སྤྱི་ཟླ8ཚེས3ཉིན་གྱི་མཚན་མོའི་ཆུ་ཚོད3དང་སྐར་མ30ཡས་མས་སུ་དཀར་མཛེས་ཁུལ་དར་མདོ་གྲོང་ཁྱེར་གུར་དྲག་གྲོང་རྡལ་རི་བརྒལ་གྲོང་སྡེར་གློ་བུར་དུ་ཆུ་ལོག་གནོད་འཚེ་ཚབས་ཆེན་ཐོན་ནས་གཡག་རྔ་ནས་དར་མདོ་བར་གྱི་མྱུར་བགྲོད་གཞུང་ལམ་ལས་དར་མདོ་ནས་ལྕགས་ཟམ་བར་གྱི་རི་བརྒལ་ཕུག་ལམ་དང་པོ་ནས་གཉིས་པའི་བར་གྱི་ཟམ་པ་རྡིབ་པ་དང་གུར་དྲག་གྲོང་རྡལ་རི་བརྒལ་གྲོང་སྡེའི་ཁང་པ་ཆུས་དེད་པས། རླངས་འཁོར་ལྷུང་བ་དང་མི་སྣ་གར་སོང་ཆ་མེད་དུ་གྱུར་ཡོད། སྤྱི་ཟླ8པའི་ཚེས4ཉིན་གྱི་ཆུ་ཚོད14དང་སྐར་མ30བར་མི8རྐྱེན་ལམ་དུ་ཤོར་བ་དང་མི19གར་སོང་ཆ་མེད་དུ་གྱུར་ཡོད་པ་ཚགས་བཤེར་ཐུབ་ཡོད། རོགས་སྐྱོབ་ལས་དོན་ཛ་དྲག་དང་གོ་རིམ་ལྡན་པའི་ངང་སྤེལ་བཞིན་ཡོད་པ་རེད།

གནོད་འཚེ་ཐོན་རྗེས་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གིས་མཐོང་ཆེན་བྱས་ཤིང་། ཞིང་ཆེན་ཏང་ཨུའི་ཧྲུའུ་ཅི་ཝང་ཞའོ་ཧུའེ་ཡིས་འཕྲལ་དུ་མཆན་བཀོད་མཛུབ་སྟོན་གནང་ནས་ལྷག་ལུས་རླངས་འཁོར་དང་མི་སྣའི་གནས་ཚུལ་ལ་སྔར་བས་ཞིབ་བཤེར་གང་ལེགས་དང་སྟོབས་ཤུགས་བསྡུས་ནས་རྨས་སྐྱོན་ཐེབས་མཁན་མྱུར་སྐྱོབ་གང་ཐུབ་བྱ་དགོས་པའི་བླང་བྱ་བཏོན་པ་རེད། ཞིང་ཆེན་ཏང་ཨུའི་ཧྲུའུ་ཅི་གཞོན་པ། ཞིང་དཔོན་ཧྲི་ཞའོ་ལིན་གྱིས་ཝང་ཞའོ་ཧུའེ་ཡི་བཀའ་མངགས་ལྟར་ཚོ་ཆུང་ཁྲིད་དེ་ཉིན་དེའི་ཕྱི་དྲོར་གནོད་འཚེ་ཐེབས་ཡུལ་དུ་ཕེབས་ནས་རོགས་སྐྱོབ་ཐག་གཅོད་ལས་དོན་ལ་བཀོད་གཏོང་གནང་བ་རེད། ཝང་ཞའོ་ཧུའེ་ཡིས་ཡུལ་དངོས་རོགས་སྐྱོབ་བྱ་ཡུལ་གྱི་འབྲེལ་ཡོད་ཕྱོགས་ལ་ཁ་པར་ནས་བཀོད་གཏོང་ཐེངས་མང་གནང་རྗེས་ཚེས4ཉིན་གྱི་ཞོགས་པ་སྔ་མོ་ནས་གནོད་འཚེ་ཐེབས་ཡུལ་དུ་ཕེབས་ཏེ་རོགས་སྐྱོབ་ཐག་གཅོད་ལས་དོན་ལ་མཛུབ་ཁྲིད་གནང་བ་རེད།

དར་མདོ་གྲོང་ཁྱེར་གུར་དྲག་གྲོང་རྡལ་དུ་སླེབས་དུས་ཝང་ཞའོ་ཧུའེ་དང་ཧྲི་ཞའོ་ལིན་རྣམ་གཉིས་རི་བརྒལ་ཕུག་ལམ་དང་པོ་ནས་གཉིས་པའི་བར་གྱི་ཟམ་པ་རྡིབ་སར་ཕེབས་ཏེ། གར་སོང་ཆ་མེད་དུ་གྱུར་པའི་རླངས་འཁོར་དང་མི་སྣ་འཚོལ་སྐྱོབ། འགྲིམ་འགྲུལ་འཚུབ་བསྟུན་ཐག་གཅོད་སོགས་ཀྱི་གནས་ཚུལ་ལ་འདྲི་རྩད་ཞིབ་ཕྲ་གནང་བ་རེད། （པར་ངོས་གཉིས་པར་གཟིགས།）