གྲིབ་གཟུགས་དེ་དག།
ཐོལ་གྱིས་མངོན་ཡོང་ཐེངས་རེར།
ང་ལ་ཚོར་ཤེས་དང་བྲལ་བའི་ཞེད་
སྣང་ཞིག་སྐྱེས་འོང་།
འགྱུར་འགྲོ་བའི་ཁ་དོག་སྣ་ཚོགས་ལས།
གོ་རིམ་འཁྲུལ་ཞིང་ཤེས་པ་འཆོལ་ཏེ།
རོ་བྲོ་མེད་པའི་དྲན་པ་ཡན་ཡུན་ཞིག།
ག་ཤེད་ཅིག་ནས་ཡིད་ཡུལ་དུ་བསྐྱིལ་ངེས།
མིག་ཟུང་བཙུམས་ནས་རིག་པ་བསྒྲིམས་ན།
ད་གཟོད། ཁྱེད་ཀྱིས་རང་གི་ངོ་གདོང་
དང་མེ་ལོང་སྔ་མོ་ནས་བོར་སོང་བ་ཚོར་འོང་།
ད་གཟོད། ཁྱེད་ཀྱིས་གྲིབ་གཟུགས་དེ་དག་
ལ་གཟུགས་སྒྲ་དྲི་རོ་རེག་བྱ་མེད་པ་ཚོར་ངེས།
བལྟས་ཚོད་ཀྱིས་གྲིབ་གཟུགས་དེ་དག་ནི།
ཉི་འོད་ཀྱི་བདེ་སྐྱིད་ལ་རོལ་བཞིན་པ་
ལྟར་སྣང་ཡང་།
དོན་དམ་དུ། ཁྱེད་ཀྱི་ནང་སེམས་ལ།
གྲང་འཁྱག་གི་གྲིབ་སོས་སྔ་མོ་ནས་
སྒྲིབ་ཡོད་ངེས།
༼ ཁྱུང་གཤོག། ༽