བློ་ཡི་རྩྭ་ཐང་ཡངས་པོ་རུ།།
ཤེས་རིག་མྱུ་གུ་རྒྱས་པ་དང་།།
ལུས་ཀྱི་པད་གསར་གཞོན་ནུ་རྣམས།།
ལང་ཚོའི་མེ་ཏོག་མཛེས་བར་ཤོག།
སྣང་བའི་ནམ་མཁའ་ཡངས་པོ་རུ།།
ཡོན་ཏན་ཉི་ཟླ་ཚེས་པ་དང་།།
ལུས་ཀྱི་ལང་ཚོའི་འཁྲི་ཤིང་ལ།།
བདེ་ཐང་ཡལ་འདབ་རྒྱས་པར་ཤོག།
སེམས་པ་གངས་རི་དཀར་པོ་ལ།།
ལེགས་ཚོགས་དབུ་འཕང་མཐོ་བ་དང་།།
སྐུ་ལུས་དཔག་བསམ་ལྗོན་པ་ལ།།
ཤེས་རིག་འདབ་ལོ་རྒྱས་པར་ཤོག།
སེམས་གཤིས་དྭངས་གསལ་ཆུ་བོ་ལ།།
གཡོ་ལྷད་ནག་ནོག་མི་ཡོང་ཤོག།
ལང་ཚོ་མེ་ཏོག་པད་མ་ལ།།
སད་སེར་བར་ཆད་མེད་པར་ཤོག།
ས་སྟེང་ན་ཆུང་བྱིས་པ་དག།
བསམ་དོན་ཀུན་འགྲུབ་སྨོན་པ་དང་།།
ཁྱེད་ཅག་མ་འོངས་འཚོ་བའི་ཁྲོད།།
ཤེས་རིག་འོད་སྟོང་འབར་བར་ཤོག།
༼ རྡོ་རྗེ་ཐར་ལམ། ༽