ཞོགས་པའི་ཁྲི་གདུགས་ཉི་འོད་ས་ལ་འཕྲོས། །
ཆར་ཆུས་གསོས་པའི་མེ་ཏོག་སྣུམ་ཞག་དོད། །
སྐྱི་བསེར་རླུང་གིས་དྲི་བསུང་ཕྱོགས་བཞིར་ཁྱེར། །
རྫ་ཆུ་བསིལ་མས་མཛའ་གཞས་ཡང་ཡང་གྱེར། །
ཕྱེ་ལེབ་སྒེག་མོས་གར་སྟབས་སྣ་ཚོགས་ངོམ། །
འཇའ་རིས་སྣ་ལྔས་གངས་རིར་མཐའ་རྒྱན་སྤྲས། །
ཅང་ཤེས་རྟ་ཕོས་འཚེར་སྐད་བར་མེད་སྒྲོག །
བཻཌཱུར་ཞུན་མས་བྲན་པའི་སྤང་གཞུང་དུ། །
ནམ་མཁའ་ས་ལ་ལྷུང་འདྲའི་མཚོ་མོ་འཁྱིལ། །
བྱ་རྒོད་ནམ་འཕང་གཏོད་འདྲའི་སྦྲ་གུར་མཛེས། །
མུ་ཏིག་ཐང་ལ་གཏོར་འདྲའི་ལུག་ཁྱུའི་ཚོམ། །
ཨེ་མ་ཉམས་དགའི་དབྱར་གྱི་དཔལ་ཡོན་འདི། །
རི་མོ་མཁན་པོས་པིར་གྱིས་བཞེངས་པ་འདྲ། །
༼ གསོན་འདྲེ། ༽