མིག་སྔར་གྱི་དུས་ཚིགས་འདི་ནང་ཕྱག་ཕྲེང་རྫོང་མི་ཡག་ཐང་འབྲི་ཏ་ས་འཛིན་རྟེན་གཞི་ནང་སིལ་ཏོག་འཐུ་ཆོག་པའི་དུས་ཚིགས་ཡིན། རྟེན་གཞི་དེའི་ནང་ཐོན་རྗེས་འབྲི་ཏ་ས་འཛིན་གྱི་ཡལ་གར་ལྗིད་ཏིག་ཏིག་གི་འབྲས་བུ་དུད་འདུག། དེའི་དྲི་ཞིམ་བསིལ་རླུང་འཇམ་པོ་ཞིག་གིས་དྲི་འཛིན་ལ་འཐུལ་ཡོང་དུས་མི་ལ་རང་དབང་མེད་སྐྱིད་སྣང་ཞིག་སྟེར་ཐུབ།

བཟོ་པ་སུམ་ཅུ་ལྷག་གིས་འབྲི་ཏ་ས་འཛིན་རྟེན་གཞི་ནང་བྲེལ་འཚུབ་ཀྱིས་འབྲས་བུ་ཆེ་ཆུང་བདམ་བསྲེས་བྱེད་པ་དང་ཐུམ་བརྒྱབ་རྗེས་དྲྭ་ཐོག་ནས་རྒྱལ་ཡོངས་ས་གནས་ཁག་ཏུ་འཚོང་བཞིན་ཡོད།

རྟེན་གཞི་ནང་གླ་རྒྱག་མཁན་བློ་བཟང་ཚེ་རིང་གིས་གདོང་ལ་འཛུམ་གྱིས་ཁེངས་ནས་ང་ཚོ་ས་རྩེ་གྲོང་པ་ནས་རྟེན་གཞི་ལ་འབྲི་ཏ་ས་འཛིན་འཐུ་མཁན་གླ་པ་འོངས་པ་ཡིན། ཉིན་རེར་མི་རེར་གླ་ཕོགས་སྒོར100ཡས་མས་ཐོབ་པ་རེད། དུས་ཡུན་རིང་པོ་ནང་ང་ཚོར་མཚོན་ན་ཡོང་འབབ་ཡག་པོ་ཡོད་པ་རེད། རྟེན་གཞི་ནང་གླ་རྒྱག་ཐུབ་པ་དེ་རང་ལ་མཚོན་ན་སྒོ་ཁ་ནས་དངུལ་རག་ཐུབ་པར་མ་ཟད། ཁྱིམ་གྱི་རྒན་རྒོན་དང་ཕྲུ་གུ་ཚོར་ཡང་ལྟ་སྐྱོང་བྱེད་ཐུབ་ཅེས་བཤད།

ཉེ་བའི་ལོ་ཤས་རིང་ཕྱག་ཕྲེང་རྫོང་གིས་ཐུན་མོང་མ་ཡིན་པའི་གནམ་གཤིས་ཆ་རྐྱེན་དང་གནས་ཡུལ་ལེགས་ཆར་བརྟེན་ནས་མཐོ་སྒང་གི་ཁྱད་ལྡན་ཞིང་ལས་སྤུས་དག་འཕེལ་རྒྱས་ཤུགས་ཆེན་བཏང་བ་དང་འདེབས་འཛུགས་ལག་རྩལ་ཐད་གསར་གཏོད་དང་ཐོན་རྫས་ཀྱི་སྤུས་ཚད་མཐོ་རུ་གཏང་རྒྱུར་བརྩོན་ལེན་བྱས་ཏེ་ཁྱད་ལྡན་ཐོན་ལས་ཀྱིས་འཕེལ་རྒྱས་སྤུས་ཚད་མཐོན་པོར་སྐུལ་འདེད་གཏོང་བར་གོམ་པ་སྔོན་དུ་སྤོས་ཡོད། རྟེན་གཞིས་སོན་སྤེལ་དང་འདེབས་འཛུགས། ཤིང་ཏོག་སོ་མ་འཐུ་བ། ཕྱིར་ཚོང་བཅས་མཉམ་དུ་འདུས་པའི་ཐོན་ལས་འབྲེལ་ཐག་གི་ཐབས་ལམ་བརྒྱུད་ནས་ནང་སྐྱེས་སྒུལ་ཤུགས་སྔར་ལས་ཇེ་འཕེལ་དུ་བཏང་སྟེ་འབྲི་ཏ་ས་འཛིན་ཁེ་ལས་ཀྱིས་མི་སེར་གྱི་ཡོང་འབབ་སྤར་བ་དང་ཁམས་ལྷོ་ས་ཁུལ་གྱི་ཞིང་ལས་འཕེལ་རྒྱས་ནུས་པ་ཆེ་བའི་མིག་དཔེ་ལྟ་ས་ཡག་པོ་ཞིག་ཏུ་གྱུར་ཡོད།

འབྲི་ཏ་ས་འཛིན་རྟེན་གཞིའི་འགན་འཁུར་བ་ཁྲེན་ཁང་ཉིང་གིས་རྟེན་གཞིར་ཅུང་བརྟན་པའི་ལས་ཞུགས་ལས་གནས་བཅུ་ལྷག་ཡོད་པ་དང་། ལོ་རེར་དུས་ཚིགས་རང་བཞིན་དང་གནས་སྐབས་རང་བཞིན་གྱི་ལས་ཞུགས་མི་གྲངས་བརྒྱ་ལྷག་བསྡུ་ལེན་བྱེད་ཀྱི་ཡོད། ལོ་གཅིག་གི་ཆ་སྙོམས་ངལ་རྩོལ་གྲོན་དངུལ་མཐོ་ཤོས་སུ་སྒོར་ཁྲི200ལྷག་བཏང་བ་དང་ཉུང་ཤོས་སུ་སྒོར་ཁྲི80ནས་ཁྲི100བར་བཏང་གི་ཡོད་ཅེས་བཤད།

ཤེས་རྟོགས་བྱུང་བར་གཞིགས་ན། ཕྱག་ཕྲེང་རྫོང་གིས་འབྲི་ཏ་ས་འཛིན་རྟེན་གཞིས་ས་མུའུ1000འཁོར་རྒྱུག་བྱས་པ་དང་ལོ་རེར་བོགས་གཏོང་དངུལ་སྒོར་ཁྲི7སྤྲད་ཀྱི་ཡོད། ད་ལོར་རྟེན་གཞིའི་འབྲི་ཏ་ས་འཛིན་སྐྱེ་ཚད་ལེགས་པས་སྔོན་དཔག་བྱས་ན་ཐོན་ཚད་ཏུན40ཐོན་སྲིད་པ་དང་ཐོན་རྫས་རིན་ཐང་སྒོར་ཁྲི800ལ་ཟིན་རྒྱུ་རེད། 2019ལོའི་ཟླ་བ་དང་པོར་ཕྱག་ཕྲེང་གི་འབྲི་ཏ་ས་འཛིན་རྟེན་གཞིར་སྐྱེ་ལྡན་ཐོན་རྫས་ཀྱི་ཁས་ལེན་ལག་ཁྱེར་ཐོབ་པ་དང་། 2023ལོའི་ཟླ་བ5པར་རྒྱལ་ཡོངས་ཡུལ་ཐོན་ཁྱད་རྫས་ལེགས་གསར་ལག་ཁྱེར་ཐོབ་པ་རེད།

འབྲི་ཏ་ས་འཛིན་རྟེན་གཞིའི་འགན་འཁུར་བ་ཁྲེན་ཁང་ཉིང་གིས་ཕྱིན་ཆད། ང་ཚོས་ཡུལ་སྐོར་ལས་རིགས་སྤེལ་ནས་ཡུལ་མི་དེ་བས་མང་པོ་ལས་ཞུགས་ཐུབ་ནས་ཡོང་འབབ་འཕར་རྒྱུར་སྐུལ་ཁྲིད་བྱས་པ་དང་ཡུལ་སྡེ་དར་རྒྱས་གཏོང་བར་སྒུལ་ཤུགས་ངེས་བསྣན་རྒྱུ་ཡིན་ཞེས་བཤད།། ( སྐལ་བཟང་རྒྱ་མཚོས་བསྒྱུར།)