ཚེ་གཅིག་དྲན་ཤིང་གི་མེ་ཏོག་སེམས་སུ་འཆང་བ། །

ལས་འབྲས་བསླུ་མེད་ཀྱིས་གནང་བའི་ལེགས་སྐྱེས་ཡིན་འདྲ། །

རྨི་ལམ་དཀར་དམར་ཞིག་རྨིས་པའི་ལམ་འགྲམ་དེ་གའི། །

མ་སྐྱེས་ལྷ་ཞལ་གྱིས་ཕྱུག་པའི་མཛའ་གཞས་བདག་མོ། །

སྣང་བའི་སྤྲོས་ཆེན་གྱིས་བཞེངས་པའི་འཁོར་འདུས་བྲོ་ར། །

བདེ་རྫོགས་ཉམས་ལྡན་གྱི་མཁའ་འགྲོའི་གླུ་སྐད་འདྲ་བའི། །

ལྷན་སྐྱེས་མཛའ་སེམས་ཤིག་ཡིད་ལ་ཡང་ཡང་བརྣག་མཁན། །

འཁོར་བའི་གཞིས་ཁྱིམ་ནས་ཁྱེད་རང་གླེང་དགོས་བྱུང་སོང་། །

བློས་བསླངས་ཡིག་འབྲུ་ཡིས་འཇིག་རྟེན་གསར་དུ་བསྐྲུན་པས། །

འོད་ཀྱི་མེ་ཏོག་གིས་ས་ཆེན་བརྩེ་བས་བཏུམ་སོང་། །

དབྱངས་འགྲོས་ཁ་ཁེར་གྱིས་ཡེ་ནས་མཚོན་ཐབས་མེད་པའི། །

དུངས་སེམས་ཉམས་ལྡན་གྱི་འཁོར་བའི་བདག་མོ་གླེང་འདོད། །

འཁོར་བ་དགའ་སྡུག་གིས་གྲུབ་པའི་འཇིག་རྟེན་དཀར་ནག །

སྣང་བ་ཡུད་ཙམ་གྱིས་འགྱུར་བའི་ཆུ་གཟུགས་རི་མོ། །

འཁྲུལ་གཟུགས་སྣང་བརྙན་གྱི་ངོས་སུ་རྒྱུན་དུ་ཤར་ཡང་། །

ཞེན་པའི་བག་ཆགས་ཀྱི་རྩེ་མོ་ཁྱེད་སར་ལྷག་སོང་། །

འདུ་བྲལ་ཆོས་ཉིད་ཀྱི་གཤིས་ལ་སྙིང་པོ་མི་འདུག །

གྱེས་བྲལ་འགྱུར་ལྡོག་གི་སྣང་ཚུལ་ཡིད་ཐང་ཆད་མོད། །

འཁོར་བའི་ལྕགས་སྒྲོག་གིས་བཟུང་བའི་རྣམ་ཤེས་ཕྲ་མོ། །

བློ་སྦྱོང་ཆོས་དྲུག་གིས་མ་ཐུལ་བརྩེ་བས་བཟིས་སོང་། །

ཚེ་གཅིག་དམ་ཆོས་ཀྱིས་བྱུགས་ནས་ལྷ་ཚོགས་སྤྲུལ་འདོད། །

ཏིང་འཛིན་མཉམ་བཞག་གིས་ངང་ནས་རྫོགས་སངས་རྒྱས་མོས། །

དཀར་གསང་མདངས་ལྡན་གྱི་ཟླ་བའི་འཛུམ་ཆུང་དགོད་དུས། །

བློས་བསླངས་ཚོགས་དྲུག་གི་མདུད་པ་རང་སར་གྲོལ་སོང་། །

མཚོ་མཐའི་ཁྲུང་ཁྲུང་གི་དམ་ཚིག་རླུང་ལ་བསྐུར་དོན། །

ཚེ་རབས་ལས་སྐལ་གྱི་གཟུངས་ཐག་ལྷ་ལ་འབུལ་ཆེད། །

རྣམ་ཤེས་གཟེབ་ནང་གི་བྱེའུ་ཆུང་གཤོག་རྩལ་ཞན་པས། །

འཁོར་འདུས་མཚོ་འགྲམ་གྱི་ངོས་ནས་གྲུབ་གཟུགས་ལྷག་སོང་།།

དྲན་ཤེས་ལོ་འདབ་ཀྱི་སྣེ་མོ་རླུང་གིས་ཁྱེར་སོང་། །

བདེ་སྟོང་ཕྱག་རྫོགས་ཀྱི་དོ་ཧ་གཏེར་དུ་སྦས་སོང་། །

ཧ་ཅང་ཉམ་ཆུང་གི་ལང་ཚོའི་ཚུགས་ཀ་བཟུང་ནས། །

ཤ་ཚའི་སྙིང་གཏམ་གྱི་གཞས་ཆུང་ངག་ནས་འཁྲུངས་སོང་། །

ཀུན་རྟོགས་ཉོན་མོངས་ཀྱིས་གནང་བའི་འཁོར་བའི་རྨི་ལམ། །

བརྩེ་འདུན་ཨ་ལོང་གི་མཛུབ་དཀྲིས་ཞེ་ལ་བཏེགས་ཏེ། །

སྒྱུ་མའི་རི་གྲོང་ནས་མཛའ་བརྩེའི་མགུར་གླུ་བླངས་པས། །

སྨྲེང་བའི་སེམས་གཤིས་ལ་ཡིག་འབྲུའི་ཁ་གསབ་བརྒྱབ་ཡོད། །

༼ རྫ་ཤུལ་བློ་བཟང་། ༽