ལས་ཀྱིས་བདས་པའི་རྣམ་ཤེས་ཕྲ་མོ་གང་།།
ཁོག་ནས་གསོས་ཤིང་སྐྱེས་ནས་ཟས་གོས་སོགས།།
རང་གི་སྲོག་ལས་གཅེས་པར་རྟག་བརྩོན་པའི།།
བྱམས་དང་བརྩེ་བའི་གཉེན་གཅིག་ཨ་མ་ཉིད།།
བསོད་ནམས་ལས་ཀྱིས་ཐོབ་པའི་མི་ལུས་འདི།།
བཟོད་དཀའི་འཁོར་བའི་གྲོང་དུ་འཁྱམ་ཙ་ན།།
གནོད་པའི་རྐྱེན་བཟློག་མཐུན་པའི་གྲོགས་མཛད་པའི།།
ཞུམ་མེད་གོ་ཆ་བགོ་བའི་ཨ་ཕ་ཉིད།།
འོ་སྐོལ་དྲིན་གྱི་ཆེ་བ་ཡབ་ཡུམ་ལ།།
ལན་དུ་འཇལ་བ་ཤིན་ཏུ་དཀའ་ན་ཡང་།།
བསམ་པའི་བློ་བསྟུན་དགའ་བས་སྲི་ཞུ་བཅས།།
དུས་ཀུན་མ་བརྗེད་བཀའ་དྲིན་དྲན་པར་གྱིས།།
འཕགས་པའི་ཐུགས་ཀྱི་རྒྱུ་འབྲས་མི་བསླུ་ཕྱིར།།
བསགས་པའི་བསོད་ནམས་ཆེ་ཆུང་གང་མཆིས་ན།།
ལེགས་པར་ཀུན་ཡང་ཕངས་མེད་ཕ་མར་མཆོད།།
དེ་ཡི་སྟོབས་ཀྱིས་སྐུ་ཚེ་རྟག་བརྟན་ཤོག །
༼ ལྡོང་རོང་བསོད་ཐར། ༽