ཚིག་སྙན་མོའི་དབྱངས་རྟ་དཀྲོལ་བཏང་ན། །
གཞས་སྒྱུ་འཕྲུལ་རིག་པའི་དོ་ར་ཡིན། །
ལྷ་ཞི་བའི་གདན་ནས་བཞེངས་འདྲ་བ། །
སེམས་རང་ངོ་ཤེས་པའི་མེ་ལོང་ཡིན། །
གནམ་འཁོར་ལོ་རྩིབས་བརྒྱད་ཡང་སྟེང་ནས། །
གཞས་དྲུག་འགྱུར་དབྱངས་ལ་བརྒྱུས་པ་ན། །
དོན་སྙན་ངག་ཉི་ཟླའི་དཀྱིལ་འཁོར་ལས། །
མགོན་ལྷ་ཚོགས་དགྱེས་པའི་ཡིག་འབྲུ་གསལ། །
ནང་སེམས་ཀྱི་མགུར་ལ་ཚིག་གིས་དཀྲིས། །
ཚིག་བདེ་སྟོང་དབྱངས་ཀྱིས་མཚོན་ཐབས་བཀོད། །
དབྱངས་དགུ་ཚིགས་རིང་མོ་སེམས་སུ་བཏེགས། །
གནས་འཁོར་བ་དྲན་པའི་རྣམ་ཤེས་ཡིན། །
ཆུ་ཐིགས་པ་བསགས་པས་གཙང་པོར་གྱུར། །
ཚིག་ལྷུ་ལག་བསྒྲིགས་ནས་ཚོར་བ་འདོན། །
དབྱངས་ངང་འགྲོས་བུ་མོ་གཞོན་ནུ་མ། །
དོན་གཤིས་ལུགས་འདི་དང་འཚམ་པར་སྨོན། །
རི་གངས་དཀར་རྩེ་མོ་ཡང་སྟེང་ནས། །
དགུང་མཚམས་སྤྲིན་འཇའ་ཚོན་བྲིས་པ་བཞིན། །
ཚིག་མཚར་སྡུག་རྫོགས་པའི་ལང་ཚོ་ལ། །
ངས་དགའ་སྐྱོའི་རྣམ་འགྱུར་བྱེ་བས་བརླན། །
དབྱངས་མཚོ་མོ་འཁྱིལ་བའི་འགྲམ་ངོགས་སུ། །
མིག་ཁྲ་ཆུང་མཛེས་པའི་དཔུང་རོགས་ལ། །
ཕྱོགས་དེ་གའི་དབྱངས་ཀྱི་སྒྱུ་འཕྲུལ་གྱིས། །
ཉམས་དོད་པོས་འཁོར་བའི་ཕོ་བྲང་བཞེངས། །
འཛུམ་དྭངས་མོའི་མེ་ཏོག་ངང་གིས་གྲོལ། །
ཚིག་སྨིན་ལེགས་གཞོན་ནུ་མདངས་ལྡན་མ། །
ཕྱོགས་རིས་མེད་སེམས་ཀྱི་དགའ་སྡུག་མཚོན། །
རྩ་དབུ་མའི་སྲོག་གི་སྙིང་པོ་ཡིན། །
ལག་སོར་མོས་རྒྱུད་མངས་བསྣུན་པ་ན། །
ཡིད་སྨྲེང་བའི་སྨུག་པ་རང་སར་དེངས། །
གཞས་རེ་འགའ་མགྲིན་པའི་རྩེ་རུ་སླེབས། །
ཆབ་ཆུ་བོའི་བཞུར་རྒྱུན་འདྲེས་ནས་ཡོད། །
བཞིན་གེ་སར་འཛིན་པའི་དཔལ་མོ་ལ། །
བརྗེད་མི་ཉན་གསེར་གྱི་ཕྲ་རྒྱན་དགོས། །
ལྷག་མི་རུང་ཚོར་བའི་དབུགས་རྒྱུན་བསྣན། །
ཚིག་རྟོག་བཏགས་ནང་གི་དཀྱིལ་འཁོར་ཡིན། །
རླུང་གཡུག་ཚེ་ལོ་འདབ་འཐོར་བ་བཞིན། །
སེམས་ཚོར་བས་མིང་དང་ཐ་སྙད་གཏོར། །
འབྲི་མི་ཕོད་ཨ་ཕོའི་རང་གཤིས་མངོན། །
བརྗོད་མི་ནུས་གཏམ་གྱི་མཚོན་ལ་སྐྲག །
༼ རྫ་ཤུལ་བློ་བཟང་། ༽