ཐར་ཐོར་དུ་ལུས་པའི་ཚིག་འབྲུ་དག་ལྷུ་འགྲིག་སྟེ།
ཁྱེད་ལ་སྙན་ཚིག་གི་བསྟོད་པ་འབུལ་དགོས་སྙམ།
སྔས་འགྲམ་ན་མཆིས་པའི་པི་ཝང་བྲང་ཁར་བཟུང་ནས།
ཁྱེད་ལ་སྙན་འཇེབས་ཀྱི་གླུ་དབྱངས་ལེན་དགོས་སེམས།
ཀྱེ་ཀྱེ། དབྱངས་ཅན་མ།
སྙན་ངག་མཁན་གྱི་མགྲིན་མཚོར་རོལ་བའི་ལྷ་མོ།
ཁྱེད་ནི་དཀར་གསལ་གྱི་ཟླ་བ་ཡིན་པས།
བདག་སེམས་ཀྱི་ཀུ་མུད་ཁྱེད་ཀྱི་ཕྱོགས་སུ་བཞད།
ཁྱེད་ནི་དཀར་དམར་གྱི་འདབ་བརྒྱ་ཡིན་པས།
བདག་སེམས་ཀྱི་བུང་བ་ཁྱེད་ཀྱི་ཕྱོགས་སུ་འཁོར།
འོན་ཀྱང་། བདག་ནི།
ཚིག་རྒྱན་དང་གླུ་དབྱངས་དེ་དག་ལ་གོམས་བྱང་མེད་པས།
འཇམ་རྩུབ་དང་ལྕི་ཡང་རན་པའི་སྡེབ་སྦྱོར་ལའང་ཆ་རྒྱུས་བྲལ་བས།
ཁྱེད་ཀྱིས་གཟིགས་ན་ཞེ་ཁྲེལ་དགོས་པའི་གནས་སུ་འདུག་མོད།
ཡིན་ཡང་སྔོན་བྱོན་མཁས་པས་ཁྱེད་ལ་ཕུལ་བའི་བསྟོད་རྩོམ་དེ་དག
བདག་གིས་ཧི་མ་ལ་ཡའི་རི་ཚོགས་བརྒལ་ཏེ།
ཁྱེད་ཀྱི་དྲུང་དུ་ལན་ཅིག་གྱེར་ན་ཡང་ཡང་བསམས།
འོན་ཏེ། དབྱངས་ཅན་མ།
ཁྱེད་རང་གང་དུ་བཞུགས་སམ།
བདག་ནི་གོམས་བྱང་མེད་པའི་ཚིག་རྒྱན་དང་།
འདེགས་འཇོག་བྲལ་བའི་ང་རོ་འདི་དག་ལ་ལྷག་པར་སུན་ཞིང་།
སྙན་ངག་པ་ཞིག་བྱེད་འདོད་པའི་བྲེལ་ཤ་ཁོ་ནས།
ད་ཆ་སླར་ཡང་སྙན་ངག་གི་བང་རིམ་ལོགས་ནས།
མཁས་པ་ཚོས་རིང་ནས་བསྟེན་པའི་ལྷ་མོ་ཁྱེད་དྲན་འོང་།
རེད་ལགས། ཚངས་སྲས་མ།
ཁྱེད་རང་བདག་དང་ཐག་རིང་ས་ཞིག་ན།
ལག་པས་རེག་མི་བཟོད་པའི་ཆུ་ཟླ་ལྟར་མཚོ་རྫིང་ཀློང་དུ་ཡི་གར་འོང་།
འདབ་སྟོང་གྲོལ་བའི་པད་སྟེང་ན་བུང་བ་ཇི་བཞིན་སྙན་པའི་རྫ་རྔ་འཁྲོལ།
ད་དུང་། སྙན་ངག་པ་དུ་མའི་མགྲིན་མཚོར་ཆུ་བྱ་ལྟར་རྩེ་དགར་རོལ།
ནམ་ཞིག་བདག་རང་ཁྱེད་ཀྱི་དྲུང་དུ་སླེབས་ཚེ།
སྙན་པོའི་ཚིག་སྦྱོར་དང་སྡེབ་སྦྱོར་དཀའ་བའི་བདག་གི་སོར་མོས།
སྙན་འཇེབས་ཀྱི་རོལ་མོ་ལྷང་ལྷང་དཀྲོལ་ཞིང་།
ཉམས་འགྱུར་གྱི་སྙན་ངག་ལྷོག་ལྷོག་འབྲི།
༼ རིག་འཛིན། ༽