༼ ༡ ༽
སྟོན་ཟླ་རྒྱས་པའི་དཔལ་ལ། །
མཛེས་པའི་གོར་གོར་ནང་ནས། །
ཁྱེད་ཀྱིས་ཞལ་རིས་བསྟན་ན། །
མི་སེམས་དབང་མེད་འཕྲོག་འགྲོ །
༼ ༢ ༽
སེམས་པའི་དབྱངས་ཀྱི་སྐུད་པས། །
མཛའ་བརྩེའི་བསམ་པ་སྦྲེལ་ཡོད། །
ངང་པའི་བརྩེ་དུང་བསམས་ན། །
འདམ་ལ་རེ་ཞིག་ཆགས་སོང་། །
༼ ༣ ༽
མི་མཐུན་བསམ་པ་མེད་ན། །
ལོ་ཟླའི་བར་མཚམས་འདི་ནས། །
ནོར་བུ་ནོར་ཉམས་མེད་པས། །
དྲི་བྲལ་དྭངས་གཙང་གནས་ཡོད། །
༼ ༤ ༽
མི་སེམས་མི་ལ་ཤོར་ན། །
མཚན་མོའི་དུང་གི་ཟླ་བ། །
ལག་ཏུ་འཐོབ་རྒྱུ་མི་འདུག །
ཡི་ཐང་ཐེངས་གཅིག་ཆད་སོང་། །
༼ ༥ ༽
ཉི་མ་ཤར་ནས་ཤར་སོང་། །
ཟླ་བ་ནུབ་མཐའི་སྤྲིན་པས། །
བསྒྲིབ་རྒྱུ་ཡིད་ལ་མེད་ན། །
རེ་ཞིག་ལྷན་འཛོམས་ཨེ་རེད། །
༼ ༦ ༽
སྟོན་ཟླ་སད་ཀྱི་ཆར་པས། །
མེ་ཏོག་ལྡུམ་རའི་ནང་དུ། །
བྱམས་པའི་ཞལ་རས་མི་འདུག །
གཡུ་སྦྲང་སེམས་པ་ཨེ་སྐྱོ། །
༼ ༧ ༽
མེ་ཏོག་པདྨའི་ནང་ནས། །
གཡུ་སྦྲང་བུང་བ་གཉིས་ཀྱི། །
སྦྲང་རྩི་བཅུད་ལ་རོལ་དུས། །
བྲེལ་འཚབ་སེམས་པ་མི་འདུག །
༼ ༨ ༽
མ་བསམ་ལས་ཀྱི་བསྐོས་པ། །
རང་སེམས་ཤོར་བའི་མི་ལ། །
རི་མོ་ལས་ཀྱིས་འཐེན་ན། །
རང་སེམས་སྐྱོ་ཐབས་མི་འདུག །
༼ ༩ ༽
ཚིག་གསུམ་དམ་བཅའ་མེད་ལ། །
གཞན་ཡུལ་བུ་མོའི་ཕྱོགས་སུ། །
འཕྲིན་པ་རླུང་ལ་བསྐུར་ན། །
དབྱངས་ཀྱི་དར་ཁ་འགྲིག་ཡོད། །
༼ ༡༠ ༽
རང་སེམས་ཁྱེར་བའི་མི་ལ། །
སེམས་པའི་དར་སྐུད་འདི་ཡོང་། །
ཆད་རྒྱུ་ཆད་རྒྱུ་མི་འདུག །
སྙིང་མཐུན་བྱམས་པ་དྲན་སོང་། །
༼ ༡༡ ༽
དུས་ཀྱི་བར་མཚམས་འདི་ནས། །
སྤྲིན་པས་ཕྱི་མིག་བལྟས་བྱུང་། །
འཕྲིན་པ་སྤྲིན་ལ་བསྐུར་ན། །
བྱམས་པས་ཕྱི་མིག་མི་འདུག །
༼ ༡༢ ༽
ང་དང་གཞན་ཡུལ་བུ་མོ། །
དམ་བཅའི་ཚིག་གིས་མདུད་པ། །
སྙན་ངག་འཕྲིན་པ་བསྐུར་ནས། །
སོ་སོའི་ལས་ལ་བཅོལ་ཡོད། །
༼ ༡༣ ༽
མེ་ཏོག་ལྡུམ་རའི་ནང་དུ། །
རྒྱ་ལྕང་ལོ་མ་གཉིས་ལ། །
སྡོང་འགོ་བྱ་ཁྱུ་གཉིས་ཀྱིས། །
བརྩེ་བའི་ལག་ཟུང་སྦྲེལ་འདུག །
༼ ༡༤ ༽
བྲིས་པའི་རི་མོའི་གཟུགས་བརྙན། །
ཆར་དང་ཐིགས་པས་འཇིག་སོང་། །
མ་བྲིས་སེམས་ཀྱི་ཚོར་སྣང་། །
ཡལ་རྒྱུ་ཡལ་རྒྱུ་མི་འདུག །
༼ ༡༥ ༽
འདྲིས་པའི་ལོ་དང་ཟླ་བ། །
བྱམས་པའི་ཕྱོགས་སུ་བསྟབས་བཞག །
ཚེ་གཅིག་གཏན་གྲོགས་ཡིན་ན། །
དྲན་པའི་སྙིང་འདི་འབུལ་ཆོག །
༼ ༡༦ ༽
བུ་མོ་ངེས་འབྱུང་སྐྱེ་ན། །
ཆོས་པའི་གྲྭ་ལ་ཕེབས་དུས། །
ཕོ་གཞོན་ང་རང་མི་སྡོད། །
བདེན་པའི་རི་ལ་བུད་འགྲོ །
༼ ༡༧ ༽
སུམ་ལྡན་བླ་མའི་དྲུང་དུ། །
སེམས་ཁྲིད་ཞུས་ཀྱང་ཞུས་མོད། །
ངེས་འབྱུང་སེམས་ནས་མ་སྐྱེས། །
བུ་མོའི་བག་ཆགས་སད་སོང་། །
༼ ༡༨ ༽
སྒོམ་པའི་སྟོང་ཉིད་མི་འདུག །
མ་བསྒོམས་མཛེས་མའི་ཞལ་རས། །
ཡིད་ལ་དྲན་ཐེངས་རེ་ལ། །
སེམས་དང་སེམས་པས་གསལ་སོང་། །
༼ ༡༩ ༽
སེམས་དང་སེམས་པའི་བར་ན། །
ཆུ་དང་འོ་མ་བཞིན་དུ། །
གཅིག་མཐུན་བསམ་པ་མི་འདུག །
མཛེས་མ་ཁ་ཙམ་ཨེ་རེད། །
༼ ༢༠ ༽
བདུད་རྩིའི་ཆང་གི་ཐིགས་པ། །
གསེར་གྱི་བུམ་པའི་ནང་དུ། །
ལོ་དང་ཟླ་བ་བསྙལ་ཡོད། །
འཐུང་བའི་བྱམས་པ་ཨེ་འདུག །
༼ ༢༡ ༽
དམ་ཚིག་མདུད་པ་མེད་ན། །
བྱམས་པ་གླེང་གྲངས་མང་ཡང་། །
སྙིང་པོ་དེ་ཙམ་མ་རེད། །
འཇིག་རྟེན་འཁོར་བའི་གྲུ་ནས། །
༼ ༢༢ ༽
སེམས་དང་སེམས་པའི་བར་ན། །
གསང་གཏམ་མེ་ཏོག་རྐང་གཅིག །
འཁྱམས་པོའི་མི་ཚེ་འདི་རུ། །
ཡིད་ལ་ཡང་ཡང་སྦས་ཡོད། །
༼ ༢༣ ༽
མི་ཚོགས་ཁྲི་མ་འབུམ་ན། །
སྙིང་གཅེས་བྱམས་པ་བཞུགས་ཡོད། །
བརྩེ་བའི་དུང་གི་ཟླ་བ། །
འཕེལ་འགྲིབ་རེད་རྒྱུ་ཨེ་རེད། །
༼ ༢༤ ༽
མཛངས་མའི་སེམས་དང་མཐུན་ན། །
ཚེ་གཅིག་ཆོས་སྐལ་ཆད་འགྲོ །
གྲོང་པའི་ནང་དུ་འགྲིམ་ན། །
བླ་མ་ཐུགས་དགོངས་འཚོམ་འགྲོ །
༼ ༢༥ ༽
དལ་འབྱོར་རིན་ཆེན་རིགས་ལ། །
སྙིང་པོའི་ལྷ་ཆོས་མེད་ན། །
མི་ཚེ་དོན་མེད་ངང་དུ། །
རྫོགས་པའི་ཡིད་རེ་མུག་ཨང་། །
༼ ༢༦ ༽
ཡི་ཐག་ཆུ་ལས་རིང་ན། །
ཚེ་གཅིག་བརྩེ་བ་སྲོན་པོ། །
མི་འགྱུར་རྡོ་རྗེའི་བྲག་ཏུ། །
མཉམ་དུ་རི་མོ་འབྲི་ཆོག །
༼ ༢༧ ༽
གྲོང་གཞུང་ཆུ་བོའི་འགྲམ་དུ། །
མེ་ཏོག་པདྨའི་འཛུམ་ལ། །
སྐྱིད་ཀྱི་ཉི་མ་ཤར་འདུག །
མི་ཚེའི་ཆོས་ལ་ཨེ་བསྐུལ། །
༼ ༢༨ ༽
སྐྱོ་བ་མི་ལ་བཤད་ན། །
ཚེ་གཅིག་སྐྱོ་རོགས་མི་འདུག །
དགའ་བ་མི་ལ་གླེང་ན། །
ཚེ་གཅིག་དགའ་རོགས་མི་འདུག །
༼ ༢༩༽
མཐུན་པོ་མི་དང་མི་བསམ། །
མི་དང་མི་ཡི་བར་ན། །
དམ་ཚིག་མདུད་པ་མི་འདུག །
བུ་ཆུང་ཆོས་འགོ་བཞུགས་འགྲོ །
༼ ༣༠ ༽
སྣ་ཚོགས་སྒྱུ་མའི་ཁྲོད་ནས། །
སེམས་པ་མི་ལ་ཤོར་ན། །
འཁྲུལ་སྣང་སྐད་ཅིག་ཆོས་ལ། །
རྟག་ཏུ་བརྟན་པོ་མི་འདུག །
༼ ༣༡ ༽
མ་བྲིས་པདྨའི་མཛེས་སྡུག །
སེམས་པའི་མཁར་གྱང་ངོས་ནས། །
དྭངས་གསལ་མེ་ལོང་བཞིན་དུ། །
ཡིད་ལ་ལམ་ལམ་ཤར་སོང་། །
༼ ༣༢ ༽
བྱིན་རླབས་དངོས་གྲུབ་མ་ཆུང་། །
སྙིང་རྗེའི་རྒྱལ་སྲས་ཁྱེད་ལས། །
སྐྱབས་གནས་མཐའ་ཐུགས་མེད་པས། །
བུ་ཆུང་རང་མགོ་ཐོན་ཅིག །
༼ ༣༣ ༽
རྩ་གསུམ་ལྷ་དང་བླ་མས། །
ཆོས་ཀྱི་སྙིང་པོའི་གདམས་ངག །
ལས་བསྐལ་བུ་ལ་སྩོལ་དང་། །
བུ་ཆུང་འཁོར་བ་མི་འཁོར། །
༼ ༣༤ ༽
དགོས་འདོད་ཡིད་བཞིན་ནོར་བུ། །
ལྷ་དང་བླ་མས་མ་གནང་། །
བུ་མོ་ཆུང་མས་གནངས་ན། །
བུ་ཆུང་ས་མཐའ་མི་བསྐོར། །
༼ ༣༥ ༽
ནམ་མཁའ་སྤྲིན་གྱི་བསྐོར་བསྐོར། །
ཕ་མཐའ་སྤྲིན་པས་སྐོར་དུས། །
བུ་ཆུང་འཁོར་བ་འདི་ནས། །
འགྲོ་སའི་ལམ་ཞིག་ཨེ་ཡོད། །
༼ ༣༦ ༽
བུ་མོས་བསླུ་བ་མེད་ན། །
ཆང་ལ་བཟི་ཁ་མི་འདུག །
ཚེ་གཅིག་ཆོས་པའི་གྲྭ་ལ། །
བུ་ཆུང་ཕེབས་པས་ལོས་ཆོག །
༼ ༣༧ ༽
མཛེས་པའི་མེ་ཏོག་བཞད་དུས། །
མཛངས་མའི་ཞལ་རས་བསྟན་སོང་། །
རྐང་དྲུག་བུང་བ་གཞོན་ནུ། །
འདི་ལ་བསྐོར་བས་ཨེ་ཆོག །
༼ ༣༨༽
བུ་ཆུང་ཨ་མའི་པང་ནས། །
ལང་ཚོའི་མེ་ཏོག་བཞད་ཡོད། །
ཚེ་གཅིག་བྱམས་པ་མེད་ན། །
འཁོར་བའི་གྲོང་ལ་མི་འགྲིམ། །
༼ ༣༩ ༽
སྟོན་གྱི་སྤྲིན་པ་ནག་པོ། །
སད་དང་སེར་བ་འབྱུང་འགྱུར། །
མི་སེམས་ཨ་ལ་པ་ལ། །
བརྩེ་བའི་དུང་བ་ཤོར་འགྲོ །
༼ ༤༠ ༽
གྲུ་ཆར་ནམ་མཁར་བབས་ན། །
རྒོད་པོ་འཕུར་ས་མ་རེད། །
གྲོགས་མེད་ཁེར་རྐྱང་ལུས་ན། །
སྙིང་གཏམ་བཤད་ས་མི་འདུག །
༼ ༤༡ ༽
ཡར་ཚེས་བཅོ་ལྔའི་ཟླ་བ། །
བུ་མོའི་ཞལ་རས་འདྲ་ཡང་། །
རི་བོང་འཛིན་པ་འདི་ཉིད། །
ཆུང་འདྲིས་བུ་མོ་མི་གཅིག །
༼ ༤༢ ༽
དཀར་གསལ་དུང་གི་ཟླ་བ། །
ཤར་ནས་ནུབ་ལ་རྒྱུ་ཐལ། །
མཛེས་པའི་བུ་མོའི་ཞལ་རས། །
འཛུམ་མདངས་བསྟན་རྒྱུར་མ་བྱུང་། །
༼ ༤༣ ༽
རྒྱ་མཚོའི་ནོར་བུ་འདི་ཉིད། །
ཉ་དང་སྲིན་བུས་སྲུང་ཡང་། །
ནོར་བུ་མི་ཡིས་འཕྲོག་ན། །
ནོར་བུ་ནོར་ཉམས་ཤོར་འགྲོ །
༼ ༤༤ ༽
རི་བོ་གངས་དཀར་ཏི་སེ། །
མི་འགྱུར་བརྟན་པོ་ཡིན་ན། །
ཉི་མ་ཟླ་བའི་འགྲོ་ཕྱོགས། །
ནམ་ཡང་ཡིད་ལ་འཁོར་ཡོད། །
༼ ༤༥ ༽
ཕྱི་ཚུལ་སྣང་བ་འདི་ན། །
སེམས་པ་སྐད་ཅིག་ཤོར་བའི། །
བུ་ཆུང་བསམ་མེད་འདྲ་བ། །
བསླུ་བྲིད་མཛེས་མས་བྱེད་འགྲོ །
༼ ༤༦ ༽
སོས་ཀའི་དུས་ལ་སླེབས་སོང་། །
ཁུ་བྱུག་མོན་ནས་བྱོན་སོང་། །
མགྲིན་པའི་གསུང་སྐད་སྙན་སྙན། །
སྙིང་ཐུབ་བྱམས་པ་དྲན་སོང་། །
༼ ༤༧ ༽
ཆུ་འདི་གངས་ཆུ་རྫ་ཆུ། །
རི་དེ་ལ་དང་ལུང་པ། །
བརྒལ་རྒྱུ་སེམས་ལ་མེད་ན། །
སོ་སོའི་ལས་ལ་བཅོལ་འགྲོ །
༼ ༤༨ ༽
ས་ལ་རི་མོ་བྲིས་ན། །
རླུང་འཚུབ་དྲག་པོ་ཞིག་གིས། །
སྐད་ཅིག་ནམ་མཁའི་དབྱིངས་སུ། །
ཐལ་བའི་རྡུལ་ལ་ལོག་འགྲོ །
༼ ༤༩ ༽
ང་དང་བྱམས་པའི་འབྲེལ་བ། །
བྱ་ཆུང་འུག་པ་མ་གཏོགས། །
གཞན་པ་གཅིག་གིས་མི་ཤེས། །
གསང་བ་མི་ཁ་མི་རྒྱུད། །
༼ ༥༠ ༽
མ་ཤི་ཚེ་རིང་བྱུང་ན། །
སྙིང་པོའི་ལྷ་ཆོས་བསྒྲུབས་ནས། །
དབེན་པའི་ནགས་འདབས་རི་ལ། །
ཚེ་གཅིག་སྐུ་ལུས་བསྲིང་འགྲོ །
༼ ༥༡ ༽
ལས་ཀྱི་བསྐོས་པའི་མི་ལ། །
དུང་སེམས་མདའ་མོ་ཤོར་དུས། །
སེམས་པའི་མེ་ལོང་དཀྱིལ་དུ། །
རྡོ་ལ་རི་མོ་བྲིས་བཞག །
༼ ༥༢ ༽
པདྨའི་འདབ་མའི་བར་ན། །
མི་མངོན་ལང་ཚོའི་སྦྲང་ཆར། །
ཁོ་བོའི་སྙིང་ལ་བཞུར་ཚེ། །
དམར་ཆུང་སྙིང་གིས་མི་བཟོད། །
༼ ༥༣ ༽
རིག་འཛིན་ཚངས་དབྱངས་རྒྱ་མཚོ། །
ལྷ་སའི་ཕྱོགས་ལ་ཕེབས་དུས། །
མ་སྐྱེས་ཨ་མའི་ཞལ་རས། །
ཡིད་ལ་འཁོར་འཁོར་བྱེད་འདུག །
༼ ༥༥ ༽
བུ་ཆུང་འཁྱམས་པོ་ང་ཡིས། །
ཚེ་གཅིག་ཆོས་གྲྭར་བཞུགས་དུས། །
མཛེས་མའི་ཞལ་རས་མི་འདུག །
བསྒོམ་རྒྱུར་བླ་མ་དྲན་ཐལ། །
༼ ༥༦ ༽
མཛེས་མའི་བག་ཆགས་མི་འདུག །
བླ་གྲྭ་འཁོར་བཅས་དབུས་ནས། །
འཁྱམས་པོའི་མི་ཚེ་སྐྱ་མོ། །
བགྲོད་ལམ་ཁེར་རྐྱང་ཨེ་རེད། །
༼ ༥༧ ༽
མི་སེམས་ནག་ནོག་དྲི་མ། །
བསལ་རྒྱུ་རང་ལ་མེད་ན། །
འཁོར་བ་ཐང་དཀྱིལ་འགྲམ་དུ། །
འུ་གཉིས་ལྷན་དུ་གནས་ཆོག །
༼ ༥༨ ༽
མཚན་མོའི་ཟླ་བའི་འོག་ཏུ། །
ངག་རིག་དབྱངས་ཀྱི་མཆོད་པ། །
ལས་ཀྱི་ལྷན་འཛོམས་མི་ལ། །
ཐེངས་གཅིག་མཆོད་ན་ཨེ་ཆོག །
༼ ༥༩ ༽
སྙན་ངག་འདི་ལྟར་བྲིས་ན། །
ངག་རིག་དབྱངས་ཀྱི་མཆོད་པ། །
དངོས་གྲུབ་ཕྱི་རབས་བུ་ལ། །
གནང་བའི་ལས་སྐལ་མི་ཆུང་། །
༼ ༦༠ ༽
ཚངས་མགུར་གཟུགས་སུ་སྤྲུལ་ནས། །
ཉམས་འགྱུར་སྒྱུ་རྩལ་འདི་ཡིས། །
འཁོར་བའི་དཀའ་སྡུག་ཁྲོད་ནས། །
དབྱངས་ཀྱིས་ཟམ་པ་རྒྱག་ཡོད། །
༼ བདེ་ཆེན་ངག་གྲོལ། ༽