国内统一刊号:CN51-0018-Z 中共甘孜州委机关报·甘孜日报社出版凝聚正能量·传播好声音






དཔྱིད་དུས་སུ་བ་གླང་དང་ར་ལུག་ལ་སྦོས་ནད་ཕོག་སླ་བའི་རྒྱུ་མཚན་ཅི་ཡིན།

ང་ཚོ་མི་ལ་ཆ་མཚོན་ན་གལ་ཏེ་བཟའ་བཏུང་འཚམ་པོ་མ་བྱུང་བའམ་བཟའ་བཏུང་གང་བྱུང་མ་བྱུང་བྱེད་ཚེ་ཕོ་བ་ན་བ་རེད། དེ་བཞིན་བ་གླང་དང་ར་ལུག་གིས་ཀྱང་མེ་ཏོག་བཞད་གྲབས་ཡོད་པའི་རྩྭ་མུའུ་ཞུས་དང་། སྲན་རིགས་ཀྱི་ཡལ་ག་དང་ལོ་མ་གསར་པ། རུལ་སུངས་སུ་གྱུར་པའི་རྩ་བ་དང་ཚལ་རིགས། སྦང་མ། སྤུངས་ནས་ཡུན་རིང་སོང་བའི་སྔོ་རྩྭ་སོགས་ཟ་ཐེངས་གཅིག་ལ་མང་པོ་བཟས་ན་ཕོ་བ་ན་བ་རེད། སྦོས་ནད་ནི་ཕོ་ནད་བྱེ་བྲག་ཅིག་རེད།

འོ་ན་དཔྱིད་དུས་སུ་བ་གླང་དང་ར་ལུག་སོགས་ལ་ནད་དེ་རིགས་ཕོག་སླ་བའི་རྒྱུ་མཚན་ཅི་ཡིན་ཞེ་ན། དཔྱིད་ཀ་ནི་རྩྭ་རིགས་སྐྱེ་འཕེལ་གྱི་དུས་ཚིགས་ཡིན་ཞིང་རྩྭ་སོ་མ་ཡིན་ལ་ཆུ་མང་བས་མི་ཚད་སྤྲི་དཀར་གྱི་རིགས་ཀྱང་མང་། བ་གླང་དང་ར་ལུག་གིས་དགུན་ཁ་གཅིག་གི་རིང་ལ་རྩྭ་སྔོ་བཟའ་རྒྱུ་མ་རག་པས་ཟ་ཚོད་མ་ཐིག་པར་བརྟེན། རྩྭ་སྔོ་སྲོག་ཆགས་ཀྱི་ཕོ་བར་མ་འཇུ་བར་མྱུར་དུ་འཕེལ་ཏེ་རླངས་པ་མང་པོ་ཐོན་ནས་ཕྱིར་འབུད་མ་ཐུབ་པ་གང་ནས་སྦོས་ཡོང་གི་ཡོད།

བ་གླང་དང་ར་ལུག་ལ་ནད་དེ་ཕོག་རྗེས་གལ་ཏེ་དུས་ཐོག་ཏུ་སྐྱོབ་བཅོས་མ་བྱས་ན་ལྡད་བཅའ་མཚམས་ཆད་པ་དང་། དབུགས་གཏོང་དཀའ་བ། ཁྲག་རྒྱུན་འཁོར་རྒྱུག་བྱེད་པར་འགལ་རྐྱེན་ཚབས་ཆེན་བྱུང་སྟེ། ཁ་ནས་སྦུ་བ་དོན་ནས་མགྱོགས་པ་ཤི་འགྲོ་བ་རེད།

བ་གླ་དང་ར་ལུག་ལ་ནད་དེ་རིགས་མི་ཕོག་པ་འགོག་ཆེད། དཔྱིད་ཀ་ཤར་གྲབས་ཡོད་དུས་གཟན་ཆག་རིམ་བཞིན་མང་དུབཏང་སྟེ་བ་གླང་དང་ར་ལུག་གི་ཕོ་བའི་འཕྲོད་ཤུགས་རིམ་པས་ཆེ་རུ་གཏང་དགོས། དཔྱིད་ཀར་ཕྱུགས་ཟོག་འཚོ་སྐབས་ཟ་ཐེངས་གཅིག་ལ་རྩྭ་སྔོ་མང་པོ་ཟ་མི་བཅུག་པར་ཚོད་འཛིན་ཏོག་ཙམ་བྱ་དགོས། ཞོགས་པ་ཟིལ་ཆུ་མ་ཡལ་གོང་བ་གླང་དང་ར་ལུག་འཚོ་རྒྱུའང་མེད། དེ་འདྲ་བྱས་ན་ནད་མི་ཕོག་པ་སྔོན་འགོག་བྱེད་ཐུབ་བ་རེད།།

( རྩོམ་སྒྲིག་པས་བསྡུས།)