དཔྱིད་ཀྱི་རྒྱལ་མོ་ཁ་བའི་ལྗོངས་སུ་འཕོས། །
རང་བྱུང་སྐྱེ་དངོས་གསོན་ཤུགས་རྒྱས་ཏེ་འབུས། །
སྣང་བའི་རི་མོ་མི་རྟག་འཚུབ་ཆ་ལེར། །
འཁྱུག་ཙམ་བྱས་ཏེ་མིག་ལམ་ཡལ་ནས་འགྲོ། །
གསེར་ལྡན་སྒེག་མོ་རབ་དཀར་རྡུལ་གྱིས་གཡོགས། །
ཡིད་འོང་ལོ་འདབ་སྨྱུ་གུ་འབུས་འགོ་བརྩམས། །
བྱ་དང་བྱེའུའི་མགྲིན་པའི་སྒྲ་དབྱངས་ལས། །
ལྗང་མདོག་ལྡན་པའི་དུས་ཤིག་རེ་སྒུག་བྱས། །
མིག་ཟུང་རྒྱང་ལ་ཕྱོགས་པའི་རབ་བྱུང་གིས། །
ཀྱག་ཀྱོག་ཆེ་བའི་མདུན་གྱི་ལམ་བུ་བརྒལ། །
རེ་བ་དང་བཅས་ཨམ་གཙིགས་སྡོམ་བཞིན་དུ། །
མི་ཡི་མི་ཚེ་རིན་ཐང་འཚོལ་བཞིན་མཆིས། །
དུས་ཀྱི་རང་མདངས་གློ་བུར་མིག་ནང་ལྷུང་། །
ལོ་ཟླའི་འགྲོས་ནི་རྟ་ཕོ་ལས་ཀྱང་མགྱོགས། །
འདས་སོང་བྱེ་མའི་ཐང་གི་རྐང་རྗེས་ནི། །
སྒྱུ་མའི་བ་གླང་ཆུ་ཁར་འདེད་དང་མཚུངས། །
འཚོ་བའི་རི་མོ་ཕྱི་གསལ་ནང་གསལ་ཏེ། །
དཔེ་མང་ཚལ་ནས་མི་ཚེ་སྙིང་པོ་འཚོལ། །
གཞན་གྱི་བདེ་སྡུག་ངག་ལ་འགུགས་བཞིན་དུ། །
ལམ་གྱི་མེ་ཏོག་འཐུ་བཞིན་འཐུ་བཞིན་འགྲོ། །
ཐོད་པའི་རི་མོ་གང་དུ་རྒྱུག་མིན་དང་། །
ཚེ་ཡི་སྐུད་པ་ནམ་ཆད་མི་རྟོགས་ཀྱང་། །
ཐག་ཐག་འགུལ་བའི་དུས་ཀྱི་སྒྲར་ཉན་ནས། །
ཞི་བ་ཆེན་པོ་ངང་ལ་རྟག་ཏུ་འབད། །
༼ རི་སྤྱང་། ༽
ཆར་སྤྲིན།
དེ་དགོང་གི་ཆར་ཟིམ།
ཚེ་སྲོག་གི་ཆེས་གཉོམ་ས་རུ་འབབ།།
ཤིན་ཏུ་རྒྱུས་མེད་ཀྱི་ངོ་གདོང་མང་པོ
སྲང་ལམ་གྱི་བཞི་མདོ་ནས་རླུང་བུ་དང་།
ལྷན་དུ་གང་སར་རྒྱུ།
ཆར་ཟིམ།
འདི་ནི་དཔྱིད་འགོའི་མེ་ཏོག་ཐོག་མ་སྟེ།
ང་ཡི་སྙིང་ཉེའི་ཕྱོགས་སུ་བབས་ན་བསམ།
བབས་ཏེ་ཁྱེད་ཀྱིས་མྱོང་རྒྱུ་བྱུང་ན་བསམ།
མྱོང་བའི་སྙིང་གཏམ་ཆར་སྤྲིན་དེ་ག་ལ་
བསྐུར་ནས་སླར་ཡང་འདི་གར་འཇོ་ན་བསམ།
༼ ཕུན་ཚོགས་བཀྲ་ཤིས། ༽
དཔྱིད་
ཀ།
གནམ་སྔོན་པོའི་གཡའ་དག་ཀྱང་།
ཉི་མ་ད་དུང་མ་ཤར།
སྙིང་མཆོང་རི་སྨུག་པོའི་དབུ་རྩེར།
སྔར་བཞིན་མུན་པ་ནག་སྟུག་གེར་འཁྲིགས།
ས་དོག་མོའི་མཐིལ་དྲོས་ཀྱང་།
མྱུ་གུས་ས་གཞི་ད་དུང་མ་བརྟོལ།
ཁུ་སིམ་པའི་ཁེར་རྐྱང་གི་འཁྱག་རི།
སྔར་བཞིན་ཀྲོང་ངེར་འགྱིང་།
ཆར་བསིལ་མས་གཏིང་སེར་བསླངས་ཀྱང་།
མེ་ཏོག་ད་དུང་མ་བཞད།
རེ་ཞིང་བསྒུགས་པའི་ནེའུ་གསིང་དུ།
སྔར་བཞིན་དགུན་ཁ་གཞན་ཞིག་ཚེས།
སྙིང་ཉེ།
དཔྱིད་ཀ་བསླེབས་ཀྱང་།
དཔྱིད་དཔལ་སླར་བཞིན་ཚེས་མ་བྱུང་།
༼ གཞི་ཚང་ཟླ་བ་གྲགས་པ། ༽