ལྷད་མེད་ལྷ་ཡི་གངས་རྒན།།
རི་ཆུའི་བར་ན་བཞུགས་ཡོད།།
སེམས་ཀྱི་དད་ལམ་རིང་མོ།།
གངས་ཀྱི་རི་ལ་བཅོལ་ཡོད།།
རོང་བཙན་ཁ་བ་དཀར་པོ།།
རྨི་ལམ་ཞིང་དུ་ཕེབས་བྱུང་།།
རྨི་ལམ་སེམས་སུ་སྦྱར་ཞིང་།།
སེམས་པ་རི་ལ་བཅོལ་ཡོད།།
སེམས་ཀྱི་འདུན་པ་ཟབ་མོ།།
མི་རྟག་བཞིན་དུ་བརྡོལ་བྱུང་།།
རོང་བཙན་ཁ་བ་དཀར་པོ།།
མཇལ་བའི་ལས་ལ་རྒྱུ་ཡོད།།
གངས་ཀྱི་པདྨའི་གདན་ལ།།
གངས་ཀྱི་འདབ་མ་སེར་པོ།།
སྤྱན་ཟུང་ལམ་དུ་སིམ་བྱུང་།།
ཆུ་ཤེལ་མུ་ཏིག་འབར་བའི།།
རོང་བཙན་ཁ་བ་དཀར་པོ།།
མཐོ་རིམ་ངང་དུ་ལུས་ཡོད།།
ཆུ་ཡི་མཛེས་སྡུག་བཙལ་ཏེ།།
གངས་ཀྱི་རི་མོ་མཇལ་སོང་།།
དད་པའི་མིག་ཆུ་ཤོར་ཏེ།།
ཁ་བའི་རྨི་ལམ་མཇལ་ཡོད།།
ཁ་བའི་གངས་རི་བསྐོར་ཏེ།།
ཁ་བའི་ལོ་རྒྱུས་མཇལ་བྱུང་།།
གངས་ཀྱི་འདབ་མ་ངོས་སུ།།
བརྗེད་མེད་རི་མོ་བྲིས་ཡོད།།
གནས་ཆེན་ཁ་བ་དཀར་པོ།།
སྒོ་གསུམ་ངང་དུ་ལུས་ཡོད།།
སེམས་ཀྱི་རྨི་ལམ་འཇམ་པོ།།
མཇལ་བའི་སྐལ་བ་ལྡན་ནོ།།
གནམ་སའི་བར་སྣང་ཞིང་དུ།།
གངས་རི་ཤེལ་གྱི་མཆོད་རྟེན།།
བསང་གི་དུ་ལེབ་མཐོངས་སུ།།
གནས་ཆེན་ཁ་བ་དཀར་པོ།།
མིག་གི་ཡུལ་དུ་ཕེབས་བྱུང་།།
སེམས་ཀྱི་ཞིང་ལ་འབབ་བྱུང་།།
གངས་ཀྱི་རྗེས་ཤུལ་མཇལ་བཞིན།།
དད་པའི་དབྱངས་རྟ་འཐེན་ཡོད།།
ཁ་བའི་གངས་ཆུ་འཐུང་བཞིན།།
སྨོན་པའི་དད་ཕྱག་ཕུལ་ཡོད།།
ཐལ་མོ་སྙིང་གར་སྦྱོར་བཞིན།།
འགྲུབ་པའི་སྨོན་ལམ་བརྒྱབ་ཡོད།།
དད་སེམས་རྔུལ་ཆུ་ཟགས་ཏེ།།
རྗེས་དྲན་ལོ་རྒྱུས་བཞག་ཡོད།།
གོམ་གསུམ་སྔོན་དུ་བཞག་སྟེ།།
ཕྱིར་མིག་རྨི་ལམ་འཕེན་ཡོད།།
ཟིན་བྲིས་ཚིག་གསུམ་ཕབ་སྟེ།།
སླར་མཇལ་སྨོན་ལམ་ཞུས་ཡོད།།
༼ བཞག་ཚ། ༽