ངས། རྟོག་འཆར་གྱི་སྒེའུ་སྔུན་དུ།
ཁྱོད་ཀྱིས། སྙན་ངག་གི་ཁྱེའུ་བརྒྱ་ཕྲག་ཁྲིད་དེ།
ཟབ་བརྗིད་ཀྱིས་ཁེངས་པའི་ང་ཡི་ལྷིང་འཇགས་དེའི།
ཉིན་སྲིབ་གང་ཞིག་ལས་ཐོན་ཡོང་བར་སྒུག་ཡོད།
ངས། རྣམ་ཤེས་ཀྱི་གས་ཆག་གསེབ་ནས།
ཁྱོད་ཀྱིས། སྙན་ངག་གི་ཟོག་ཁྱུ་རུག་རུག་བྱས་ཏེ།
ཁ་བ་དལ་གྱིས་འབབ་སའི་ང་ཚོའི་ཕ་ཡུལ་དེའི།
རྩྭ་ཐང་དུ་གང་ཞིག་མངོན་ཡོང་བར་སྒུག་ཡོད།
གཞས་ཆུང་མ། སེམས་པ་དང་སྙན་ངག་གའུ་ཁ་སྦྱོར་
དུ་གྱུར་པའི།
ང་ཡི་རྣམ་ཤེས་སུ་ཁྱོད་ཀྱི་སྙན་ངག་གི་ཆར་ཆུ་མེད་པས།
རྟོག་འཆར་གྱི་མེ་ཏོག་སྐམ་ཞིང་ལོ་མ་འཐོར་བར་གྱུར།
གཟུགས་མི་མངོན་པའི་བུ་རམ་དང་འདྲ་བའི།
ཁྱོད་ཀྱིས་བྲིས་པའི་སྙན་ངག་དག་གིས།
ང་ཡི་ནང་སེམས་སུ།
ཡུལ་གྱར་བྱུང་བའི་ལུ་གུས་ལྡོག་ལམ་རྙེད།
ཆར་ནང་དུ་ལམ་ནོར་ཐེབས་པའི་མིས་ལྡོག་ལམ་རྙེད།
འུར་ཟིང་གིས་བསུབས་པའི་ལྷིང་འཇགས་ཀྱི་
ལྡོག་ལམ་རྙེད།
བོར་ནས་ཡུན་རིང་འགོར་བའི་གཞས་ཆུང་མ།
ནད་མེད་པའི་མཆིན་ལར་གསོ་བཅོས་བྱེད་པའི་
ཡུལ་ལུང་འདིར།
སྒོར་མོའི་སྐྱག་དོང་དུ་ལྷུང་བའི་མི་ཚོས།
རྣམ་ཤེས་ཕྱིར་འཚོང་བགྱིད་ཀྱིན་འདུག།
མེས་པོ་ཚོས། ཤེས་རབ་ཀྱི་བྲག་ལས་གཏེར་དུ་བླངས་པའི།
རིག་གནས་དག། བཤམ་སྟོན་ཁང་དུ་སྐྱེལ་བཞིན་འདུག།
དེ་བས། སེམས་པ་སྔར་ནས་ཤི་ཚར་བ་ང་ཡིས།
རང་ཉིད་ཁེན་སའི།
སྙན་ངག་གི་གྱང་ཆག་ཅིག་ལས།
ཁྱོད་ཀྱི་སྙན་ངག་འདོན་པར་སྒུག་ཡོད།
དགུན་ཁའང་དྲོ་བར་བྱེད་པའི།
ཁྱོད་ཀྱི་སྙན་ངག་འདོན་པ་སྒུག་ཡོད།
གཞས་ཆུང་མ།
༼ ཐོར་བུ། ༽