སོང་སོང་རྡོག་པའི་མཐིལ་གྱིས་མི་ནོན་པའི།།
འདི་སྣང་འཁོར་བའི་འགྲུལ་བཞུད་ཤིན་ཏུ་རིང་།།
བསམ་བསམ་སེམས་ཀྱི་ཐོག་ཏུ་མི་ཁེལ་བའི།།
མི་ཚེའི་ཤུལ་ལམ་འདི་ཡང་ཤིན་ཏུ་རིང་།།
བྱས་བྱས་བྱས་པའི་གཏིང་མཐའ་མི་ཆོད་པའི།།
སྨིག་རྒྱུའི་འཇིག་རྟེན་འདི་ཀོ་རབ་ཏུ་མཚར།།
མཚར་མཚར་སྣང་བརྙན་རི་མོ་བཀྲ་བ་ཡི།།
འབྱམས་ཀླས་སེམས་པ་འདི་ཡང་རབ་ཏུ་མཚར།།
ཇི་ལྟར་བཙལ་ཀྱང་རྙེད་པ་དཀའ་བ་ཡི།།
སྣ་ཚོགས་སྣ་མང་ཆོས་ལ་མི་སྤྲོ་འོ།།
ལྷོད་ཆགས་སེམས་ཀྱི་བདེ་སྐྱིད་འཇོམས་པ་ཡི།།
འདུ་འཛིའི་འཚོ་བ་འདི་ཡང་མི་སྤྲོ་འོ།།
མི་རྟག་སྐྱེ་འཆིའི་རླུང་གིས་སྒུལ་བ་ཡི།།
མི་ལུས་ཐོ་ཡོར་ལྟ་བུར་མི་སྐྱིད་དོ།།
ཆགས་སྡང་གངས་ཆར་འདྲེས་མས་བརླན་པ་ཡི།།
བཙུན་གཟུགས་ཕལ་པ་འདི་ཡང་མི་སྐྱིད་དོ།།
ཚེ་སྟོད་སྐྱིད་ཀྱི་དགོད་སྒྲས་ཁེངས་པ་ཡི།།
ལྷན་འཛོམས་དུས་ཀྱི་དགའ་སྟོན་མ་ངེས་སོ།།
ཚེ་སྨད་སྡུག་གི་སྨྲེང་བས་མནར་བ་ཡི།།
ལས་ཀྱི་གྱེས་བྲལ་འདི་ཡང་མ་ངེས་སོ།།
ཆུ་ཟླའི་གཟུགས་ལ་རི་མོ་བྲིས་པ་འདྲའི།།
ཕར་བལྟས་སྣང་བའི་ཆོས་ཀུན་མི་རྟག་གོ།
ཟིན་མེད་ཆར་རྗེས་འཇའ་དང་མཚུངས་པ་ཡི།།
དྲན་འཕྲུལ་བློ་གཤོག་འདི་ཡང་མི་རྟག་གོ།
༼ འཇོ་མདའ་པདྨ། ༽