སྔོ་བསངས་མཁའ་ལ་ཉི་ཟླའི་བགྲོད་ལམ་མཛེས། །
བར་སྣང་དབྱིངས་སུ་འདབ་ཆགས་སྣ་ཚོགས་འཕུར། །
ས་གཞི་ཁྱོན་དུ་གུར་གྱི་མེ་ཏོག་བཞད། །
ནམ་ཟླ་དབྱར་ཁ་སླེབས་དུས་ཤིན་ཏུ་སྐྱིད། །
རྩི་ཤིང་སྣ་ཚོགས་མགོ་ལྕོག་ལྡེམ་ལྡེམ་གཡོ། །
ཁུ་བྱུག་སྔོན་མོའི་གསུང་སྐད་སྙན་སྙན་གྲག །
གཙང་ཆབ་སྔོན་མོ་དལ་དལ་འབབ་རྒྱུན་རིང་། །
དབྱར་ཁའི་དུས་འདི་ལྟ་བས་མཆོག་མི་ཤེས། །
སྦྲང་ཆར་ཟིམ་ཟིམ་འཇོ་བའི་གནས་འདི་རུ། །
གཡུ་འབྲུག་སྔོན་མོའི་ངག་སྐད་ལྡི་རི་རི། །
ནོར་འཛིན་ཡངས་པའི་ཁྱོན་དུ་དྭངས་བསིལ་ལེ། །
དབྱར་ཟླ་འགོ་མ་ཚེས་དུས་ལྷག་ཏུ་སྐྱིད། །
ན་ཆུང་བུ་མོས་གར་སྟབས་ལིང་ལིང་བསྒྱུར། །
དཔྱིད་ཀྱི་འཇོལ་མོས་མགྲིན་གླུ་སྙན་སྙན་སྒྲོག །
སྔོ་བསངས་མཁའ་ལ་སྤྲིན་དཀར་ལང་ལོང་འཕྱུར། །
ཁྲི་གདུགས་ཉི་མ་གསེར་གྱི་ས་གཞིར་ཁྱབ། །
ཡངས་པའི་མཁའ་ལ་དུང་གི་ཟླ་བ་ཚེས། །
བར་སྣང་དབྱིངས་སུ་འདབ་ཆགས་སྣ་ཚོགས་རྩེ། །
ནོར་འཛིན་ཁྱོན་དུ་དཀར་དམར་མེ་ཏོག་བཞད། །
དབྱར་གྱི་དུས་འདི་སུམ་རྩེན་ཡུལ་དུ་འཕོ། །
༼ བདེ་ཆེན་ངག་གྲོལ། ༽