནི་བདེ་བ་ཞིག་ཀྱང་ཡིན།
དཔྱིད་ཀ་ནི་བདག་ཉིད་ཡིན་ལ།
དཔྱིད་ཀ་ནི་གཞན་དག་ཀྱང་ཡིན།
གདོང་འབག་ཁྲི་ཕྲག་གི་རྒྱབ་ན་དཔྱིད་ཀ་ཡོད།
ཏ།
སྐྱེ་བོ་གང་མང་ཞིག་རླུང་ལ་དགའ།
སྤོབས་པ་ཆེན་པོས་རླུང་ལ་དགའ་ཟེར་མི་ཕོད།
ལྷག་པར་དཔྱིད་ཀའི་རླུང་ལ་དགའ་ཟེར་མི་ཕོད།
རྒྱུ་མཚན་ནི་འདྲི་རྟགས་ཤིག་ཡིན།
ཐ།
དཔྱིད་ཀ་ལ་མི་དགའ་མཁན་ཏེ་སུ།
དཔྱིད་ཀའི་རླུང་ལ་མི་དགའ་མཁན་ཏེ་སུ།
ད།
ཚེ་རབས་འདིའི་སྡུག་བསྔལ་ཡོད་ཚད་ཀྱང་།
དཔྱིད་ཀའི་སྐྱ་རེངས་དང་འབྲེལ་བ་དམ་ཟབ་ཡོད།
ན།
དཔྱིད་ཀ་ནི་ན་བུན་ལྟ་བུའི་ལག་ཟུང་ཡིན།
མིག་ཆུ་སྤར་མོ་གང་གི་རོགས་འདེགས་ཡིན།
པ།
གོམ་འགྲོས་ཇེ་དལ་དུ་སོང་ཟིན།
ཁོར་ཡུག་ཀྱང་འཁྱག་པར་གྱུར།
དཔྱིད་ཀའི་རྨི་ལམ་དག་ཀྱང་གང་ལ་ཆས།
ཡོད་ཚད་ཀྱང་གློག་བརྙན་འཁྲབ་གཞུང་
དང་འདྲ།
གོ་རིམ་ཙམ་ཡོད་པ་ལས། དངོས་ཡོད་ལར་
ནས་མིན།
ཕ།
མཚན་གྱི་ཁོ་ཧྥེ་ཁང་གི་སྐར་མ་དག།
རོལ་དབྱངས་སྐྱ་བོ་ཞིག་དང་འདྲ།
ངག་མི་འཁྲོལ་བའི་བརྡ་ཆད་དག།
རྐང་མཐིལ་ནས་ཀླད་པའི་སྐྲ་རྩེ་ལ་རྒྱུ།
ནམ་མཁའ་གཡའ་ཇི་ལྟར་དག་ཀྱང་།
སྤྲིན་དཀར་གྱི་རྒྱུ་བ་མེད་ན།
སེམས་ནི་དཔྱིད་འགོ་མ་ཚེས་པ་ཞིག།
བ།
དབུགས་རྩ་དག་ཧལ་ཧལ་གྱིས།
སྨུག་སྤྲིན་དུམ་བུ་རེ་ལ་སྤྲུལ།
རླུང་འཇགས་ཟིན་ཀྱང་།
སྐད་ཆའི་སྣེ་མོ་དག་ཡལ་ཐབས་མི་འདུག།
སྐྱེ་འཆི་དང་ཉི་ནུབ་ཡོད་ཚད་ཀྱང་།
དཔྱིད་འགོའི་སྐར་མ་དག་དང་།
འབྲེལ་བ་དམ་ཟབ་ཡོད།
མ།
གླག་རྒོད་འཕུར་རན་སོང་།
དཔྱིད་ཀྱི་རྒྱལ་མོ་ཕེབས་རན་སོང་།
གར་འགྲོ་མི་ཤེས་པའི་རྣམ་ཤེས་དག་ལ།
གཞིས་མལ་ཞིག་ཀྱང་བཟོ་རན་འདུག་སོང་།
ཙ།
གལ་ཏེ། གལ་ཏེ།
འཆི་ཁའི་ཁ་ཆེམས་ཀྱང་།
ཡིག་ནག་ཏུ་བྲིས་ཟིན་ཚེས།
འཕག་འཚག་རྒྱག་མཁན་མེད་ལ།
མིག་ཆུའི་ཆར་པ་འབབ་མཁན་ཡང་མེད།
ཚ།
གལ་ཏེ། གལ་ཏེ།
འཆི་ཁ་མའི་ཞེ་སྡང་དང་ང་རྒྱལ།
དབུགས་ཁམ་གང་ཡན་ཆོད་ཀྱང་།
རྙི་ནང་རི་དྭགས་བཞིན།
གཟེབ་ནང་གི་བྱིའུ་བཞིན།
རབ་རིབ་མག་མོག་ཏུ་གྱུར་རྗེས།
ཛ།
གལ་ཏེ། གལ་ཏེ།
ལྡེབས་རིས་ངོས་ཀྱི་རི་མོ་ཡོད་ཚད།
ང་གཅིག་པུ་ལ་དབང་ཆོག་གམ།
གངས་ཐང་གི་ཉི་ཟླ་ཡོད་ཚད་ཀྱང་།
ང་གཅིག་པུ་ལ་དབང་ཆོག་གམ།
ཁང་པའི་ཀླད་དུ་གློག་འཁྱུགས་སོང།
དྲན་པ་བརྗེད་མེད་འདི་གང་ལ་ཆས།
ཝ།
གལ་ཏེ། གལ་ཏེ།
ང་ཚོས་སྐད་ཤུགས་ཆེན་པོས།
གླུ་དབྱངས་ལེན་ཆོག་གམ།
གལ་ཏེ། གལ་ཏེ།
དཔྱིད་ཀ་དྲན་པའི།
གླུ་དབྱངས་ཤིག།
ངག་འདར་འདར་དུ་ལེན་ཆོག་གམ།
རྟོག་བཏགས་ཀྱི་འཁྲབ་གཞུང་ཞིག།
བདག་གི་དཔྱིད་ཀར་དགོས་མཁོ་གང་ཡང་མེད།
ཞ།
རྨི་ལམ་དུ་དགེ་ཆོས་རྨིས་མི་འདུག།
རྨི་ལམ་དུ་ལུང་ཤར་བ་རྨིས་མི་འདུག།
རྨི་ལམ་དུ་དཔྱིད་ཀ་རྨིས་འདུག།
དཔྱིད་ཀ་གསར་དུ་ཚེས་པ་རྨིས་འདུག།
ཟ།
བསྐལ་བ་དུ་མའི་རིང་ལ།
ཉི་མ་ཤར་མྱོང་ལ།
མུན་པས་གནག་མྱོང་བའི་ཡུལ་གྲུ་འདི་ལ།
དཔྱིད་ཀ་ཡང་ཡང་ཚེས་ན་བསམ་བྱུང་།
འ།
སྦས་ཡུལ་གྱི་དག་ཞིང་འདི་ལ།
རྨི་ལམ་དུ་ཡང་ཡང་འཁོར་བའི།
དཔྱིད་ཀ་ཞེས་པའི་རྣམ་པ་གསར་པ།
བསྐལ་བའི་ཉི་མ་ལགས་ཚེས་ན་བསམ།
ལྷད་མེད་ཀྱི་བསྡུས་གཟུགས་ཤར་ན་འདོད།
ཡ།
ལོ་འཁོར་གྲངས་མེད།
ལོ་གཅིག་ཟླ་བ་བཅུ་གཉིས།
ཉིན་ཞག་སུམ་བརྒྱ་དྲུག་ཅུ།
དུས་ཚོད་ཉི་ཤུ་རྩ་བཞི།
སྐར་མ་གཅིག་སྟོང་བཞི་བརྒྱར།
དྲན་པའི་སྣེ་མོ་ལྕགས་ཁབ་ལེན་བཞིན།
དཔྱིད་ཀ་ཞེས་པའི་ན་ཚོད་བསུ་ན་འདོད།
ར།
ལོ་ཞིག་གི་དབྱར་ཁ་ཚེས་ན།
ངས་ཟིན་དེབ་ཏུ་དཔྱིད་ཀ་མ་ཚེས་པ་འབྲི་སྲིད།
དཔྱིད་ཀ་མ་ཚེས་པའི་སྔ་རོལ་འབྲི་སྲིད།
རི་རབ་གང་མང་དང་ཆུ་བོ་དུ་མ་འབྲི་སྲིད།
སྲུབས་ཀ་རེ་རེ་དང་གས་བར་རེ་རེ་ནས་
འབྲི་སྲིད།
མགྲིན་པ་ཉག་ཕྲ་བ་དང་སྐེད་པ་ཆད་ལ་ཁད་
དེ་དག་འབྲི་སྲིད།
གཅིག་མ་ཆད་གཉིས་མ་ལྷག་ཏེ་ཆ་ཚང་
ཞིག་འབྲི་སྲིད།
ལ།
ངས་ལག་པ་བསྲིངས་ན་འདོད།
སྒྲུང་ནང་གི་མི་བཞིན་ལག་པ་བསྲིངས་ན་འདོད།
གཅེས་སུ་འོས་པའི་མི་བཞིན་ལག་པ་བསྲིངས་
ན་འདོད།
གཉིད་ལྕོག་རྒྱག་པའི་བྱིས་པ་བཞིན་ལག་
པ་བསྲིངས་ན་འདོད།
མཐོན་པོའི་སྒང་གི་གངས་རི་བཞིན་ལག་པ་
རིང་དུ་བསྲིངས་ན་འདོད།
ཤ
སྒྱུ་འཕྲུལ་གང་གི་འདུས་མདོ་ནས།
རྡོ་བའི་བྲག་སྟེང་དུ་བཞད་པའི་མེ་ཏོག་ལགས།
དཔྱིད་ཀའི་མདངས་རིས་དང་བཞིན་རས་
ཡིན་ནམ།
ང་དཔྱིད་ཀ་ལ་འཁྲེང་དོན་ཡང་དེ་ཡིན་ལ།
ང་དཔྱིད་ཀ་ལ་ཞེན་ཆགས་བླ་མེད་ཡོད་དོན་
ཡང་དེ་ཡིན།
ས།
གྲིབ་མ་ལགས་ལྗང་ཁུ་གང་ལ་ཆས།
འཆི་བདག་ལགས་ནག་པོ་གང་ལ་ཆས།
དུས་མཐའི་རྨི་ལམ་ལགས་གང་ལ་ཆས།
དཔྱིད་འགོའི་མལ་ཁྲི་ལ་རེ་བ་བག་ཙམ་ཡོད།
ཧ།
རེག་མི་ཐུབ་པའི་ངའི་ཚོར་བ་ཡོད་ཚད།
མྱོང་མི་ཐུབ་པའི་ངའི་རེ་བ་ཡོད་ཚད།
དཔྱིད་ཀ་ལ་ཕུལ་ཟིན།
ཨ།
འབྲེལ་བ་མེད་པའི་ངའི་སྟོང་འདང་སྣ་ཚོགས།
འཐོབ་བྱ་མེད་པའི་ངའི་ཕུགས་བསམ་ཡོད་ཚད།
དཔྱིད་ཀ་ནས་ཆས་སོ།།
ཨི།
རྡོ་གཅལ་སྟེང་ལ་རྩྭ་རྐང་ཞིག་འཁྲུངས་སྲིད་དམ།
ཨུ།
རྡོ་མཁར་གྲུ་བཞིའི་ནང་ལ་མེ་ཏོག་པདྨ་
བཞད་སྲིད་དམ།
ཨེ།
རྟབ་རྟབ་པོར་དཀར་པོ་ཆིག་ཐུབ་འཐུང་
ཐུབ་བམ།
ཨོ།
ཐ་གུ་སྣེ་རིང་ཞིག་ལ་ཟླ་བ་ཉ་གང་བ་
ཞིག་བཏགས་སྲིད་དམ།
༼ ཧུན • དུར་རོ། ༽