བསིལ་རླུང་འཇམ་པོ་དལ་གྱིས་ལྡང་། འབྲས་བུ་སྣ་ཚོགས་རབ་ཏུ་སྨིན་པའི་སྟོན་ཁའི་དུས་འདིར་ཕྱག་ཕྲེང་རྫོང་གིས་སློབ་གསོ་འཕེལ་རྒྱས་ཀྱི་བརྒྱུད་རིམ་ཁྲོད་ལམ་ཚད་རྡོ་རིང་གི་དོན་སྙིང་ལྡན་པའི་དུས་སྐབས་བསུས་པ་སྟེ། ཕྱག་ཕྲེང་རྫོང་གི་མཐོ་རིམ་སློབ་འབྲིང་དང་པོས་སྤྱི་ཟླ8པའི་ཚེས20ཉིན་ཕུགས་འདུན་དང་རེ་བ་བཅངས་པའི་སློབ་མ་ཁག་དང་པོ་བསུས་ཡོད།

སྔ་དྲོའི་ཆུ་ཚོད9པར་སློབ་མ་སྐྱེལ་ས་འོངས་པའི་ཁྱིམ་བདག་སློབ་གྲྭར་ཐོན། ཁྱིམ་བདག་ཚོས་བུ་ཕྲུག་རྣམས་མི་ཚེའི་ལམ་བུར་བསྐྱོད་པར་དགའ་སྤྲོ་སྐྱེ་བཞིན་ཡོད་པ་དང་སློབ་མ་གསར་པ་ཚོས་མཐོ་འབྲིང་གི་འཚོ་བར་རེ་སྨོན་གྱིས་ཁེངས་བཞིན་ཡོད། དགེ་རྒན་ཚོའི་རོགས་རམ་འོག་སློབ་ཞུགས་ལས་དོན་ཁག་གོ་རིམ་ལྡན་པའི་ངང་གྲུབ་ཡོད།

ཤེས་རྟོགས་བྱུང་བར་གཞིགས་ན། ཕྱག་ཕྲེང་རྫོང་མཐོ་རིམ་སློབ་འབྲིང་ལ་ས་ཁྱོན་མུའུ150ཙམ་ཡོད་པ་དང་འཛུགས་སྐྲུན་རྒྱ་ཁྱོན་སྨི་གྲུ་བཞི་མ53000ལ་ཟིན་ཡོད།མ་དངུལ་བསྡོམས་འབོར་སྒོར་དུང་ཕྱུར3བཏང་བ་དང་དེང་རབས་ཅན་གྱི་སློབ་ཁྲིད་ཐོག་ཁང་དང་།ཚོད་ལྟའི་ཐོག་ཁང་།དཔེ་མཛོད་ཁང་།ལུས་རྩལ་ཁང་།སློབ་མའི་སྡོད་ཁང་སོགས་རྨང་གཞིའི་སྒྲིག་བཀོད་ཡོད།སློབ་ཁྲིད་སྒྲིག་ཆས་སྤུས་ལེགས་དང་དགེ་རྒན་སྟོབས་ཤུགས་ཆེ་བ་བཅས་ཀྱི་དམིགས་ཡུལ་ནི་སློབ་མར་ཁྱོན་ཡོངས་དང་།དོ་མཉམ།སྤུས་ལེགས་བཅས་ཀྱི་སློབ་གསོའི་ཐོན་ཁུངས་སྤྲད་རྒྱུ་ཡིན་ཞིང། སློབ་གྲྭའི་ཁག་དང་པོའི་སློབ་བསྡུའི་གཞི་ཁྱོན་སློབ་མ340ལྷག་ལ་ཟིན་ཡོད།

ཕྱག་ཕྲེང་རྫོང་མཐོ་རིམ་སློབ་འབྲིང་གི་སློབ་མ་ཁག་དང་པོར་གྱུར་པའི་ལྷ་མོ་ལ་གཟི་བརྗིད་དང་སེམས་འགུལ་ཚད་མེད་ཐེབས་ཡོད། མོས་ངས་སློབ་སྦྱོང་ཧུར་ཐག་བྱས་ནས་རང་ཉིད་མུ་མཐུད་དེ་ཇེ་བཟང་དུ་བཏང་ནས་འབྱུང་འགྱུར་སྤྱི་ཚོགས་ལ་དྲིན་ལན་འཇལ་ཏེ་ཕ་ཡུལ་འཛུགས་སྐྲུན་བྱ་ཆེད་རང་ངོས་ཀྱི་སྟོབས་ཤུགས་ལེགས་སྐྱེས་འབུལ་རྒྱུ་ཡིན་ཞེས་བཤད།

ཕྱག་ཕྲེང་རྫོང་མཐོ་རིམ་སློབ་འབྲིང་གི་ལག་བསྟར་སློབ་གཙོ་ཏེང་ཅན་གྱིས་ང་ཚོར་རྒྱབ་རྟེན་བརྟན་པོ་དང་ཕུལ་བྱུང་ཚོགས་པ་ཡོད་པས་སློབ་གྲྭར་ལོ་རེ་བཞིན་གྲུབ་འབྲས་གསར་པ་ཐོབ་པ་དང་ལོ་རེ་བཞིན་སྐས་རིམ་གསར་པ་ཞིག་ཏུ་སླེབས་པའི་ཡིད་ཆེས་ཡོད། སློབ་གྲྭས་ཏུང་ཁྲེང་གི་དོ་དམ་ཚོགས་པ་དང་།ཏུང་ཁྲེང་གི་དགེ་རྒན་གྲགས་ཅན་།ལུའུ་ཀྲོའུ་ཡི་ཕུལ་བྱུང་དགེ་རྒན། དེ་བཞིན་སློབ་ཆེན་སློབ་ཐོན་སློབ་མ་ཕུལ་བྱུང་བཅས་ནང་འདྲེན་བྱས་པ་དང་ཆབས་ཅིག་ཏུང་ཁྲེང་གི་སྔོན་ཐོན་སློབ་གསོའི་འདུ་ཤེས་ནང་འདྲེན་བྱས་ཡོད། སློབ་གྲྭར་འཐུས་སྒོ་ཚང་བའི་ཀུན་སྤྱོད་སློབ་གསོའི་མ་ལག་དང་།དོ་དམ་མ་ལག།མི་གསོ་སྐྱོང་བྱེད་སྟངས་བཅས་ཡོད་པས་ཤུགས་ཡོད་རྒུས་སློབ་མ་ཁྱོན་ཡོངས་ནས་འཕེལ་རྒྱས་ཡོང་བ་བྱ་རྒྱུ་དང་། སློབ་རིམ་འཕར་བའི་ཐད་རྫོང་གསུམ་མཉམ་བགྲོད་ཀྱི་བྱ་ཐབས་སྤྱད་དེ་སློབ་མ་དེ་བས་མང་བས་སློབ་ཆེན་གྱི་ཕུགས་འདུན་མངོན་འགྱུར་ཡོང་བར་བརྩོན་ལེན་བྱ་རྒྱུ་ཡིན་ཞེས་བཤད།

ཕྱག་ཕྲེང་རྫོང་མཐོ་རིམ་སློབ་འབྲིང་བཙུགས་པ་ལས་རྫོང་དེའི་སློབ་གསོའི་བྱ་གཞག་སྐས་རིམ་གསར་པར་སླེབས་པ་མཚོན་པར་མ་ཟད།རྫོང་ཡོངས་དང་ཐ་ན་མཐའ་འཁོར་ས་ཁོངས་ཀྱི་སློབ་མར་དེ་བས་སྤུས་ལེགས་ཀྱི་སློབ་གསོའི་ཐོན་ཁུངས་དང་དེ་བས་རྒྱ་ཆེ་བའི་འཚར་ལོངས་ཀྱི་བར་མཐོངས་བསྐྲུན་ཡོད།འབྱུང་འགྱུར་ལ་རྒྱང་ལྟ་བྱེད་སྐབས་སློབ་གྲྭས་ཀུན་སྤྱོད་དང་མི་གསོ་སྐྱོང་།ཁྱོན་ཡོངས་ནས་འཕེལ་རྒྱས་གཏོང་བའི་སློབ་གསོའི་འདུ་ཤེས་བཅངས་ཏེ་གསར་གཏོད་ཀྱི་སྙིང་སྟོབས་དང་ལག་ལེན་གྱི་ནུས་པ་ལྡན་པའི་བྱང་ཚད་མཐོ་བའི་ཤེས་ལྡན་མི་སྣ་གསོ་སྐྱོང་བྱ་རྒྱུར་གཞོལ་ནས་ཕྱག་ཕྲེང་རྫོང་གི་དཔལ་འབྱོར་དང་སྤྱི་ཚོགས་འཕེལ་རྒྱས་སྤུས་ཚད་མཐོན་པོར་ཡོང་བར་གསོན་ཤུགས་དང་རེ་བ་གསར་པ་བསྣན་རྒྱུ་ཡིན་པ་རེད།།

( ཀུན་དགས་བསྒྱུར།)