དཔྱིད་རླུང་འཇམ་པོ་གནམ་སའི་བར་དུ་ལྡང་།།
གསར་སྐྱེས་ལྗོན་པའི་མགོ་ལྕོག་ལྡེམ་ལྡེམ་གཡོ།།
འདབ་ཆགས་ཡོངས་ཀྱིས་ཀྱུར་ཀྱུར་སྐད་ཅོར་སྨྲ།།
ཤིན་ཏུ་སྐྱིད་པའི་ཚུལ་གྱིས་ནམ་མཁར་འཕུར།།
རི་ཚོགས་སྒང་གཤོང་སྨུག་སྤྲིན་ཡོལ་བ་འཐེན།།
རི་སྐྱེས་སྣ་ཚོགས་བག་ཡངས་རྩེད་འཇོར་རོལ།།
ཤག་ཤག་དྭངས་གཙང་ཆུ་བོ་དལ་གྱིས་བཞུར།།
ཆུ་ནང་གསེར་མིག་ཉ་ཚོགས་ལྷོད་ཀྱིས་འཁྱུག།
ས་གཞི་སྒེག་མོའི་བྲང་གཞུང་ཆར་གྱིས་བརླན།།
ལྗང་མདོག་ས་གཞིའི་ཕང་ནས་མེ་ཏོག་བཞད།།
རྐང་དྲུག་བུང་བའི་ཁྱུ་ཡིས་དགྱེས་མགུར་ལེན།།
རྩེན་འདོད་ཡིད་ཀྱི་མདའ་མོ་སྤང་གཞུང་སིམ།།
འཁོར་བའི་མི་ཡི་སེམས་པ་དགའ་བས་ཁེངས།།
ལྷོད་ཆགས་ཞི་བའི་ཉམས་སྣང་སྣ་ཚོགས་འཆར།།
༼ འཇོ་མདའ་པདྨ། ༽