དབྱངས་ཀྱི་སྨིན་དྲུག་བསླེས་པའི་དགུ་མདུད། །

ཚིག་གིས་རི་མོ་ཕབ་པའི་འཇའ་ཚོན། །

ཚོར་བའི་གདངས་སུ་གྱེར་ཙམ་བྱུང་ན། །

འཁོར་འདས་གཉིས་ཀྱི་ཕྱི་ནང་རྟོགས་སྲིད། །

མུ་ཏིག་མཚོ་ཁར་ཟེགས་པའི་རྨི་ལམ། །

གར་གྱི་སྟངས་སྟབས་མངོན་པའི་སྒྱུ་འཕྲུལ། །

སྣང་བའི་འོད་ཟེར་འཕྲོས་པའི་ཚུལ་གྱིས། །

སྣ་ཚོགས་འགྲོ་བའི་ལས་དབང་མཐོང་འོང་། །

རླུང་བུ་དལ་གྱིས་གཡོ་ཚུལ་དེ་གས། །

དྲན་པའི་རླབས་རིས་དགུང་ལ་འཕྱོ་བ། །

ལས་ཀྱིས་བཏབ་པའི་རེ་འབྲས་ལོས་ཡིན། །

རྨི་ལམ་ནང་གི་འཇའ་ཚོན་འདྲ་བྱུང་། །

རེ་བ་གསར་པ་སེམས་སུ་བཅངས་བ། །

འོད་སྣང་གསར་པའི་སྨོན་འདུན་ཡིན་སྐད། །

འཁོར་བའི་གྲོང་ནས་མགུར་གླུ་ལེན་པ། །

ལས་ཀྱིས་གནང་བའི་ཐོབ་སྐལ་ཡིན་འདྲ། །

དྲན་སེམས་མཚོ་མོའི་ནང་དུ་འཆར་བའི། །

གསེར་གྱི་ཡིག་འབྲུ་རིན་ཐང་ཅན་པོ། །

ཤ་དང་རུས་པའི་གསེབ་ཏུ་བཞག་ཡོད། །

དབྱངས་དང་རོལ་མོས་ཡང་ཡང་དཀྲིས་ཡོད། །

སེམས་ཉིད་སྟོང་པའི་རྩལ་ལས་འཁྲུངས་བ། །

ངག་འགྲོས་སྙན་མོའི་ཡིག་འབྲུ་དམར་པོ། །

བསིལ་འཇམ་གྲིབ་མའི་འཁྲིས་སུ་ཕྱོགས་པ། །

ལས་ཀྱི་བསྐོས་ཐེངས་ལོས་ཡིན་གྲོགས་པོ། །

འབྲི་ཐབས་གཞན་དང་མི་འདྲ་མཚར་ལེ། །

བརྗོད་སྟངས་ཀུན་དང་མི་མཐུན་སྡུག་ལེ། །

རང་གཤིས་རང་ལ་འཚམ་པའི་དབྱངས་འགྲོས། །

སུས་ཀྱང་བཅོས་ཐབས་མ་ཡོད་གྲོགས་པོ། །

རི་དང་ལུང་པར་འགྲིམས་ཀྱང་མ་ལྷག །

མཚོ་དང་མཚེའུ་བརྒལ་ཡང་མ་བོར། །

ལུས་དང་གྲིབ་མར་འགྲོག་པ་ནང་བཞིན། །

མཚོན་ཐབས་དེ་གས་གཟུགས་སུ་བཀོད་ཆོག །

ལོ་དང་ཟླ་བ་འདས་ཀྱང་མ་བརྗེད། །

ཞག་དང་ཉིན་མཚན་སོང་ཡང་མ་སྐྱུར། །

ཤེས་རབ་ལྷ་མོས་གནང་བའི་ཡིག་ཚོགས། །

སོར་མོས་དཀྲོལ་ན་ཉམས་ཤིག་ཡོད་ལེ། །

སྐྱེ་ཕྲེང་མུ་ཏིག་ལག་པས་བགྲང་རུང་། །

སྐྱེ་བ་གཅིག་ལ་འབྲལ་ཐབས་མེད་པའི། །

ང་དང་དབྱངས་ཀྱི་ཐ་སྙད་འདི་དག །

འཇིག་རྟེན་བྱེད་པོས་བཀོད་སྒྲིག་ཡིན་འདྲ། །

སེམས་ཀྱི་རྟེན་ས་ཡིག་འབྲུ་འདི་དག །

ལས་ཀྱི་གྲོགས་ཀྱང་ཐ་སྙད་འདི་ཚོ། །

ང་ལ་དབང་བའི་མིང་དང་ཚིག་འགྲོས། །

སེམས་སུ་ཉར་ནས་རྨི་ལམ་རྨིས་ཡོད། །

འདྲིས་ཤིང་འགྲོགས་ན་བརྩེ་བ་ཇེ་ཟབ། །

བྲིས་ནས་བཀླགས་ན་དུང་བ་ཆེར་ཟབ། །

ནང་སེམས་མཚོན་པའི་བདག་གི་མིང་ཚིག །

མི་ཚེའི་དགའ་སྡུག་དབྱངས་སུ་གྱེར་རོགས།།

ཐོད་པའི་ཐ་སྙད་ཨ་ཡིག་དཀར་པོ། །

ཕྱིས་ཀྱང་འདག་ཐབས་མེད་པ་ལས་རེད། །

རྣམ་ཤེས་མཚོན་པའི་མིང་ཚིག་མཐའ་དག །

རུས་པའི་དཀྱིལ་དུ་ཡང་ཡང་བརྐོས་ཡོད། །

༼ རྫ་ཤུལ་བློ་བཟང་། ༽