སྐྱིད་སྡུག་ཐོད་པའི་རི་མོ་བཙན་དང་ཤེད་ཀྱིས་མི་ནོགས། །
གསོན་པའི་རྨི་ལམ་ལྗང་གུའི་སྟེང་འོག་དལ་གྱིས་བསློགས་ཏེ། །
གཉོམ་པའི་སྙིང་ཤ་རེ་རེ་རླུང་དང་གྲང་བས་གདུང་དུས། །
བརྒྱ་བཤད་གཏམ་གྱི་སྣེ་མོ་ཁྱོད་ནི་འཁོར་བའི་རི་དྭགས། །
ལས་ཀྱི་རྟ་ཕོའི་སྲབ་མདའ་སུ་དང་གང་གིས་བསྒྱུར་འགྲོ། །
ཀུ་རེ་འདྲ་བའི་འཁོར་བ་ཁྱོད་ཀྱི་མགོ་ཐོག་འཁོར་སྐབས། །
སྐྱེ་དང་འཆི་བའི་གཏམ་རྒྱུད་སྨྲ་སྒོར་ལེན་འདོད་མེད་ཀྱང་། །
གོ་མེད་ཚོར་མེད་ངང་ནས་ཁྱོད་ཀྱི་ཉེ་ཕྱོགས་ལྡང་ཡོང་། །
ཕུང་གསུམ་འཚོ་བའི་མགྲོན་པོ་འདི་མེད་ཕྱི་མེད་ངང་དུ། །
ཚེ་ཡི་འདུ་བྱེད་རྫོགས་དུས་འཇིག་རྟེན་ཆེན་མོའི་ཁྱོན་དུ། །
མི་ཤོང་སྐྱོ་བའི་ངུད་མོ་གཅིག་རྗེས་གཉིས་སུ་མཐུད་དུས། །
སྐྱོར་མ་མེད་པའི་ཁྱོད་རང་ཤོག་བྱ་ཞིག་དང་ཨེ་མཚུངས། །
འདུན་པ་ལྷ་ལ་མ་གཏད་འཁོར་བའི་གྲོང་དུ་གཏད་པའི། །
ང་དང་ཁྱོད་ནི་འདི་ནས་ཨ་འཁྲུལ་སྟེང་གི་ཡང་འཁྲུལ། །
འཁྲུལ་བའི་རྒྱ་མཚོ་རྒལ་ལ་ཤེས་རབ་གྲུ་གཟིངས་མེད་ན། །
སྟོང་བསམ་དགུ་བརྒྱ་དགུ་བཅུས་ཕ་རོལ་ཕྱིན་ས་མ་རེད། །
གྲང་བའི་གཞུང་དུ་ལུས་པའི་ཁྱོད་ཀྱི་ཕྱི་ནང་གསང་གསུམ། །
བལྟས་ན་མིག་གིས་མི་མཐོང་མྱོང་ན་སེམས་ཀྱིས་ཚོར་བའི། །
མི་ཚེའི་ལམ་ཀྱོག་འདི་ཡི་ལས་ཀྱི་དཀའ་ཚེགས་སྣ་ཚོགས། །
ཁྱོད་ཀྱིས་རྒྱབ་ཏུ་ཁུར་ཏེ་འཇིག་རྟེན་གཞན་པར་ནམ་ཆས། །
འཚོ་བ་སྟོན་ཀའི་གནམ་ངོ་འཐིབ་དྭངས་ཅི་འདྲ་མྱུར་བ། །
འགྱུར་བག་ཚ་པོའི་ཁྲོད་ནས་ནམ་ཡང་གསོན་ལ་རེ་བའི། །
གཡར་བའི་ཁྱོད་ཀྱི་ལང་ཚོ་ཧ་ཅང་གཉོམ་ཆུང་ཞིག་ལས། །
གཡོ་མེད་ཐེར་ཟུག་ཅན་ཞིག་མིན་པ་ཤེས་བཞིན་སྐྱོ་སོང་། །
ཞེ་ཁོག་བཟང་གི་མ་གང་བསམ་ངན་ལས་ཀྱིས་གང་བའི། །
མི་སེམས་མཚར་པོ་འདི་ནི་སྡིག་པའི་བླུག་སྣོད་ཅིག་རེད། །
ཇི་ལྟར་བླུགས་ཀྱང་མི་ངོམ་ཉེས་སྐྱོན་ཁོ་ནས་བྲབས་པའི། །
མི་ཚེའི་གཞུང་གི་ཁ་ཡིག་མཚར་པོ་ནང་གི་མཚར་རེད། །
༼ ཁངས་མ། ༽