ལོ་དང་ཟླ་བ་འདས་ཀྱང་བརྗེད་ཐབས་མེད་པས།།
སེམས་གཏམ་ཡིད་ཀྱི་སྙན་པ་ལན་གཅིག་གཡོར་དང་།།
བརྩེ་གླུ་མུ་ཏིག་ཟིལ་མས་མགུལ་རྒྱན་བསླས་ཏེ།།
མདང་སུམ་རྨི་ལམ་ནང་ནས་ཚོར་བ་གླེང་ཡོང་།།
འཁོར་འདས་སྟོང་བའི་དབྱིངས་ལ་སེམས་པ་མ་གཡེང་།།
དགུན་གསུམ་གཙག་རླུང་ཁྲོད་ནས་ཁྱོད་རང་བསྒུགས་ཡོད།།
ང་ཡི་ཨ་ཇོ་སེམས་པའི་གཏིང་ལ་བྲིས་ཡོད།།
སྤྲིན་དཀར་བླ་བྲེ་འཁྱིལ་བའི་ཞིང་གྲོང་དེ་ནས།།
མཛེས་སྡུག་ལང་ཚོའི་ཕྱོར་སོ་ཡག་པར་ལྟ་དུས།།
གཡོ་འཁྲུལ་ཐབས་ལ་བྲེལ་བའི་སྣང་ཚུལ་མཐོང་ཡང་།།
ཚེ་སྔོན་བག་ཆགས་ཟབ་མོའི་བསྐོས་ཐེངས་ཤིག་གིས།།
མ་སྒྲིག་རང་དབང་མེད་པར་བསླུས་པ་མིན་ནམ།།
བརྩེ་བ་མ་བཅོས་སེམས་ཀྱི་གསེབ་ཏུ་སྦས་དང་།།
དུང་བའི་དྲན་ཤིང་འཇོལ་མོའི་ལྡིར་སྐོར་རྒྱག་ཡོང་།།
སྙན་ཆང་ཟླ་བའི་མགུར་ལ་མགྲིན་པ་གཡོར་དང་།།
ངག་རིག་དབྱངས་ཀྱི་སྟེགས་བུ་སླར་ཡང་བསྐྲུན་ཆོག །
༼ ཁམས་ཟླ་སྲས། ༽