ངལ་བ་ལ་བརྟེན་དཔྱིད་ཀྱི་ཕོ་ཉའི་ཚོགས།།
འོངས་པར་གྱུར་ཅིང་མགྲིན་སྙན་འཁྲོལ་བ་དེས།།
ལེགས་པར་བསུས་པའི་ཆར་འབབ་དུས་སྟོན་ནི།།
རྒྱ་མཚོ་གོས་སུ་རྒྱན་གྱིས་བཀླུབས་པ་མཛེས།།
ལང་ལོང་འཕྱུར་བའི་ཆུ་ཁུར་ནོར་འཛིན་མའི།།
བཞིན་རས་ལ་ཆགས་གླང་ཆེན་འགྲོས་ཀྱི་གདོང་།།
གཉིས་སུ་མེད་ཅེས་ཁོ་བོས་ཞེ་གཏིང་ནས།།
འཕྱང་མོ་ཉུག་བཞིན་དེ་ལྟར་སྨྲ་བར་འདོད།།
རྐང་འཐུང་ཚོགས་ནི་ཕྲེང་བ་ཚར་དུ་དངར།།
དེ་ཡི་འདབ་དབུས་འདབ་ཆགས་སྙན་པའི་གླུ།།
ཐོས་འཛིན་རྣ་བས་བཅུད་དུ་ལེན་པའི་ཚེ།།
ཡིད་ཀྱི་དབང་པོ་བརྗོད་མེད་བདེ་བས་མྱོས།།
བི་ཤྭ་ཀརྨའི་རྩལ་གྱིས་བྲིས་འདྲ་བའི།།
ཡལ་གའི་རྩེར་གནས་ཤིན་ཏུ་མངར་བའི་འབྲས།།
ཁམ་བུ་ལ་ནི་ལོངས་སུ་སྤྱོད་པའི་ཚེ།།
ཨེ་མ་ལུས་ཀྱི་སྟོབས་ཤུགས་སྔར་ལས་རྒྱས།།
དཔྱིད་ཀྱི་དུས་ནི་མཐོ་རིས་གཉིས་པ་ཞེས།།
དམ་པ་མང་པོའི་མགྲིན་པས་གཟེངས་སུ་བསྟོད།།
དེ་ཚེ་བདག་ཀྱང་ལྷ་ཡུལ་གཉིས་པ་རུ།།
ཡོད་སྙམ་ང་རྒྱལ་རང་དབང་མེད་པར་འཕེལ།།
༼ དུ་སྤྲིན། ༽