༡
ང་ཡི་མཐོ་སྒང་།
ནོར་ལུག་དང་སྦྲ་གུར་གྱི་ཚོམ་བུའི་རུ་མ་ཡིན།
འོ་ཞོ་དང་མར་ཆུར་གྱི་ཆུ་གཏེར་འཁྱིལ་ས་ཡིན།
མེ་ཏོག་དང་གླུ་སྐད་ཀྱི་མཛེས་སྡུག་འཁོར་
ས་ཡིན།
སྲིད་པའི་མེ་དཔུང་སྒྲོན་ས།
ཁ་བའི་འདབ་སྟོང་འབབ་ས།
ཡུལ་སྦྲ་ནག་ཁྲི་སྡེ་འདི་ཚོ་གཡང་གིས་སྲུང་།
༢
ང་ཡི་མཐོ་སྒང་།
ལོ་ལེགས་དང་འབྲུ་དྲུག་གི་གསེར་བྱེའི་
གཏེར་རྫོང་ཡིན།
ནས་ཆང་དང་སྦྲང་དཀར་གྱི་ཕ་ས་ཕྱུག་མོ་ཡིན།
གཏམ་བརྗོད་དང་བྲོ་གར་གྱི་ནང་རྫོངས་
མཐུག་ས་ཡིན།
སྣོད་ཀྱི་བཀོད་ཆགས་ཡག་ས།
བཅུད་ཀྱི་ལོངས་སྤྱོད་རྒྱས་ས།
ཡུལ་འབྲུ་དྲུག་ཁྲི་སྡེ་འདི་ཚོ་གཡང་གིས་སྲུང་།
༣
ང་ཡི་མཐོ་སྒང་།
ཉི་མ་དང་ཆེས་ཁ་ཐག་ཉེ་སའི་གནས་མལ་ཡིན།
ཟླ་བ་དང་ཆེས་འོད་ཁ་གསལ་སའི་ཞིང་
ཁམས་ཡིན།
ནམ་མཁའ་དང་སྤྲིན་དཀར་གྱི་མཛེས་རིས་
སྤུད་ས་ཡིན།
མཐུན་སྒྲིལ་ཨ་ལུང་དམ་ས།
སྐྱིད་པའི་གླུ་གར་རོལ་ས།
ཡུལ་གངས་ཅན་ཕ་ཡུལ་འདི་ཚོ་གཡང་
གིས་སྲུང་།
༤
ང་ཡི་མཐོ་སྒང་།
བྱམས་བརྩེ་དང་ལྷག་བསམ་གྱི་ཁམས་
དཀར་འབབ་ས་ཡིན།
སྙིང་རྗེ་དང་གཞན་ཕན་གྱི་སྦྲང་ཆར་འཇོ་
ས་ཡིན།
ཐབས་ཤེས་དང་ལུགས་གཉིས་ཀྱི་ཉི་ཟླ་གསལ་
ས་ཡིན།
ལོ་རྒྱུས་རྡོ་རིང་བརྗིད་ས།
ཤེས་རིག་དབུ་འཕང་མཐོ་ས།
ཡུལ་གངས་ཅན་གཙུག་ལག་འདི་ཚོ་གཡང་
གིས་སྲུང་།
༼ སྒོ་སྤྲེལ་ངེས་དོན། ༽