གཉའ་བར་བཏེགས་ནས་འོངས་པའི་
བཙན་པོ་དང་མཉམ་དུ།
ཕོ་བྲང་གང་དེའི་ཐོག་ཁ་ན།
ཟླ་བ་ལ་ཅེར་ཏེ་ཡོད།
ཁྱོད་ཀྱིས་གནང་བའི་གསང་གཏམ་སེམས་
ལ་མིད་ཀྱིན།
ལྷིང་འཇགས་པའི་རྩེད་ཐང་གི་མཚན་མོ་འདིར།
གྲོང་མི་ཚོའི་རྨི་ལམ་ཐལ་རྡུལ་དུ་རླག་བཞིན་ཡོད།
མཚན་མོ་འདིར་ང་རང་རྩེད་ཐང་ན་ཡོད།
འགོ་ཁུངས་མི་རྙེད་པའི་བྱིས་པ་ཁྱུ་གཅིག་
དང་མཉམ་དུ།
ཡར་ཀླུང་གཙང་པོའི་ཆུ་ཁ་ན།
ཟླ་བ་ལ་ཅེར་ཏེ་ཡོད།
གཙང་ཆུ་ཁྱོར་བ་གང་ཁྱོད་ཕྱོགས་ལ་འདེགས་ཀྱིན།
ཉམ་ང་བའི་རྩེད་ཐང་གི་མཚན་མོ་འདིར།
བྱིས་པ་ཚོའི་དཔྲལ་ཀོར་ཉི་མ་ཞིག་འབྲི་བཞིན་ཡོད།
མཚན་མོ་འདིར་ང་རང་རྩེད་ཐང་ན་ཡོད།
མིང་ནས་འབོད་མི་ཤེས་པའི་སྐྱ་མི་ཞིག་
དང་མཉམ་དུ།
སྣུམ་ལམ་ཡངས་པོའི་ངོས་ཁ་ན།
ཟླ་བ་ལ་ཅེར་ཏེ་ཡོད།
བཙལ་ནས་རྙེད་པའི་བདེན་པ་དོན་ཐོག་
ཏུ་བགྲད་ཀྱིན།
མུན་མཐུག་པའི་རྩེད་ཐང་གི་མཚན་མོ་འདིར།
སྐར་ཕྲན་ཚོའི་ན་ཟུག་མ་ཐེག་པར་ཆོ་ངེ་
འབོད་བཞིན་ཡོད།
༼ བསོད་ནམས་ལེགས་བཤད། ༽