དཔྱིད་རླུང་བསིལ་མོ་དལ་བུ་ལྡང་འགོ་བརྩམས།།
གངས་ངོགས་ཁ་བའི་མཐུག་ཚད་ཇེ་སྲབ་འགྱུར།།
སྡོང་འགོར་གཡུ་ཡི་ལྕུག་ཕྲན་རྒྱན་སྤུད་པའི།།
ཚུགས་ཀ་མཐོང་དུས་བདག་སེམས་ཕ་ཡུལ་ཕྱོགས།།
གངས་ཆུ་སྔོན་མོའི་འགྱུར་ཁུག་ཇེ་དྲག་ལྷན།།
བྱ་བྱིའུ་དགའ་བའི་ཉམས་འགྱུར་གཤོག་རྩལ་ངོམས།།
རྩྭ་གསེབ་ལྗང་སྔོན་གསང་བའི་འཛུམ་སྟོན་པའི།།
ཚུགས་ཀ་མཐོང་དུས་བདག་སེམས་ཕ་ཡུལ་ཕྱོགས།།
མཚེ་འུ་འཁྱག་རོམ་གོས་ཆེན་ཐོལ་གྱིས་ཕུད།།
རླུང་གིས་བསྒུལ་བའི་ཆུ་གཉེར་ལང་ལོང་བར།།
ངང་ངུར་ཁྱུ་ཚོགས་རྩེད་འཇོ་ལ་གཡེང་བའི།།
ཚུགས་ཀ་མཐོང་དུས་བདག་སེམས་ཕ་ཡུལ་ཕྱོགས།།
སེར་ཆེན་མེ་ཏོག་རུམ་ཁ་ལྷོད་པོར་གྲོལ།།
ཆར་ཟིལ་མུ་ཏིག་དོ་ཤལ་བྲང་ལ་དཔྱངས།།
རྐང་དྲུག་མ་བུ་དལ་མེད་འདུ་ལྷོང་གི།།
ཚུགས་ཀ་མཐོང་དུས་བདག་སེམས་ཕ་ཡུལ་ཕྱོགས།།
ཉམས་དགའི་དུས་ཀྱི་འགྱུར་བག་རེ་རེ་ལ།།
འཁྲེན་ཧྲེང་ལྕི་བའི་འཁྱམས་པོ་ང་རང་གི།།
ལུས་ཀྱི་ལྷུ་ལག་རྒྱང་དུ་གནས་མོད་ཀྱང་།།
སེམས་ཀྱི་སྲབ་ཁ་ཡང་ཡང་ཕ་ཡུལ་ཕྱོགས།།
༼ གསོན་འདྲེ། ༽