དཀར་དམར་མདངས་ཀྱིས་མཛེས་པའི།།
ཡིད་འོང་ཁམ་བུའི་མེ་ཏོག།
བཅུ་དྲུག་ལང་ཚོས་ཕྱུག་པའི།།
བུ་མོའི་ཞལ་རས་འདྲ་བྱུང་།།
མཛེས་སྡུག་ཁམ་བུའི་སྡོང་པོའི།།
ཡལ་གའི་ཡལ་ག་འཁྱུད་དུས།།
ན་ཆུང་ལུས་ཕྲ་འཁྱུད་པའི།།
ངང་ཚུལ་དེ་ཡང་དྲན་བྱུང་།།
འདབ་མ་ཆར་ཟིལ་ཁྲོམ་མེར།།
ཁམ་བུའི་མེ་ཏོག་བཞད་དུས།།
ལང་ཚོའི་གཟི་དཔལ་རྒྱས་པའི།།
མི་མོ་ཡིད་ལ་ལྷུང་བྱུང་།།
འཇམ་མཉེན་འདབ་མ་རེ་རེ།།
འཛུམ་པའི་ཚུལ་གྱིས་གད་དུས།།
མིག་ཟུང་རི་དྭགས་འདྲོག་འདྲའི།།
ན་ཆུང་བུ་མོ་དྲན་བྱུང་།།
ཁམ་བུའི་མེ་ཏོག་བཞད་ནས།།
དྲི་བསུང་གང་སར་ཁྱབ་དུས།།
ལྷན་སྐྱེས་དྲི་བཟང་ལྡན་པའི།།
སྐེད་མེད་མ་དེ་དྲན་བྱུང་།།
༼ རྡོ་རྗེ་ཐར་ལམ། ༽