རི་བོ་ནགས་ཀྱིས་དཀྲིས་པའི་ལུང་མཐའ་ན། །
རྫ་ཆུ་སྙན་མོ་ཤག་ཤག་རྣ་བའི་དཔྱིད། །
རབ་སྔོ་དབྱར་གྱི་ལང་ཚོ་ལྟ་ན་སྡུག །
དབྱར་གཞུང་ན་ཆུང་ཐང་ལ་རྩེད་དགའ་རོལ། །
ཚོགས་དྲུག་རྣམ་ཤེས་འགུགས་པའི་སྤང་ལྗོངས་ལ།།
ཡིད་འོང་མཛེས་པའི་མེ་ཏོག་སྙིང་ལ་དྲོ། །
ཁུ་བྱུག་འཇོལ་མོ་གཉིས་ཀྱི་སྙན་པ་དེས། །
དབྱར་དུས་སྐྱིད་ཀྱི་ཚེས་ཆས་རང་སེམས་བདེ། །
མ་བཀྲམ་རང་བྱུང་ལང་ཚོའི་ཞིང་ཁམས་སུ། །
མ་སྒྲིག་སྙན་པའི་བསྡེབས་ཆ་ཁུ་བྱུག་སྙན། །
མ་བྱས་རྐང་དྲུག་བུང་བའི་གཤོག་རྩལ་བདེ། །
མ་བཀོད་དབྱར་གྱི་དུས་བཟང་ཨེ་མ་ཧོ། །
མ་བྱས་རང་བྱུང་ཁམས་ཀྱི་སྤང་ཐང་དུ། །
མ་བཀོད་ཁྲ་ཚོམ་མེ་ཏོག་མགོ་བོ་ལྡེམ། །
མ་ལུས་རི་ཆུ་ཡིད་འཕྲོག་མིག་གི་དཔལ། །
མ་བཅོས་ཚོར་བའི་དབྱར་གྱི་དུས་བཟང་ལགས། །
༼ རང་མདངས། ༽