ཕྱོགས་བཅུའི་རབ་འབྱམས་རྒྱལ་བ་མ་ལུས་པའི།། ཡོན་ཏན་ལྷུན་རྫོགས་འཕགས་མཆོག་པད་མ་ཅན།། ཐུགས་རྗེ་ཆེན་པོས་རབ་དཀར་ལྷུན་པོར་བརྗིད།། གཟུགས་སུ་ཤར་བའི་འཇིག་རྟེན་དབང་ཕྱུག་འདུད།། ཅེས་སྔོན་དུ་བསུས་ནས་ཐུགས་བརྩེ་བ་ཆེན་པོའི་བདག་ཉིད་ཅན་ས་བཅུའི་དབང་ཕྱུག་འཕགས་མཆོག་སྤྱན་རས་གཟིགས་ཀྱི་གནས་རིའི་ཞལ་བོད་ཀྱི་ཕྱོགས་སུ་གཟིགས་ཤིང་། སྤྱན་རས་གཟིགས་ཀྱི་གཡས་གཡོན་དུ་བདེ་བཤེགས་བརྒྱད་དང་། བྱང་སེམས་རྣམས།གནས་བརྟན་བཅུ་དྲུག་སོགས་ཀྱིས་བསྐོར། སྤྱན་རས་གཟིགས་ཀྱི་མདུན་དུ་ཡན་ལག་བརྒྱད་ལྡན་གྱི་མཚོ་མུ་ཏིག་དཀར་པོའི་མདོག་ཅན་དབྱིབས་པདྨ་འདྲ་བ་ཞིག་ཡོད། དེའི་ཆུ་ལ་བཀྲུ་ན་ལུས་ངག་ཡིད་གསུམ་གྱི་ནད་སྒྲིབ་ཐམས་ཅད་འདག་པར་འགྱུར། སྤྱན་རས་གཟིགས་ཀྱི་ཐུགས་ཀ་ནས་ས་ག་ཟླ་བའི་ཚེས་བཅོ་ལྔ་ལ་འོ་མ་འདྲ་བའི་ཆུ་འབབ། གཏེར་ཆུ་ཡང་ཟེར། ཆུ་དེ་ལ་བཀྲུ་ན་ལུས་ངག་ཡིད་གསུམ་གྱི་སྡིག་སྒྲིབ་ཐམས་ཅད་འདག་པར་གསུངས། གཏེར་ཆུ་ཡོང་དུས་ཐོག་མ་ཆུ་མགོ་བླང་རྒྱུ་རག་ན་གཏེར་རིལ་སོགས་རིན་པོ་ཆེའི་རིགས་འདྲ་མིན་སྣ་ཚོགས་རྙེད།དེ་དག་སྲིད་ན་རྙེད་པར་དཀའ་བའི་རིན་པོ་ཆེའི་རིགས་ཤ་སྟག་དང་། ནད་གདོན་ཐམས་ཅད་ཞི་བར་འགྱུར་བའི་བྱིན་རྟེན་རྩ་ཆེན་ཞིག་ཡིན་པར་བླ་མ་དམ་པ་རྣམས་ཀྱིས་གསུངས།