ཀ་ཁ་ག་ངའི་དབྱངས་རྟ། །
ང་དང་སློབ་གྲོགས་ཚང་མས། །
རྟག་ཏུ་ངག་ལ་གྱེར་བའི། །
དབྱངས་རྟ་སྙན་ཤོས་དེ་ཡིན། །
དབྱངས་རྟ་སྙན་མོ་དེ་ནི། །
སྔོན་བྱོན་མེས་པོ་དུ་མས། །
དཀའ་ངལ་ཁྱད་བསད་བྱས་ཏེ། །
གསར་དུ་བཏོད་པའི་དབྱངས་རེད། །
དབྱངས་དེ་དང་པོ་དཀྲོལ་མཁན། །
དགེ་བའི་བཤེས་གཉེན་ཡིན་རེད། །
བཤེས་གཉེན་དམ་པ་མེད་ན། །
དབྱངས་ཀྱི་འགྲོས་ཀྱང་མི་ཤེས། །
ང་ཡི་སློབ་གྲོགས་ལྷན་རྒྱས། །
བཤེས་གཉེན་བཟང་པོའི་དྲུང་དུ། །
ཀ་ཁའི་དབྱངས་རྟ་སྙན་མོའི། །
འགྱུར་ཁུགས་མཉན་པར་ཆས་འགྲོ། །
ང་ཡི་བརྩེ་བའི་སློབ་གྲོགས། །
ཁྱེད་རང་ཐུགས་ཁྲལ་མི་དགོས། །
བཤེས་གཉེན་དྲུང་དུ་འབྱོར་ན། །
ཡོད་ཚད་ག་ལེར་རྟོགས་འོང་། །
ལག་ཟུང་དམ་པོར་འཁྱུད་ནས། །
མ་འོངས་རྒྱང་གླུ་ལེན་བཞིན། །
ང་ནི་སློབ་གྲོགས་ཚོ་དང་། །
རྒྱལ་ཁམས་བསྐོར་ནས་འགྲོ་འདོད།།
བསམས་ནས་བསྡད་ན་མི་ཡོང་། །
བསྒོམས་ནས་བསྡད་ན་ཅི་འགྲུབ། །
འབད་པས་ལམ་བུ་གཤགས་ཏེ། །
ང་ཚོ་ལྷན་དུ་ཆས་འགྲོ། །
༼ ཨོ་ཏོག་བསྟན་ཉི། ༽